Seicoleg (Trosi)

Sut y byddwch yn dysgu

Cyflwynir y cwrs gan ddefnyddio cymysgedd o sesiynau addysgu “byw” ar-lein a gweithgareddau i weithio drwyddynt ar eich cyflymder eich hun. Bydd y gweithgareddau hyn yn cynnwys fideos, darlleniadau, fforymau trafod ar-lein, cwisiau, a gweithgareddau myfyriol a rhyngweithiol wedi'u cynllunio i'ch helpu i gymhwyso'ch dysgu i gyd-destunau go iawn. 

Bydd gennych gyfanswm o chwe modiwl a addysgir, pob un yn cael ei addysgu mewn bloc o 10 wythnos. Mae myfyrwyr amser llawn yn cwblhau dau fodiwl a addysgir ym mhob bloc, tra bod myfyrwyr rhan-amser yn cwblhau un. Bydd hefyd sesiynau addysgu i'ch cefnogi gyda'ch traethawd hir a fydd yn rhedeg ochr yn ochr â modiwlau a addysgir. 

Mae asesiadau'n cynnwys briffiau byw a osodir gan bartneriaid allanol ac maent yn cynnwys cyflwyniadau ar-lein, adroddiadau, podlediadau, tudalennau gwe, posteri ac asesiadau astudiaethau achos - a gellir bwydo pob un ohonynt yn ôl i'r partneriaid i'w defnyddio yn eu gwaith eu hunain.

Staff addysgu

Cyflwynir y cwrs gan staff yn y tîm Seicoleg sydd â phrofiad addysgu, ymchwil a phrofiad ymarferol o weithio ar y cyd â’n partneriaid. Ar hyn o bryd mae’r tîm yn gweithio ar brosiectau sy’n canolbwyntio ar gymuned, natur a chynaliadwyedd, llesiant plant a phobl ifanc, llesiant a diwylliant yn y gweithle, a phrofiadau’r rhai ag anghenion dysgu ychwanegol neu anableddau. Mae ein tîm yn frwd dros ymarfer sy’n seiliedig ar dystiolaeth mewn gweithio mewn partneriaeth, addysgu a dysgu, ac yn cwblhau prosiectau ar brofiadau myfyrwyr o gwblhau asesiadau “briff byw” fel y rhai ar eich cwrs. 

Mae'r tîm addysgu hefyd yn cyfrannu at Podlediad Seicoleg PDC, gan gynnal trafodaethau difyr ar 'The Psych Sofa'. Mae'r penodau hyn yn amlygu sut mae seicoleg yn newid bywydau er gwell trwy lens academyddion seicoleg a'u gwaith.

Cyfleusterau

Fel myfyriwr ar-lein, bydd gennych chi amrywiaeth o gyfleusterau rhithwir ar gael i chi trwy gydol eich astudiaethau. Mae hyn yn cynnwys meddalwedd arbenigol fel Gorilla, ar gyfer dylunio a chynnal arbrofion Seicoleg, a Rhith-Amgylchedd Dysgu Blackboard (VLE) lle gallwch gael mynediad at ddeunyddiau dysgu a chydweithio â'ch cyfoedion. Tra bod y cwrs yn cael ei gyflwyno’n gyfan gwbl ar-lein, mae croeso i chi ymuno â gweithgareddau ar y campws a defnyddio set drawiadol o gyfleusterau’r adran Seicoleg, fel y labordy Niwroseicoleg, sy’n cynnwys monitorau EEG ac ECG a thraciwr llygaid. Mae'r tîm addysgu yn ymroddedig i greu cymuned ddysgu gymdeithasol gefnogol ar-lein ac yn annog myfyrwyr i gyfarfod a rhoi cynnig ar ddefnyddio'r cyfleusterau, er bod hyn yn gwbl ddewisol. 

Lleoliadau

Mae briffiau byw yn darparu ffordd hyblyg ac ymarferol o ennill profiad trwy gymhwyso'ch gwybodaeth i sefyllfaoedd yn y byd go iawn. Drwy gydol y cwrs, byddwch yn mynd i'r afael â briffiau byw a heriau a osodwyd gan ein partneriaid allanol, gan greu crynodebau ar draws y grŵp i lunio adroddiadau ac awgrymiadau da i'n partneriaid eu datblygu. Yn ein modiwl Cyd-destunau a Dadleuon, cewch gyfle i arddangos eich gwaith mewn cynhadledd ar-lein, gan gyflwyno ochr yn ochr â'ch cyd-fyfyrwyr a'n partneriaid. Mae ein partneriaid allanol yn dod o ystod amrywiol o sectorau, gan gynnwys nyrsio, natur a chynaliadwyedd a thai, gan ddefnyddio partneriaid fel Linc Cymru.