PDC ar frig rhestr prifysgolion Cymru yn The Guardian University Guide 2027

Prifysgol De Cymru (PDC) sydd ar frig rhestr prifysgolion Cymru yn The Guardian University Guide 2027. Mae PDC wedi codi i safle 24 yn y DU (o blith 123 o brifysgolion), cynnydd o 19 safle ers y llynedd.

Pynciau sydd ar frig y tablau 

Yn y tablau pwnc, PDC sydd ar y brig drwy’r DU gyfan ar gyfer Marchnata a Chysylltiadau Cyhoeddus, a Bydwreigiaeth. Mae pedwar pwnc arall hefyd yn cyrraedd 10 uchaf y DU: Animeiddio a dylunio gemau (7fed), Peirianneg awyrofod (8fed), Nyrsio plant (8fed), a Proffesiynau iechyd (9fed).  

Mae nifer o feysydd pwnc hefyd yn 25 uchaf y DU – Ffasiwn a thecstilau (11eg), y Gyfraith (11eg), Nyrsio (11eg), Gwyddoniaeth fforensig (15fed), Addysg (18fed), a Seicoleg (25ain).  

Yng Nghymru, PDC sydd ar frig y tablau pwnc mewn Peirianneg Awyrofod, Animeiddio a dylunio gemau, Nyrsio plant, Addysg, y Gyfraith, Marchnata a chysylltiadau cyhoeddus, Bydwreigiaeth, a Nyrsio. 

Y safle uchaf erioed hyd yn hyn 

Mae'r Brifysgol hefyd yn safle rhif 23 yn y DU am 'wariant fesul myfyriwr', rhif 28 yn y DU ar gyfer myfyrwyr sy'n 'fodlon gyda’r asesu', ac yn safle rhif 33 yn y DU ar gyfer 'gwerth ychwanegol' – mesur o sut mae addysgu a chymorth y Brifysgol yn galluogi myfyrwyr i ragori ar eu perfformiad academaidd disgwyliedig yn ystod eu cyfnod gyda ni.

Dywedodd yr Athro Osama Khan, Is-Ganghellor PDC: "Rydyn ni wrth ein bodd bod y  Guardian wedi cydnabod PDC fel y brifysgol orau yng Nghymru, ac yn un o’r  25 o brifysgolion gorau’r DU, gan olygu ein bod yn y safle uchaf erioed yn y tablau hyd yn hyn. 

"Mae'r llwyddiant hwn yn adlewyrchu ymroddiad ac arbenigedd cydweithwyr ledled y Brifysgol, y mae eu hymrwymiad i roi profiad rhagorol i fyfyrwyr yn parhau i wneud gwir wahaniaeth. Mae hefyd yn adlewyrchu uchelgais a llwyddiant ein myfyrwyr, sydd wrth wraidd y cyfan a wnawn. 

"Mae'r Guardian University Guide yn rhoi pwyslais cryf ar brofiad myfyrwyr a chyflogadwyedd, gan olygu bod y gydnabyddiaeth hon yn arbennig o ystyrlon. Trwy ein dull unigryw o addysgu, rydyn ni’n arfogi myfyrwyr gyda'r wybodaeth, y sgiliau a'r profiad mewn diwydiant sydd eu hangen arnynt i lwyddo yn eu gyrfaoedd. Rydyn ni’n parhau i fod yn ymrwymedig i ddarparu dysgu arloesol sydd â chysylltiadau cryf â diwydiant ac sy'n helpu ein myfyrwyr i gyrraedd eu llawn botensial."