PDC yn cefnogi rhaglen allgymorth seiberddiogelwch

Mae Prifysgol De Cymru (PDC) yn cefnogi prosiect sydd wedi derbyn mwy na £740,000 i helpu i ysbrydoli miloedd o blant ledled De-ddwyrain Cymru i ystyried gyrfaoedd mewn seiberddiogelwch.

Bydd y Ganolfan Ecsbloetio Ddigidol Genedlaethol (NDEC) yn defnyddio'r buddsoddiad gan Gymoedd Technoleg Llywodraeth Cymru i ehangu ei rhaglen allgymorth addysg seiberddiogelwch i 10,000 o ddysgwyr ledled y rhanbarth.

Mae NDEC yn darparu gweithgareddau rhyngweithiol ar fforenseg ddigidol, seiberdroseddu, a diogelwch rhyngrwyd i blant cynradd. Bydd y cyllid yn galluogi darpariaeth ddwyieithog, yn cyflwyno hyfforddiant newydd ar ddeallusrwydd artiffisial a chynaliadwyedd, ac yn helpu i fynd i'r afael â rhwystrau fel costau trafnidiaeth ac offer i ysgolion mewn ardaloedd difreintiedig.

Wedi'i chyflwyno gan Thales a PDC, mae'r rhaglen yn annog pobl ifanc i ddilyn addysg a gyrfaoedd mewn seiberddiogelwch a chyfrifiadura.

Mae'r rhaglen ehangach yn adeiladu ar lwyddiant y cam cyntaf, a gyrhaeddodd 216 o ysgolion a 20,000 o ddysgwyr ledled y rhanbarth.

Dywedodd yr Athro Jill Stewart, Deon Cyfadran Cyfrifiadura, Peirianneg a Gwyddoniaeth PDC, y bydd y cyllid ychwanegol yn gwella ymdrechion y Brifysgol i ennyn diddordeb mwy o bobl ifanc yn y sector seiber.

"Mae'n wych gallu cefnogi NDEC yn ei hymdrechion i dynnu sylw at y gwaith sy'n digwydd yn y sector seiber, a llunio cynnwys Cymraeg i gynnig mynediad i hyd yn oed mwy o bobl ifanc at adnoddau seiber," meddai'r Athro Stewart.

"Mae dadansoddiad o’r diwydiant wedi awgrymu bod prinder o fwy na 90,000 o weithwyr seiberddiogelwch proffesiynol yn bodoli ar hyn o bryd, felly mae galw gwirioneddol am bobl sydd â'r sgiliau i wneud y swyddi hyn.

"Mae ennyn diddordeb pobl ifanc yn swyddi'r dyfodol yn rhan allweddol o'n rôl ni fel Prifysgol flaengar, felly rydyn ni’n falch iawn o ychwanegu ein harbenigedd at gynlluniau fel y fenter Cymoedd Technoleg."

Dywedodd arweinydd hyfforddi NDEC, Lisa Cornford: "Rydyn ni’n hynod falch fod NDEC yn parhau i godi dyheadau ledled De-ddwyrain Cymru, gan helpu pobl ifanc i gredu yn yr hyn y gallan nhw ei gyflawni. Mae'r rhaglen ehangach hon yn caniatáu i ni gyrraedd mwy o ddysgwyr, magu eu hyder, a chyflwyno cyfleoedd digidol nad oeddent efallai wedi'u hystyried o'r blaen."

Dywedodd Ysgrifennydd y Cabinet dros yr Economi, Rebecca Evans: "Bydd y sgiliau hanfodol hyn yn helpu i gadw plant yn ddiogel ar-lein wrth agor y drysau i yrfaoedd gwerth chweil.

"Bydd ein buddsoddiad yn helpu i ysbrydoli mwy o fyfyrwyr, yn meithrin diddordeb cynnar mewn gyrfaoedd digidol, ac yn cefnogi datblygiad gweithlu seiber y dyfodol – ac rwy'n falch iawn ein bod ni nawr yn gallu cyflwyno'r rhaglen hon yn ddwyieithog."