Onesta

Dywedodd Olivia: “O’r cychwyn, fe’i gwnaed yn glir iawn yn y briff bod angen i'r legins hyn fod yn ymarferol ac yn wydn, sy’n rhywbeth y gwnaeth Bethan a minnau ei ystyried drwy gydol y broses ddylunio. Roeddwn i wedi darllen erthygl ar yr holl bethau anhygoel hyn a oedd wedi deillio o Gymru, a roddodd y syniad i mi fod ein gwlad yn fach ond yn nerthol.”

Ychwanegodd Bethan: “Roedd gan Olivia a minnau gysyniadau tebyg iawn. Roedd fy ngwaith yn ymwneud â symbolau pŵer Cymreig, a bod yn falch o’n Cymreictod, ochr yn ochr â phwysigrwydd cynhyrchu cynaliadwy. Felly, fe wnaethom ni uno’r syniadau er mwyn creu rhywbeth cyfoes iawn, ac rydym ni’n falch iawn o hynny. Roedd cael y cyfle i weithio ar y prosiect hwn gyda Thîm Cymru yn gyfle cyffrous i mi, ac yn rhywbeth sy’n alinio â’m gwerthoedd fel unigolyn ac fel dylunydd.” 

Dywedodd Gabriella Diana, perchennog a sylfaenydd Onesta: “Rydym ni’n falch o fod wedi cael ein dewis fel y gweithgynhyrchwr legins ar gyfer Tîm Cymru, sydd wedi’u dylunio ar y cyd â myfyrwyr Prifysgol De Cymru. Nid yn unig yw gweithgynhyrchu yng Nghymru yn lleihau ôl troed carbon ein dillad, ond mae hefyd yn rhoi arian yn ôl i’r economi leol, gan gryfhau diwydiant yma yn y DU, a darparu swyddi medrus i bobl leol a graddedigion. Ar ben hynny, rydym ni’n gwybod bod ein holl ddillad yn cael eu gwneud gan ddwylo hapus. Mae gweithio ar y prosiect hwn gyda Thîm Cymru wedi bod yn gyffrous iawn, ac rydym wedi bod wrth ein bodd yn datblygu dillad chwaraeon cynaliadwy ar gyfer Gemau'r Gymanwlad.”

Ychwanegodd Cathy Williams, Pennaeth Ymgysylltu Gemau’r Gymanwlad Cymru: “Mae’r bartneriaeth rhwng Gemau’r Gymanwlad Cymru a Phrifysgol De Cymru wedi dod yn gryfach ac yn gryfach dros y blynyddoedd diwethaf, ac mae’n wych ein bod unwaith eto’n gallu denu unigolion ifanc a thalentog fel Bethan ac Olivia i greu rhywbeth arbennig i’r tîm. 

“Fe wnaethom gynnal y gystadleuaeth hon gyntaf gyda Phrifysgol De Cymru ar gyfer Gemau Arfordir Aur 2018, ac rydym ni wedi adeiladu ar y llwyddiant hwnnw, ac rydym ni wrth ein bodd yn gweld yr athletwyr yn gwisgo’r dyluniad gorffenedig.” 

Dywedodd Chris Jenkins, Prif Swyddog Gweithredol Gemau’r Gymanwlad Cymru: “Mae gweithio ochr yn ochr â Phrifysgol De Cymru ar brosiectau o’r fath yn bwysig iawn i’r sefydliad; mae’n darparu llwyfan i ddylunwyr ifanc a myfyrwyr prifysgol gael ymdeimlad o’r diwydiant yn y byd ‘go iawn’, yn ogystal ag agor ein rhwydwaith cymorth i bobl na fyddent o reidrwydd yn cael eu denu i fyd chwaraeon. 

“Mae Gemau’r Gymanwlad yn fwy na digwyddiad chwaraeon – mae’n gyfle i ymgysylltu â chymunedau ledled y wlad a chefnogi Cymru ar lwyfan byd-eang. Llongyfarchiadau i’r ddau ddylunydd, a hoffwn ddiolch i Brifysgol De Cymru ac Onesta am eu holl waith caled.”