Addysg a Hyfforddiant Ôl-Orfodol (PcET)

Sut byddwch chi’n dysgu

Byddwch yn dysgu trwy gyfuniad o weithgareddau dysgu cydweithredol, trafodaethau, dysgu rhyngweithiol a chyfleoedd lleoliad. Bydd eich ystafell ddosbarth yn cynnwys myfyrwyr o ystod eang o gefndiroedd ac arbenigeddau pwnc, gan eich galluogi i gyfuno egwyddorion pedagogaidd a phrofi cyfoeth o ddysgu gan gyfoedion fydd yn werthfawr iawn i chi ar leoliad.

Byddwch yn cael eich asesu mewn amrywiaeth o ffyrdd gan gynnwys arddangosfeydd rhyngweithiol ac arsylwadau o'ch addysgu. Mae asesiadau wedi'u seilio ar y syniad o roi theori ar waith ac felly’n efelychu’r hyn y byddech chi'n ei wneud yn naturiol fel athro. Mae holl gynnwys y cwrs wedi'i fapio i safonau proffesiynol yng Nghymru a Lloegr, fel eich bod mor barod â phosibl  ar gyfer y byd gwaith waeth ble rydych chi'n dewis ymgartrefu ar ôl graddio.  

Staff addysgu

Mae tîm addysgu Addysg a Hyfforddiant Ôl-orfodol i gyd yn brofiadol yn y maes hyfforddi athrawon, ac yn bobl a ddechreuodd eu gyrfaoedd fel athrawon mewn addysg Bellach, Addysg i Oedolion ac Addysg yn y Gymuned a/neu Uwchradd. Maen nhw’n dod o ystod eang o gefndiroedd o ran pynciau, gan gynnwys Mathemateg, Gwyddoniaeth, Celf, Cyfrifiadureg, Saesneg (ESOL a Llythrennedd Oedolion) a TGCh, ac mae ganddyn nhw amrywiaeth o ddiddordebau addysgu ac ymchwilio. Maen nhw’n rhan o rwydwaith sydd wedi'i gysylltu'n dda - ac yn mynychu seminarau a chynadleddau yn rheolaidd i gyflwyno ymchwil yn seiliedig ar AHO.  

Lleoliadau

Mae lleoliadau’n rhan hanfodol o'r cwrs hwn, yn digwydd ochr yn ochr â modiwlau craidd ac yn cyfrannu'n sylweddol at asesiadau. Ar gyfer y llwybr amser llawn, byddwch yn ymgymryd ag o leiaf 100 awr o addysgu, 30 awr o arsylwi, a 10 awr o ddyletswyddau adrannol, fel cyfarfodydd cynllunio ac asesu. Ar gyfer y llwybr rhan amser, bydd hyn yn cael ei rannu dros ddwy flynedd.

Bydd mentor yn cael ei aseinio i chi yn ystod eich lleoliad a byddwch yn cael eich arsylwi gan ein tîm addysgu, i’ch goruchwylio a’ch cefnogi. Yr un person fydd eich mentor drwy gydol cyfnod y lleoliad, gan eich galluogi i adeiladu perthynas a theimlo'n hyderus wrth ofyn am arweiniad a chyngor. Bydd lleoliadau’n cael eu haseinio i fyfyrwyr amser llawn gan ein tîm addysgu ar ôl trafod eich diddordebau a'ch arbenigedd. Dylai myfyrwyr rhan amser drefnu lleoliad yn eu maes neu ddiwydiant dewisol.

Cyfleusterau

Bydd elfen dysgu rhyngweithiol y cwrs hwn yn cael ei rhoi ar waith drwy efelychiadau ystafell ddosbarth ac addysgu efelychiadol, yn defnyddio Canolfan Efelychu Hydra. Mae Canolfan Efelychu Hydra yn darparu amgylchedd dysgu ac addysgu unigryw ac fe'i defnyddir i gynnal senarios ymdrochol, efelychiadol i'ch galluogi i ymarfer eich sgiliau mewn amgylchedd cydweithredol. Bydd cyfran fawr o'ch astudiaethau yn defnyddio'r llyfrgell a bydd gennych fynediad at ystafelloedd dosbarth a mannau dysgu y gellir eu harchebu trwy gydol eich amser ar y cwrs. 

I helpu i hwyluso eich astudiaethau, mae Llywodraeth Cymru yn cynnig cymhellion ariannol i fyfyrwyr sy'n awyddus i astudio ar gwrs AHO. Bydd ein tîm addysgu yn trafod hyn ac yn ei roi ar waith i chi os ydych chi'n gymwys.