Gweithio gyda Dyslecsia: Cysylltu Damcaniaeth, Asesu ac Ymarfer (AMBDA)
Mae'r cynllun cyswllt hwn wedi'i gynllunio ar gyfer gweithwyr proffesiynol sy'n dymuno gwneud cais i Gymdeithas Dyslecsia Prydain (BDA) ar gyfer Aelodaeth Gyswllt Cymdeithas Dyslecsia Prydain (AMBDA) a Thystysgrif Ymarfer Asesu (APC) sy'n dangos eu hyfedredd fel athro ac asesydd arbenigol ar gyfer dysgwyr ag Anawsterau Dysgu Penodol (SpLDs - Dyslecsia).
Mae rheoliadau'r Bwrdd Arholi ar y Cyd cyfredol yn cydnabod bod athrawon a chanddynt AMBDA ac APC yn gymwys i gynnal asesiadau o ddysgwyr sydd angen trefniadau mynediad arbennig mewn arholiadau fel SAT, TGAU, UG/Safon Uwch a'r Lwfans i Fyfyrwyr Anabl (DSA).
Anogir ceisiadau gan y rhai heb Statws Athro Cymwysedig, ond mae angen tystiolaeth o ddwy flynedd lawn amser (neu gyfwerth) o brofiad addysgu yn yr ystafell ddosbarth.
Manylion allweddol y cwrs
Lleoliad: Casnewydd/Gweithle’r Myfyrwyr
Hyd y Cwrs: Blwyddyn, rhan-amser
Dyddiad Dechrau: Mis Medi
Mwy am y cynllun
Mae cynnwys y cynllun yn cael ei lywodraethu gan feini prawf y BDA ar gyfer achrediad AMBDA ac mae'n cynnwys: Dulliau unigol o reoli'r rhai sydd ag anghenion penodol o ran anawsterau dysgu, llunio proffiliau/rhaglenni addysgu dysgwyr unigol, a chynnal Portffolios Ymarfer Addysgu proffesiynol a phersonol, datblygu gwybodaeth a dealltwriaeth o ddyslecsia, mathemateg a dyscalcwlia, cymhwyso dulliau addysgu amlsynhwyraidd, defnyddio TGCh/technoleg gynorthwyol yn effeithiol i gefnogi dysgu ac addysgu unigol, a goblygiadau cymdeithasol a seicolegol profi SpLD (dyslecsia).
Er mwyn llwyddo yn y cymhwyster, gyda chefnogaeth tiwtor, mae'n rhaid i fyfyrwyr gwblhau'n foddhaol: 30 awr o addysgu arbenigol ar eich pen eich hun gydag ystod o ddysgwyr dyslecsig, yn ogystal â phortffolio ymarfer addysgu a thri asesiad diagnostig ac adroddiadau.
Mae'r Rhaglen Gadarnhau ym Met Caerdydd yn cael ei haddysgu wyneb yn wyneb ar Gampws Llandaf ac mae'n cynnwys tri diwrnod a hanner a addysgir. Mae tair carfan ar gyfer y rhaglen hon fesul blwyddyn.
Mae'r Rhaglen Gadarnhau yn defnyddio dull dysgu cyfunol gan gynnwys diwrnodau a addysgir mewn prifysgol, cyfleoedd hyfforddiant seiliedig ar waith, cyfleoedd i arsylwi ymarfer yn uniongyrchol ac astudio a myfyrio hunangyfeiriedig.
Addysgir y Rhaglen gan ddefnyddio myrdd o strategaethau a dulliau addysgu a dysgu, i gynorthwyo a chefnogi dysgu'r gymuned amrywiol o fyfyrwyr sy'n oedolion, megis darlithoedd, ymarferion, astudiaethau achos, fideos, trafodaethau, ac ymarferion rhyngweithiol i hyrwyddo dysgu ymgeiswyr eu hunain.
Rhaid i fyfyrwyr ddangos gwybodaeth gadarn o arfer da wrth gefnogi dysgwyr â dyslecsia drwy gwblhau'r Cynllun Athrawon Cyswllt / Cynllun Gweithwyr Proffesiynol Cyswllt (dyslecsia) a dealltwriaeth eang o addysg gynhwysol, drwy astudio lefel 7. Rhaid iddynt hefyd fod yn weithgar wrth gefnogi dysgwyr â dyslecsia cyn dechrau'r cynllun.