Gwerthoedd PDC

Ym Mhrifysgol De Cymru (PDC), mae gan bob un ohonom ran i’w chwarae wrth greu cymuned ddiogel, groesawgar a chefnogol.

Nid geiriau yn unig yw ein gwerthoedd. Maent yn llywio'r ffordd rydym yn trin ein gilydd yn cydweithio, ac yn sicrhau bod pawb yn teimlo eu bod yn cael eu parchu, eu cynnwys ac yn gallu llwyddo. Waeth beth fo'ch cefndir, eich profiad neu eich safbwynt, dylech deimlo eich bod yn cael eich gwerthfawrogi yn PDC.

Gofynnwn i bawb fod yn barchus, yn gyfrifol ac yn ystyriol ym mhopeth a wnânt. Gyda'n gilydd, gallwn greu amgylchedd cadarnhaol lle gall pob myfyriwr ac aelod o staff ffynnu.

 

Proffesiynol

Mae bod yn broffesiynol yn golygu cymryd cyfrifoldeb am eich ymddygiad a'ch gweithredoedd.

Triniwch bawb ag urddas, caredigrwydd a pharch. Cymerwch gyfrifoldeb am eich penderfyniadau, ymgysylltwch yn gadarnhaol â'ch astudiaethau, a helpwch i greu'r math o gymuned yr hoffech chi fod yn rhan ohoni.

Ysbrydoledig

Gallwch wneud gwahaniaeth i'r bobl o'ch cwmpas.

Trwy fod yn gefnogol, yn galonogol ac yn barchus, rydych chi'n helpu i greu profiad cadarnhaol i eraill. Gall gweithredoedd bach gael effaith fawr ac ysbrydoli'r rhai o'ch cwmpas i wneud yr un peth.

Creadigol

Rydym yn eich annog i fod yn agored i syniadau newydd a ffyrdd gwahanol o feddwl.

Mae bod yn greadigol yn golygu bod yn chwilfrydig, herio rhagdybiaethau, a chwilio am ffyrdd gwell o ddysgu, gweithio a byw gyda'n gilydd. Mae gan bob aelod o'n cymuned rywbeth gwerthfawr i'w gyfrannu.

Ymatebol

Rydym yn falch o'n cymuned amrywiol.

Mae bod yn ymatebol yn golygu cydnabod a gwerthfawrogi ein gwahaniaethau, gwrando ar eraill, a helpu i greu amgylchedd cynhwysol lle mae pawb yn teimlo’n groesawgar. Mae gennym oll gyfrifoldeb i herio ymddygiad amhriodol a chefnogi diwylliant o gydraddoldeb a pharch.

 

Cydweithredol

Mae llwyddiant yn digwydd pan fyddwn yn gweithio gyda’n gilydd.

Byddwch yn agored i rannu syniadau, dysgu gan eraill, a chefnogi eich cyd-fyfyrwyr a'ch cydweithwyr. Trwy gydweithio, gallwn gyflawni mwy fel unigolion ac fel cymuned.

 

Creu cymuned ddiogel a pharchus

Mae gan bawb yn PDC rôl i’w chwarae wrth greu amgylchedd diogel, parchus a chefnogol. Rydym yn disgwyl i bob aelod o'n cymuned:

  • Trin eraill gyda pharch a charedigrwydd
  • Ystyried sut mae eu gweithredoedd yn effeithio ar y rhai o'u cwmpas
  • Parchu ffiniau personol a dewisiadau unigol
  • Cymryd cyfrifoldeb am eu hymddygiad
  • Helpu i greu amgylchedd cynhwysol lle gall pawb lwyddo

Nid yw bwlio, aflonyddu, gwahaniaethu, digwyddiadau casineb, camymddwyn rhywiol, na thrais byth yn dderbyniol, boed ar-lein neu wyneb yn wyneb. Ni fydd yr ymddygiad hwn yn cael ei oddef yn PDC.

Gofalwch am eich gilydd

Gall bywyd prifysgol fod yn heriol ar adegau. Os ydych chi'n poeni am rywun, peidiwch â'i anwybyddu.

Gall cysylltu â ffrind, cynnig cefnogaeth, neu rannu pryder wneud gwahaniaeth gwirioneddol. Nid oes rhaid i chi ymdrin â sefyllfaoedd anodd ar eich pen eich hun. Mae gan PDC dimau arbenigol sydd yma i helpu.

Codwch eich llais

Os nad yw rhywbeth yn teimlo'n iawn, ymddiriedwch yn eich greddf.

P'un a ydych chi'n profi, yn dyst neu'n clywed am fwlio, aflonyddu, gwahaniaethu, ymddygiad amhriodol, neu bryder ynghylch diogelwch, rhowch wybod i ni. Byddwn yn gwrando, yn cymryd eich pryderon o ddifrif ac yn eich helpu i ddeall y cymorth sydd ar gael.

Gallwch gael mynediad at gymorth, canllawiau ac opsiynau adrodd trwy Adrodd a Chymorth, naill ai'n ddienw neu drwy ddarparu eich manylion cyswllt.

Siarter y Myfyrwyr

Cefnogir ein gwerthoedd gan Siarter y Myfyrwyr, sy'n amlinellu sut mae'r Brifysgol ac Undeb y Myfyrwyr yn cydweithio gyda’i gilydd i ddarparu profiad o ansawdd uchel i fyfyrwyr.

Mae'r Siarter yn egluro’r hyn y gallwch ei ddisgwyl gennym ni a’r hyn rydym ni'n ei ddisgwyl gennych chi, gan eich helpu i wneud y mwyaf o'ch amser yn PDC a chyflawni eich nodau personol ac academaidd.

Bod yn rhan o'r gymuned ehangach

P'un a ydych chi'n byw mewn neuaddau preswyl, llety preifat, neu'n lleol, mae bod yn rhan o gymuned PDC yn golygu bod yn ystyriol o eraill.

Mwynhewch eich profiad prifysgol, ond cofiwch y gallai fod gan eich cymdogion a’r rhai o’ch cwmpas ffyrdd gwahanol o fyw a chyfrifoldebau gwahanol.

Mae dangos parch ac ystyriaeth yn helpu i greu cymunedau cryfach i bawb.