BETH I'W DDYSGU CYN IDDYNT ADAEL

Os yw'ch plentyn yn dechrau yn y brifysgol, efallai bydd y bwyd cartref yn dod i ben. Gall dysgu sut i goginio godi ofn, ond gallwch chi helpu eich plentyn i ddechrau arni – coginio gyda reis a phasta, coginio cig neu ddewisiadau eraill yn lle cig, creu sawsiau syml gan ddefnyddio tomatos wedi’u torri a sbeisys, a hyd yn oed berwi ŵy, bydd pob un o'r rhain yn ddefnyddiol! Mae'n bwysig meithrin ei hyder fel y gall ddechrau coginio prydau hawdd, coginio swp a rhoi cynnig ar opsiynau newydd. 

Mae llyfrau coginio, Google, a llwyfannau cyfryngau cymdeithasol fel Instagram, TikTok a Facebook i gyd yn lleoedd da i ddod o hyd i ryseitiau. Mae gan hyd yn oed y rhan fwyaf o archfarchnadoedd adrannau ar gyfer ryseitiau bob dydd ar eu gwefannau. Byddem hefyd yn argymell eich bod chi’n ysgrifennu eich ryseitiau rhad, hawdd eu gwneud, mewn llyfr fel y gall eich plentyn eu coginio nhw oddi cartref – p'un a yw’n rysáit Bolognese, ei hoff bryd tro-ffrio, neu fajitas. 

Mae'r hyn rydych chi'n ei ddysgu i'ch plentyn am olchi dillad yn dibynnu ar eich plentyn yn y pen draw – efallai y byddwch chi'n dewis dysgu eich plentyn sut i ddefnyddio capsiwlau golchi dillad dwy mewn un i wneud golchi'n haws. Fodd bynnag, efallai y byddwch chi hefyd yn dewis ei ddysgu am sut i olchi ar gyllideb, a chost-effeithiolrwydd powdr golchi a chyflyrydd. 

Byddem yn argymell eich bod chi’n dangos i’ch plentyn sut i wahanu dillad yn lliwiau tebyg a sut i ddefnyddio'r peiriant, sut i ddarllen y cyfarwyddiadau ar ei ddillad, a sut i ddefnyddio cynhyrchion fel tynnwr staen a thaflenni dal lliw. 

Os yw'ch plentyn yn aros mewn neuadd breswyl, gallai fod yn werth iddo ymweld â golchdy'r campws pan fydd yn symud i mewn, fel ei fod yn gwybod ble mae'r cyfleusterau a pha gyfleusterau sydd ar gael. 

O basta a llaeth i bapur toiled a gel cawod, gwnewch yn siŵr bod eich plentyn yn gwybod pa hanfodion y bydd angen iddo eu prynu'n rheolaidd a sut i flaenoriaethu ei siopa. Gwnewch yn siŵr bod gan eich plentyn ddisgwyliadau realistig wrth siopa drosto ei hun yn rheolaidd am y tro cyntaf. Mae hefyd yn amser gwych i rannu eich awgrymiadau gorau ar sut i arbed arian fel prynu cynhyrchion brand y siop dros enwau brand mawr neu brynu reis sych mewn swmp yn lle pecynnau microdon. 

Os yw’ch plentyn yn byw gydag eraill, gallai fod yn werth iddyn nhw archebu siopa gyda’i gilydd a threfnu iddo gael ei ddosbarthu i’w llety. Gall hyn weithio allan yn rhatach ac mae digon o archfarchnadoedd mawr o amgylch pob un o'r campysau. Wrth gwrs, mae hyn i gyd yn dibynnu ar eich plentyn a’r hyn sydd orau iddo. 

Mae'r rhan fwyaf o fyfyrwyr wrth eu bodd â bargen, boed yn chwilota am labeli melyn yn adran prisiau gostyngol yr archfarchnad neu gael pitsa am ddim. Gwnewch yn siŵr bod eich plentyn wedi cofrestru ar gyfer cerdyn TOTUM am £14.99 y flwyddyn neu £34.99 am dair blynedd. Mae cerdyn TOTUM, sydd wedi cael ei gyflwyno yn lle cerdyn ‘NUS Extra’, yn cynnig amrywiaeth o ddisgowntiau gwych i fyfyrwyr. 

Mae'r cerdyn, sef cerdyn swyddogol Undeb Cenedlaethol y Myfyrwyr, hefyd yn rhad ac am ddim gyda rhai cyfrifon myfyrwyr banciau. Gyda disgowntiau’n amrywio o gyn lleied â thua 5% i fyny at tua 70%, gall myfyrwyr ddod o hyd i fargeinion gyda llawer o frandiau mawr. 

Mae hefyd yn werth annog eich plentyn i gofrestru ar gyfer cardiau teyrngarwch am ddim gyda'i archfarchnadoedd lleol – fel Tesco Clubcard, Nectar Card Sainsbury's, neu ASDA rewards – er mwyn helpu i gael cynigion ac arian oddi ar rai o'i hoff eitemau.