Delwedd drawiadol myfyriwr Ffotograffiaeth Ddogfennol yn ennill cystadleuaeth Portrait of Britain

Mae Michael Tiedke, myfyriwr Ffotograffiaeth Ddogfennol trydedd flwyddyn ym Mhrifysgol De Cymru, wedi’i enwi’n enillydd cystadleuaeth Portrait of Britain 2025 y British Journal of Photography.

Mae ei bortread o’r artist a dylunydd creadigol, Temitope Ayobami Ogunseitan – sydd hefyd yn cael ei adnabod fel Tp4Style – ymhlith 100 o ddelweddau buddugol a ddewiswyd ar gyfer y gystadleuaeth eleni, sy’n dathlu gwytnwch, amrywiaeth, ac ysbryd pobl ledled y DU.

Mae Portrait of Britain yn cael ei redeg mewn partneriaeth â chwmni hysbysebu JCDecaux, sydd wedi arddangos y delweddau ar sgriniau digidol ar y stryd fawr, canolfannau siopa a chanolfannau trafnidiaeth, gan adlewyrchu treftadaeth gyfoethog Prydain fodern.

Tynnodd Michael y ddelwedd o Tp4Style yn ystod digwyddiad rhwydweithio yn y Sustainable Studios yng Nghaerdydd, gan ei ddisgrifio fel un ‘bywiog ac ysbrydoledig’. Meddai Michael: “Fe ddaliodd ei gyfuniadau lliw unigryw a’i synnwyr ffasiwn nodedig fy llygad ar unwaith, gan fy ysgogi i fynd ato am ffotograff.

“Buom yn sgwrsio am ei daith fel dylunydd creadigol a’i ymrwymiad i ddyrchafu ei gymuned drwy ffasiwn. Mae ei gysylltiad â lliw wedi'i wreiddio'n ddwfn yn ei dreftadaeth Affricanaidd, lle mae pob lliw yn cynrychioli hapusrwydd a gwytnwch."

“Dywedodd wrthyf pan fydd pobl yn ei weld, ei fod am i'w hymateb cyntaf fod yn wên; mewn byd lle mae ymwybyddiaeth iechyd meddwl o'r pwys mwyaf, mae am i'w arddull fod yn fath o therapi i'r rhai sy'n llywio eu brwydrau eu hunain.

“Wrth i ni gloi ein sgwrs, roedd yn amlwg i mi nad dylunydd yn unig yw Tp4Style; mae'n esiampl o bositifrwydd a gwydnwch. Mae ei daith yn dangos yr effaith y gall ffasiwn ei chael, nid yn unig ar fywydau unigol ond hefyd ar y gymuned ehangach. Trwy ei waith, mae’n ysbrydoli eraill i gofleidio eu harddulliau unigryw a defnyddio ffasiwn fel arf ar gyfer cysylltiad a newid.”

Cafodd prosiect Michael, a oedd yn rhan o gydweithrediad â Chyngor Dinas Caerdydd a’r Stiwdio Gynaliadwy, ei arddangos ym Mhafiliwn Butetown y llynedd.

Cafodd ei waith sylw hefyd yn yr Oriel Bortreadau Genedlaethol yn Llundain, diolch i brosiect partneriaeth rhwng yr oriel a PDC a welodd ddelweddau gan nifer o fyfyrwyr Ffotograffiaeth Ddogfennol yn cael eu harddangos mewn cyhoeddiad o'r enw Photo Portrait Now.

Cwrs Ffotograffiaeth Ddogfennol PDC yw’r unig radd o’i fath yn y DU i fod yn rhan o’r prosiect hwn, sy’n cefnogi myfyrwyr trwy fentora, gweithdai ymarferol, a chyfleoedd rhwydweithio gyda churaduron a ffotograffwyr proffesiynol.