Beth i'w Ddisgwyl yn Eich Diwrnod Agored

Cofrestru

Mae eich Diwrnod Agored yn dechrau gyda’r broses gofrestru, felly mae'n bwysig cyrraedd mewn pryd i roi cyfle i chi'ch hun ymgartrefu cyn i'r sgyrsiau croeso ddechrau.

Ewch i'r ddesg gofrestru ar ôl cyrraedd. Byddwn yn sganio eich cod QR (fe welwch hwn yn eich e-bost cadarnhau) ac yn rhoi map o'r campws ac amserlen i chi er mwyn helpu i arwain eich diwrnod.

Mae'r rhan fwyaf o Ddiwrnodau Agored yn dechrau tua 9.30am ond darllenwch eich e-bost cadarnhau i weld eich union amser fel nad ydych chi'n colli dim.

Sgwrs groeso

Ar ôl i chi gofrestru a chael ychydig o amser i ymgartrefu, byddwch yn mynd draw i gael Sgwrs Groeso. Byddwch yn clywed gan ein staff am y brifysgol, bywyd myfyrwyr a'r cyfleoedd sy'n aros amdanoch chi yma.

Byddwch hefyd yn cael rhywfaint o gyngor ar sut i fanteisio i’r eithaf ar eich Diwrnod Agored, felly byddwch yn gadael yn teimlo'n barod i archwilio popeth sydd gan Brifysgol De Cymru i'w gynnig.

Sgwrs Pwnc

Un o rannau pwysicaf a mwyaf cyffrous y diwrnod yw archwilio eich maes pwnc.

Mae sgyrsiau pwnc neu sesiynau blasu yn rhoi cyfle i chi gwrdd â'r darlithwyr a allai fod yn eich dysgu, clywed mwy am yr hyn y byddwch chi'n ei ddysgu ar y cwrs a hyd yn oed gweld rhai o'r cyfleusterau a'r mannau y byddwch chi'n dysgu ynddynt. Bydd cyfle i chi ofyn unrhyw gwestiynau sydd gennych chi am fodiwlau, gyrfaoedd neu leoliadau hefyd. 

Sgyrsiau Bywyd Myfyrwyr a Chymorth

Ar ôl i chi orffen gwrando ar eich sgwrs pwnc – chi sy'n rheoli eich amser. Rydym yn cynnal sesiynau ar wahanol bynciau drwy gydol y dydd gan gynnwys:

• Ariannu eich Astudiaethau
• Llety PDC
• Cyflwyno cais llwyddiannus
• Cymraeg i Bawb

Fe welwch fanylion yr union amseroedd yn eich rhaglen. Mae'r sesiynau hyn yn gyfle gwych i ofyn cwestiynau a magu hyder ynghylch eich camau nesaf. 

Teithiau o amgylch ein Llety

Mae teithiau o amgylch ein llety wedi'u trefnu drwy gydol y prynhawn ac yn aml yn cael eu harwain gan ein llysgenhadon myfyrwyr, y mae llawer ohonynt wedi byw mewn neuaddau eu hunain, felly mae'n gyfle gwych i ofyn am gostau, ceisiadau, a sut beth yw bywyd o ddydd i ddydd.

Teithiau o’r Campws

Mae Diwrnodau Agored yn gyfle gwych i archwilio'r campws lle byddwch chi'n astudio. Mae pob sesiwn pwnc yn cynnwys taith o amgylch y cyfleusterau y byddwch chi'n eu defnyddio, ac mae ein llyfrgelloedd ar agor drwy gydol y dydd i chi alw heibio i grwydro.

Os ydych chi'n ymweld â Threfforest, bydd gennych chi hefyd ddewis i ymuno ag un o'n teithiau campws dan arweiniad myfyrwyr sy'n cael eu cynnal drwy gydol y prynhawn.

Ffair Wybodaeth y Diwrnod Agored

A hithau'n rhedeg drwy gydol y dydd, mae'r Ffair Wybodaeth yn siop un stop i gael cyngor. Bydd staff o wasanaethau allweddol wrth law i sgwrsio am y canlynol:

• Derbyniadau a cheisiadau
• Cyllid a chyllid myfyrwyr
• Cymorth lles ac anabledd
• Llety

Byddwch hefyd yn cael cyfle i gasglu llyfrynnau, canllawiau ac adnoddau ychwanegol i fynd adref gyda chi.

Undeb y Myfyrwyr

Ni fyddai unrhyw Ddiwrnod Agored yn gyflawn heb daro golwg ar Undeb y Myfyrwyr. Mae ganddynt gymaint i'w gynnig, a byddant wrth law i sgwrsio am glybiau, cymdeithasau, digwyddiadau cymdeithasol a mwy.

Crwydro’r ardal leol

Ar ôl i chi weld popeth ar y campws, beth am gymryd rywfaint o amser i grwydro'r ardal leol? Wedi'r cyfan, gallai’r lle fod yn gartref newydd i chi! Edrychwch ar gysylltiadau trafnidiaeth lleol, archfarchnadoedd, a hyd yn oed caffis neu gampfeydd - buan iawn y cewch flas ar awyrgylch y gymuned y gallech chi fod yn ymuno â hi.

Mae gan ein tudalennau lleoliad rai syniadau ar sut y gallech dreulio eich amser, felly gwnewch yn siŵr eich bod yn edrych arnynt am ysbrydoliaeth.