Sam Kwan

Yn wreiddiol, roeddwn i'n mynd i astudio pwnc mwy 'traddodiadol' fel y gyfraith, ond yna yn y coleg penderfynais fy mod i wir eisiau mynd i'r diwydiant celf. Rydw i wedi mwynhau chwarae gemau fideo ers tro, felly penderfynais beth am astudio pwnc yr wyf yn ei hoffi mewn gwirionedd? Fy hoff gemau yw Overwatch a Genshin Impact – gemau gyda mecanwaith, anturiaethau person cyntaf a thrydydd person a brwydrau.

Bywyd ym MhDC 

Dewisais astudio ym MhDC oherwydd mai dyma'r brifysgol orau y gallwn ddod o hyd iddi yn lleol. Doeddwn i ddim eisiau bod yn rhy bell i ffwrdd o gartref ac mae'r adolygiadau myfyrwyr yma yn dda iawn. Cefais adolygiad portffolio gyda Gina arweinydd y cwrs, a oedd yn anhygoel. Dywedodd bod fy ngwaith yn wych - roeddwn i'n hapus dros ben gyda hynny! Fe wnes i hefyd sesiwn flasu - sesiwn arlunio gyda Gina a'r grŵp cyfan a oedd yn ddiddorol. 

Roedd mynychu'r diwrnod hwnnw yn gwneud i mi deimlo'n fwy hyderus ac roedd yr athrawon yn neis iawn - roedd hynny'n bendant yn rhywbeth wnaeth werthu y cwrs i mi. 

Gwneud ffrindiau a dysgu sgiliau newydd 

Mae'r amgylchedd ym MhDC wedi bod yn wych. A dweud y gwir, roeddwn i'n eithaf nerfus i gwrdd â phobl newydd ac i fod mewn amgylchedd newydd, felly roeddwn i'n eithaf falch o ddod o hyd i bobl y gallwn siarad â nhw'n gyfforddus. Mae'r llyfrgell, yr athrawon a'r gefnogaeth rydw i wedi bod yn ei gael wedi bod yn wych hefyd. 

Rwyf hefyd wedi gweithio gyda myfyrwyr eraill ar y cwrs sydd wedi bod yn brofiad gwerth chweil iawn. Mae pawb yn fy ngrŵp wedi bod yn neis iawn ac rydyn ni'n helpu ein gilydd. 

Y modelu 3D yw fy hoff ran o'r cwrs hyd yn hyn. Rydyn ni'n dod at ddiwedd yr uned honno nawr ac rwy'n teimlo taw y canlyniad terfynol fydd y rhan orau. 

Rydym hefyd wedi cael y cyfle i brofi'r ddinas, cerdded i lefydd fel Bae Caerdydd a gwneud darluniau persbectif o adeiladau. 

Er mai dyma'r flwyddyn gyntaf, rwy'n gobeithio ceisio dod o hyd i brofiad gwaith neu brentisiaeth rhwng Mai a Medi, felly rwy'n meddwl gofyn i'n nhiwtoriaid os oes unrhyw gyfleoedd dros yr haf.

Fy nghyngor i bobl sy'n meddwl am astudio'r cwrs hwn yw: os ydych chi'n hoffi gemau, ewch amdani! Ac os nad ydych chi'n ei hoffi, gallwch chi bob amser gyfnewid cyrsiau oherwydd bod tebygrwydd â phynciau celf eraill fel Darlunio ac Animeiddio.