Prifysgol De Cymru yn ymuno â chymuned Ymrwymiad y Technegwyr fyd-eang

Mae Prifysgol De Cymru wedi gwneud addewid ffurfiol i fynd i’r afael â heriau’r gweithlu y mae cydweithwyr technegol sy’n hanfodol i weithgareddau ymchwil ac addysgu yn eu hwynebu.   

Trwy arwyddo Ymrwymiad y Technegwyr a gydnabyddir yn rhyngwladol, mae Prifysgol De Cymru yn ymuno â chymuned o sefydliadau sy’n gwella gwelededd, cydnabyddiaeth, datblygiad gyrfa, a chynaliadwyedd hirdymor o weithwyr proffesiynol ym meysydd addysg uwch, ymchwil ac arloesedd.

Mae technegwyr ym Mhrifysgol De Cymru yn rhan annatod o ddull cyflenwi addysgu, ymchwil ac arloesedd neilltuol ar draws y Brifysgol.

Mae eu harbenigedd yn cwmpasu ystod eang o gyfleusterau arbenigol, o stiwdios podlediadau, ardaloedd sgrin werdd a chynhyrchu rhithwir, stiwdios drama, a labordai ffotograffiaeth, i gyfleusterau peirianneg o’r radd flaenaf yn yr adeilad Calon sydd newydd gael ei adeiladu, siediau awyrennau, labordai gwyddoniaeth a fforensig arbenigol, a Pharc Chwaraeon y Brifysgol.

Dywedodd yr Athro Martin Steggall, Dirprwy Is-ganghellor Dros Dro ym Mhrifysgol De Cymru: “Gan weithio mewn partneriaeth â chydweithwyr academaidd a myfyrwyr, mae technegwyr Prifysgol De Cymru yn galluogi dysgu ymarferol sy’n berthnasol i ddiwydiant, yn cefnogi ymchwil o safon fyd-eang, yn cynnal isadeiledd technegol cymhleth, ac yn helpu i baratoi graddedigion gan roi’r sgiliau a’r arbenigedd sy’n angenrheidiol ar gyfer eu gyrfaoedd yn y dyfodol.

“Trwy Ymrwymiad y Technegwyr, bydd Prifysgol De Cymru yn adeiladu ar y sylfaen gryf hon trwy wella gwelededd, cydnabyddiaeth, datblygiad gyrfa, a chynaliadwyedd o’i gweithlu technegol, gan sicrhau eu bod yn parhau i chwarae rôl ganolog o ran cyflawni uchelgeisiau strategol y Brifysgol.”

Mae Ymrwymiad y Technegwyr yn addewid i roi ar waith gynllun gweithredu hirdymor i wella gyrfaoedd, cyfleoedd, a sgiliau technegol yn y sefydliad.

Dywedodd Arweinydd Cysylltiol Ymrwymiad y Technegwyr, Simon Breeden: “Rydym yn rhoi croeso cynnes i Brifysgol De Cymru i gymuned Ymrwymiad y Technegwyr.

“Mae gweld prifysgol arall o Gymru yn ymuno â charfan gynyddol Ymrwymiad y Technegwyr yn gyffrous. 

“Edrychwn ymlaen at gefnogi taith y Brifysgol o ran gwella gwelededd a datblygiad gyrfa ei gweithlu technegol a rhannu mewnwelediadau gwerthfawr ar draws ein cymuned sy’n tyfu.” 

Ers cael ei lansio yn 2017, erbyn hyn mae wedi tyfu’n gymuned fyd-eang sy’n cynnwys dros 140 o sefydliadau sy’n hyrwyddo technegwyr a’u cyfraniadau at addysg uwch ac ymchwil. Cynhelir y fenter gan Sefydliad Sgiliau a Strategaeth Dechnegol y DU.