Cymorth ymchwil a datblygu technoleg am ddim ar gael i BBaChau Cymru

Mae busnesau bach ar draws ardaloedd mawr o Gymru yn cael cynnig cymorth gydag ymchwil a datblygu technoleg gan arbenigwyr ym Mhrifysgol De Cymru (PDC).

Mae CEMET - y Ganolfan Ragoriaeth mewn Technolegau Symudol a Datblygol, sydd wedi'i lleoli yn PDC - wedi llwyddo i sicrhau cyllid i gynnal prosiect a fydd yn cefnogi busnesau newydd, microgwmnïau, busnesau bach a chanolig, a mentrau cymdeithasol, drwy raglen bwrpasol 6-8 wythnos o hyd a ariennir yn llawn.

Mae'r cyllid ar gyfer y rhaglen wedi dod o Gronfa Ffyniant Gyffredin y DU (UKSPF), y mae CEMET wedi'i sicrhau gan nifer o awdurdodau lleol ledled Cymru, gan gynnwys Castell-nedd Port Talbot, Abertawe, Sir Gaerfyrddin, Powys, Caerffili, a Bro Morgannwg.

Dywedodd Clayton Jones, Rheolwr Rhaglen CEMET: "Rydym yn arbenigo mewn cefnogi busnesau a'r sector cyhoeddus i greu a mabwysiadu technoleg symudol a thechnoleg sy'n dod i'r amlwg trwy brosiectau ymchwil a datblygu cydweithredol.

"Bydd y rhaglen hon yn cynnwys prototeipio cyflym gan arwain at greu meddalwedd neu system galedwedd i brofi'r farchnad a sicrhau cyfleoedd grant a buddsoddi pellach.

"Bydd hyn yn galluogi busnesau i brofi twf a chynnig cyfleoedd cyflogaeth sgiliau uwch mewn ardaloedd lleol, a gellir ei ddefnyddio i archwilio technolegau sy'n dod i'r amlwg fel Realiti Rhithwir, Realiti Estynedig, Deallusrwydd Artiffisial, Dysgu Peirianyddol, a'r Rhyngrwyd Pethau (IoT)."

Mae'r prosiect hwn yn cael ei ariannu gan Lywodraeth y DU drwy Gronfa Ffyniant Gyffredin y DU. Nod hyn yw cefnogi polisi Ffyniant Bro Llywodraeth y DU drwy ganolbwyntio ar dair blaenoriaeth buddsoddi, sef cymunedau a lleoedd; cefnogi busnesau lleol; a phobl a sgiliau.

Am fwy o fanylion, ewch i https://www.cemet.wales/