Mae gyrfa mewn ceiropracteg yn cynnig posibiliadau di-rif

Mae Daniel Morgan o Bort Talbot, sy’n fyfyriwr Meistr graddedig mewn Ceiropracteg, yn gweithio gydag athletwyr elît, ac mewn clinigau preifat ym Mhort Talbot ac Abertawe.

Mae hefyd yn cyfrannu at brosiectau ymchwil a gynhelir gan Sefydliad Ceiropracteg Cymru a’r Uned Ymchwil Technoleg a Diagnosteg Glinigol.

"Roedd fy mhrofiadau ar radd ceiropracteg Prifysgol De Cymru yn gadarnhaol o’r dechrau i’r diwedd. Fe wnes i fwynhau fy mhrofiadau a datblygu cyfeillgarwch sy’n debygol o bara am oes.

Yr hyn wnaeth yr argraff fwyaf arnaf oedd parodrwydd y staff i fynd yr ail filltir i helpu eu myfyrwyr. Roedd y darlithwyr bob amser yn barod i helpu ac ymateb yn gyflym i negeseuon e-bost ac ymholiadau, ac roeddent yn frwdfrydig, yn brydlon ac yn benderfynol o gael y gorau ohonom

Roedd y lleoliadau clinigol yn amhrisiadwy. Roedd y lleoliad yn Ysbyty’r Tywysog Siarl ym Merthyr yn ddiddorol dros ben. Cawsom y cyfle i ymuno ag un o brif lawfeddygon orthopedig y glun a’r traed ar ei rowndiau, gweld llawdriniaeth yn y Theatr Llawdriniaethau a thrafod y cluniau roedd yn eu newid, llawdriniaethau ac esblygiad yr offer llawfeddygol.

Roedd y labordy cyrff marw hefyd yn brofiad na fyddaf byth yn ei anghofio, am y rhesymau cywir i gyd! Roedd hwn yn gyfle gwych i weld a theimlo anatomeg ddynol ar ei ffurf fwyaf pur. Cawsom ein holi am wahanol rannau o’r corff, gan gynnwys y fraich, y goes, yn ogystal â’r pen a’r gwddf – dyma ddysgu ymarferol ar ei orau.

Fe wnaeth y cwrs ceiropracteg hefyd danio fy niddordeb mewn ymchwil. Doeddwn i erioed wedi dychmygu fy hun yn gwneud gwaith ymchwil, ond pan ddaeth y cyfle ym mlwyddyn tri, sylweddolais fy mod yn ei fwynhau.

Oherwydd hyn, rydw i wedi bod yn ddigon ffodus i weithio ochr yn ochr â champwyr proffesiynol elît yn Academi Clwb Pêl-droed Dinas Abertawe a mynd ymlaen i wneud fy MSc Meddygaeth Chwaraeon ac Ymarfer Corff. Rydw i wrthi’n cwblhau’r cymhwyster Ymarferydd Ceiropracteg Chwaraeon wedi’i Ardystio’n Rhyngwladol (ICCSP) a fydd, os caf fy newis, yn caniatáu i mi drin athletwyr yn y gemau Olympaidd yn 2020.

Mae ceiropracteg yn yrfa sy’n cynnig posibiliadau di-rif. Os ydych chi’n ymddiddori mewn paediatreg ac obstetreg, chwaraeon elît, neu hyd yn oed reoli poen cronig, mae Ceiropracteg yn cynnig llwybrau i helpu a thrin pobl sydd ag amrywiaeth eang o broblemau.

Fel ceiropractydd, y wobr fwyaf yw gweld cleifion yn ymateb i ofal. Does dim teimlad gwell na chywiro problemau tymor hir neu dymor byr cleifion a gweld yr effaith y mae hynny’n ei gael ar eu bywydau.”