CYMRYD RHAN

Rhowch her i’ch hunan i gael cawod mewn 4 munud. (Gall treulio munud yn llai yn y gawod arbed tua 40 gwydraid neu 10 litr o ddŵr). Casglwch bwyntiau am gael cawodydd byrrach ar wefan Troi PDC yn Wyrdd!

• Pan fydd y tywydd yn boeth, cadwch jwg neu botel o ddŵr yn yr oergell er mwyn osgoi rhedeg y dŵr bob tro er mwyn cael diod oer.
• Wrth olchi llestri, llenwch bowlen gyda dŵr poeth a defnyddiwch hwnnw yn lle rhedeg y tap. Ar gyfartaledd, gallai hyn arbed defnyddio hyd at 50% o ddŵr mewn cegin ddomestig.
• Peidiwch â gwastraffu dŵr tap wrth aros iddo boethi – casglwch y dŵr a'i ddefnyddio i ddyfrio planhigion.
• Dewch â photel ddŵr y gellir ei hailddefnyddio i'n hunedau arlwyo i leihau’r nifer o gwpanau sydd angen eu golchi.
• Arhoswch nes bod llwyth llawn o ddillad i’w golchi gennych neu cyfunwch gyda chyd-letywr neu ffrind.
• Os oes gan y toiled ddau fath o ddwrlif (botwm gyda dau hanner sy'n rhoi’r dewis o faint o ddŵr i'w ddefnyddio), defnyddiwch y dwrlif byr os yw'n addas i arbed dŵr.
• Rhowch wybod i’r Ddesg Gymorth Ystadau am unrhyw ddŵr sy’n gollwng.

Mae gan Brifysgol De Cymru rwydwaith o aelodau brwd sy'n gweithio tuag at wneud ein campysau'n fwy cynaliadwy.

Maent yn canolbwyntio ar wella gweithrediadau a gweithgareddau o ddydd i ddydd PDC wrth chwilio am gyfleoedd i leihau ein heffaith amgylcheddol.

Cynlluniwyd y rhwydwaith i roi llais i staff a’u grymuso i wneud newidiadau cadarnhaol a chynaliadwy i'w hamgylcheddau gwaith, wrth ddarparu cyfleoedd datblygu a buddion llesiant.

Os oes gennych ddiddordeb mewn ymuno â'r rhwydwaith Hyrwyddwyr Cynaliadwyedd, cysylltwch â ni yn [email protected].

Ydych chi’n angerddol dros un maes penodol o gynaliadwyedd, neu a oes gennych wybodaeth a phrofiad yr hoffech eu rhannu i siapio ein cynlluniau gweithredu cynaliadwyedd?

Fel rhan o’n Strategaeth Sero Net 2040, rydym wedi creu grwpiau ffocws sy’n creu llwyfan ar gyfer codi ymwybyddiaeth, rhannu gwybodaeth, a chydweithio i ddatblygu cynaliadwyedd ledled y Brifysgol. Datblygwyd y grwpiau ar sail effeithiau allweddol sy’n gysylltiedig â gweithgareddau a gweithrediadau ein hystâd – gyda ffocws ar ysgogi gwelliannau a dod o hyd i atebion i rai o’r heriau sy’n ein hwynebu.

Mae ein Grwpiau Ffocws ar Gynaliadwyedd yn rhoi cyfle i chi wneud cyfraniadau cadarnhaol mewn lleoliad anffurfiol a fydd yn helpu i siapio ein cynlluniau gweithredu cynaliadwyedd.

Ar hyn o bryd mae gennym 5 grŵp y gallwch ymuno â nhw:

• Arlwyo a Bioamrywiaeth
• Ynni ac Adeiladau
• Caffael Cynaliadwy a'r Gadwyn Gyflenwi
• Dysgu, addysgu ac ymchwil
• Teithio a Gwastraff

Mae'r grwpiau'n cwrdd am awr bob chwarter, felly nid oes gofyn i chi ymrwymo llawer o amser i’r grwpiau a gallwch roi hwb sylweddol i’n hamcanion allweddol. Maent hefyd yn gyfle i chi gymryd rhan yn y prosiectau a'r mentrau yr ydych yn ymwneud â nhw.

Rydym yn croesawu aelodau newydd a all ddod â llygaid a syniadau ffres i bob grŵp ac os hoffech gofrestru eich diddordeb, cysylltwch â ni.

Rydym yn awyddus i gynifer o’n staff a’n myfyrwyr ag sy’n bosib i gael cyfle i gymryd rhan mewn ymgyrchoedd a digwyddiadau cynaliadwyedd a gynhelir ym Mhrifysgol De Cymru. Er mwyn cyflawni hyn byddwn yn darparu rhaglen o fentrau a digwyddiadau drwy gydol y flwyddyn i godi ymwybyddiaeth o faterion cyfredol yn lle canolbwyntio ar un ‘Wythnos Werdd’. Bydd hyn yn ei gwneud yn haws i staff a myfyrwyr gymryd rhan. Mae’r rhain yn cynnwys sesiynau Cynnal a Chadw Dr Beic (MOT beic am ddim), sesiynau casglu sbwriel, plannu coed, siopau dros dro, digwyddiadau garddio cymunedol a mwy.

Crynodeb o Ddigwyddiadau Cynaliadwyedd 2023-24

Os oes gennych ddiddordeb mewn cynnal digwyddiad, sgwrs neu weithgaredd ar gynaliadwyedd yn ystod y flwyddyn, cysylltwch â ni yn [email protected].

Oeddech chi’n gwybod bod staff PDC yn cael hyd at dri diwrnod o wyliau â thâl ar gyfer gwirfoddoli?

Rydym wedi datblygu siop un stop ar gyfer dod o hyd i gyfleoedd gwirfoddoli a meithrin cysylltiadau â phobl a sefydliadau sy'n ysgogi newid cadarnhaol yn lleol, yn genedlaethol ac yn rhyngwladol.

O ddigwyddiadau untro i gyfleoedd gwirfoddoli rheolaidd, mae rhywbeth at ddant pawb. Mae pawb ohonom yn brysur, felly mae’r cyfleoedd yn darparu hyblygrwydd heb orfod ymrwymo am yr hirdymor, felly gallwch neidio i mewn ac allan fel sy’n gyfleus i chi. P'un a ydych yn angerddol am yr amgylchedd, addysg neu lesiant, bydd y rhaglen o gyfleoedd gwirfoddoli yn cynnig rhestr o weithgareddau fel y gallwch ddod o hyd i'r un sy’n addas i chi.

Mae gwirfoddoli hefyd yn cynnig profiad a chipolwg gwerthfawr ar sut mae sefydliadau a rhaglenni cymunedol yn gweithio a gallwch ddysgu sgiliau a’u rhannu ag eraill gan gynnwys cyflogwyr, ar geisiadau neu ar eich CV.

Mae rhagor o wybodaeth am gyfleoedd gwirfoddoli cynaliadwyedd lleol ar gael yma.

Yn olaf, os ydych yn gwirfoddoli’n rheolaidd, gallwch gofnodi hyn ar ap Troi PDC yn Wyrdd er mwyn ennill pwyntiau a gwobrau posib!

Mae gan bob un ohonom rôl bwysig i’w chwarae wrth leihau ein hallyriadau carbon.

Mae hyfforddiant Llythrennedd Carbon yn cynnig cyfle i ddatblygu eich dealltwriaeth, gyda’r wybodaeth am sut i leihau eich ôl troed carbon a rhoi’r hyder i chi siarad ag eraill am y materion hanfodol sy'n bwysig i chi. Gall unrhyw aelod o staff gymryd rhan yn rhaglen hyfforddiant Llythrennedd Carbon PDC er mwyn datblygu’r wybodaeth a’r hyder i wneud newid cadarnhaol i chi’ch hunan a’r blaned.

Cynhelir y cwrs ar-lein a wyneb yn wyneb yn achlysurol drwy gydol y flwyddyn. Am ragor o fanylion, ewch i https://www.unprmeclimate.org/carbon-literacy 

Nodau Datblygu Cynaliadwy y Cenhedloedd Unedig yw’r glasbrint ar gyfer cyflawni dyfodol gwell a mwy cynaliadwy i bawb. Maent yn mynd i'r afael â'r heriau byd-eang sy'n ein hwynebu, gan gynnwys tlodi, anghydraddoldeb, newid yn yr hinsawdd, dirywio amgylcheddol, heddwch a chyfiawnder.

Pwrpas y Cytundeb NDC yw ysbrydoli, dathlu a hyrwyddo rôl hollbwysig addysg wrth gyflawni’r Nodau Datblygu Cynaliadwy a’r gwerth mae’n ei chynnig i lywodraethau, busnesau, a’r gymdeithas ehangach.

Gall myfyrwyr, ymchwilwyr, academyddion, a staff gweithredol lofnodi’r Cytundeb NDC er mwyn gwneud ymrwymiad personol a phroffesiynol i chwarae eu rhan.

Gall unigolyn gyfrannu at Nodau Datblygu Cynaliadwy mewn ffyrdd amrywiol, fel gwastraffu llai o fwyd, helpu pobl o’ch cwmpas, lleihau’r defnydd o ddŵr, osgoi cynhyrchion sy’n niweidiol i’r amgylchedd (e.e. plastig), ailgylchu, a phrynu offer sy’n defnyddio ynni’n effeithlon.

Os hoffech chi lofnodi’r cytundeb, gallwch wneud yma: https://www.sdgaccord.org/ 

Rydym yn awyddus i gefnogi myfyrwyr gyda'u hastudiaethau drwy ddarparu lleoliadau gwaith neu gefnogaeth prosiect/ymchwil lle bo modd. Mae gennym brosiectau a heriau cynaliadwyedd a all ddarparu cyfleoedd ‘byd go iawn’ gwerthfawr i fyfyrwyr eu hintegreiddio i’w hastudiaethau a hefyd i weithio ochr yn ochr â thimau Ystadau a Chynaliadwyedd y Brifysgol. Siaradwch â'ch tiwtor neu cysylltwch â'r Tîm Cynaliadwyedd am ragor o wybodaeth.

Oes gennych chi syniad a gall gwneud ein campws yn fwy cynaliadwy? P'un a ydych chi'n fyfyriwr sydd â gweledigaeth o fyw heb wastraff neu'n aelod o staff sydd â chynllun ar gyfer lleihau carbon yn eich adran, mae Cronfa Gynaliadwyedd PDC yma i’ch helpu.

Mae gennym gynigiad cyflawn o £1,500 pob flwyddyn academaidd i gefnogi staff a myfyrwyr i weithredu syniadau yn eu hadrannau ar draws ein campysau. Rydym yn cynnig grantiau graddfa fechan o £250 i gefnogi prosiectau sy’n helpu i gyflawni ymrwymiadau a nodau cynaliadwyedd PDC.

Rydym yn awyddus i ymgysylltu â staff a myfyrwyr i greu ystâd gynaliadwy ar y cyd yn PDC. Rydym yn gwybod y gall atebion i leihau ein heffaith ddod gan wahanol bobl mewn llawer o wahanol rolau ar draws y Brifysgol.

Yr hyn y byddwn yn ei ariannu

Rydym yn chwilio am brosiectau creadigol, effeithiol ac ymarferol sy'n cyd-fynd â'n hamcanion cynaliadwyedd craidd:

• Mentrau Amgylcheddol y Campws: Gwella bioamrywiaeth leol, gwella mannau gwyrdd, neu leihau gwastraff ar y campws.
• Lleihau Carbon: Ffyrdd creadigol o arbed ynni, hyrwyddo teithio llesol neu leihau ôl troed gweithrediadau adrannol.
• Addysg Gynaliadwyedd: Gweithdai, ymgyrchoedd ymwybyddiaeth, neu adnoddau sy'n helpu ein cymuned i ddysgu am weithredu ar yr hinsawdd a byw'n gynaliadwy.

Sut i ymgeisio

• Mae'r gronfa ar agor i bob myfyriwr a staff presennol.
• Gwnewch yn siŵr bod eich prosiect wedi'i leoli ar y campws ac yn cynnig budd cynaliadwyedd mesuradwy.
• Llenwch ein ffurflen fer ar-lein gan nodi beth hoffech chi ei wneud a sut y byddwch chi'n gwario'r £250.
• Caiff ceisiadau eu hadolygu ar sail dreigl.
• Os hoffech drafod eich syniadau, rydym yn hapus i'ch helpu i'w datblygu - cysylltwch â ni ar [email protected]. 

Proses ymgeisio a gwerthuso

• Er mwyn bod yn gymwys i gael cyllid, rhaid i chi fod yn aelod staff neu'n fyfyriwr presennol o fewn PDC.
• Gellir defnyddio cyllid ar gyfer mentrau neu brosiectau ar draws holl gampysau Prifysgol De Cymru.
• Bydd y tîm Cynaliadwyedd yn ystyried ceisiadau i ddechrau ac yna'n cael eu cyflwyno i'w trafod yng nghyfarfodydd chwarterol y Pwyllgor Cynaliadwyedd. Bydd pob penderfyniad yn cael ei gyfleu i chi drwy'r e-bost a ddarperir.  
• Danfonwch ffurflenni cais atom ni ar ôl i chi orffen.
• Rhaid gwario'r holl gyllid o fewn 3 mis i hysbysiad o'r penderfyniad ariannu. Bydd unrhyw arian sy'n weddill a heb cael ei wario yn cael ei hawlio'n ôl ar ôl y cyfnod hwn.
• Yn dilyn cwblhau'r prosiect neu'r fenter yn llwyddiannus, bydd gofyn i ymgeiswyr ysgrifennu paragraff byr am eu prosiect, sut y cyfrannodd at gynaliadwyedd PDC a rhoi lluniau i ni y gallwn eu defnyddio.
• Byddwn yn cynnwys crynodeb byr o'r holl brosiectau/mentrau a gwblhawyd drwy'r Gronfa Gynaliadwyedd yn ein cyfathrebiadau a'n hadroddiadau blynyddol.
• Byddwn yn ystyried ariannu pob math o brosiectau gan gynnwys bioamrywiaeth, defnydd ynni/dŵr, lleihau gwastraff, addysg ac ymwybyddiaeth, teithio cynaliadwy, offer a newid ymddygiadau cyn belled â'u bod yn cyfrannu at gynaliadwyedd o fewn ein campysau neu gymuned y Brifysgol.

Mae'r Brifysgol yn annog Lleisiau’r Myfyrwyr. Dangosir hyn mewn nifer o ffyrdd gan gynnwys cynrychiolaeth myfyrwyr ar bwyllgorau'r Brifysgol ac ymhlith ein Hyrwyddwyr Cynaliadwyedd.

Mae gennym gynrychiolaeth myfyrwyr ar Fwrdd y Llywodraethwyr ar hyn o bryd, sef ein hawdurdod llywodraethu. Mae gan y Corff Llywodraethu gyfrifoldeb cynllunio a strategol a bydd yn derbyn ac yn cymeradwyo llawer o benderfyniadau hollbwysig ynghylch cyllid ag ystadau. Mae gan Bwyllgor Adnoddau Dynol y Bwrdd aelod sy’n fyfyriwr hefyd, ac mae ein Bwrdd Academaidd yn cynnwys dau fyfyriwr. Mae myfyrwyr yn chwarae rhan ac yn cymryd rhan bwysig wrth wneud penderfyniadau allweddol ledled y Brifysgol, ac mae’r penderfyniadau hynny’n cael effaith uniongyrchol ar ein taith tuag at ddyfodol cynaliadwy.

Rydym hefyd yn ymgysylltu’n barhaus â’n myfyrwyr drwy wythnos creu newid Undeb y Myfyrwyr lle mae cyfleoedd i gymryd rhan.