Mae'r cae pêl-droed 3G dan do maint llawn cyntaf yng Nghymru yn cael ei adeiladu yn Nhrefforest

Mae'r cyfleuster yn cael ei adeiladu ym Mhrifysgol De Cymru (PDC) fel rhan o fuddsoddiad parhaus yng nghyfleusterau'r sefydliad.

Bydd gwella Parc Chwaraeon PDC yn Nhrefforest yn cynnwys ychwanegu cae dan do 3G diweddaraf, sy'n cael ei adeiladu i safon FIFA Pro a safon Rygbi’r Byd 22, ochr yn ochr â chanolfan arbenigol ar gyfer cryfder a chyflyru, gyda 12 platfform codi, ystafelloedd newid, ystafelloedd addysgu a swyddfeydd. Bydd cyfanswm o 9500 troedfedd sgwâr o ofod ychwanegol.

Bydd dau gae pêl-droed a rygbi 3G awyr agored newydd wedi'u llifoleuo. Bydd hyn yn ychwanegu at y saith cae awyr agored arall sydd eisoes ar gael ar y safle, gan gynnwys cae pêl-droed pob tywydd maint llawn, cae hoci pob tywydd maint llawn â llifoleuadau, pedwar cae pêl-droed glaswellt a dau gae rygbi glaswellt, yn ogystal â neuadd chwaraeon â chwe chwrt.

Mae nifer o dimau rygbi proffesiynol eisoes wedi hyfforddi yn y Parc Chwaraeon, gan gynnwys Llewod Prydain ac Iwerddon, a thimau cenedlaethol Awstralia, Seland Newydd a De Affrica.

Mae'r cyfleuster, sy'n cael ei adeiladu gan Kier Construction ac a gynlluniwyd gan Atkins, i fod i gael ei gwblhau erbyn diwedd eleni.

Mae'r ffrâm ddur ar gyfer yr ystafelloedd addysgu a'r swyddfeydd eisoes ar waith, ynghyd â gwaith ar y ffrâm ddur ar gyfer yr ardal, a fydd yn gartref i'r cae 3G.

Dywedodd Dr Martin Steggall, Deon y Gyfadran Gwyddorau Bywyd ac Addysg,: “Bydd cyflwyno cyfleusterau o'r radd flaenaf ym Mharc Chwaraeon PDC nid yn unig o fudd i fyfyrwyr ar ein cyrsiau chwaraeon a'n myfyrwyr sy'n cynrychioli'r brifysgol mewn amrywiaeth o chwaraeon, ond hefyd yn adeiladu ar ymchwil sy'n arwain y sector mewn ffisioleg, cryfder a chyflyru, a seicoleg chwaraeon, i enwi ond rhai o'n cryfderau.

“Mae'r cyfleuster eisoes yn cael ei ddefnyddio'n dda gan y gymuned leol a thimau proffesiynol, ac mae hyn yn rhywbeth rydym yn gobeithio ehangu arno yn y dyfodol.

“Rydym nid yn unig yn buddsoddi mewn caeau, ond hefyd mewn cyfleusterau cryfder a chyflyru a dadansoddi a fydd yn cefnogi ein myfyrwyr i ddatblygu pob agwedd ar eu rhagoriaeth mewn chwaraeon.”

Dywedodd Jason Taylor, Cyfarwyddwr Gweithrediadau Kier Construction,: “Rydym yn falch iawn o fod yn bartner adeiladu o ddewis ar gyfer y datblygiad newydd ym Mharc Chwaraeon PDC yn Nhrefforest. Mae'n gyffrous bod yn rhan annatod o greu'r cae chwaraeon 3G maint llawn dan do cyntaf yng Nghymru, a fydd yn darparu llwyfan newydd ar gyfer talent gynyddol mewn chwaraeon yn y dyfodol.”

Bydd darpar fyfyrwyr ar gyfer ein cyrsiau Chwaraeon yn gallu gweld camau cynnar yr adeilad, a dysgu mwy am y cyfleusterau newydd, mewn ffair wybodaeth israddedig ac ôl-raddedig ddydd Mercher 29 Mawrth.

Mae'r ffair wybodaeth yn agored i bob myfyriwr sy'n bwriadu dechrau astudio cwrs yn y Brifysgol o fis Medi 2017, p'un ai ar sail amser llawn neu'n rhan-amser. Gallwch archebu eich lle yn y ffair wybodaeth drwy wefan y Brifysgol: https://www.southwales.ac.uk/cymraeg/diwrnodau-agored/