CYFLYMYDD ARLOESI CREADIGOL

Helpodd PDC i greu profiadau trochol arloesol, gan ddefnyddio realiti estynedig, realiti cymysg, a thechnolegau realiti rhithwir.  

Bu PDC yn gweithio gyda Tiny Rebel Games, Sugar Creative, a Potato i archwilio ac arloesi profiadau trochol blaengar, fel rhan o raglen Cynulleidfa’r Dyfodol. 

Roedd un o’r prosiectau hyn yn cynnwys gweithio gydag Aardman ar yr ap a phrofiad realiti estynedig y bu disgwyl mawr amdano, Wallace and Gromit yn The Big Fix Up. Mae’r profiad realiti estynedig aml-ddefnyddiwr hwn yn dod â’r cymeriadau’n fyw mewn ffordd hollol newydd, gan greu llwyfan newydd ar gyfer adrodd straeon. 

“Mae ein hymchwilwyr wedi cynnal profion defnyddwyr a gwerthuso cynnyrch, gan gynnal dosbarthiadau meistr gyda myfyrwyr i’n helpu i ddeall profiad y defnyddiwr ar gyfer technoleg realiti estynedig yn well.       

“Mae’n brosiect mawr, cyflym a chyffrous, a gyda’n cydweithwyr, rydyn ni’n creu arferion sy’n addas ar gyfer y dyfodol ar gyfer adrodd straeon aml-ddefnyddiwr sy’n golygu bod y gynulleidfa wrth wraidd popeth.” - Corrado Morgana, Rheolwr Academaidd Animeiddio a Gemau, PDC  

“Mae’n wych ein bod yn cwblhau ein rhestr o arddangoswyr i’r gynulleidfa gyda’r cydweithrediad hynod uchelgeisiol hwn.  

“Mae eu nod i chwyldroi gemau realiti estynedig, ynghyd â’r datblygiadau mewn Deallusrwydd Artiffisial, hapteg, rhyngweithio â chynulleidfa a thechnolegau cynhyrchu ffilm gan enillwyr ein cystadlaethau eraill, yn golygu y bydd y cyhoedd yn gallu rhoi cynnig ar brofiadau gwirioneddol arloesol.” - Yr Athro Andrew Chitty, Cyfarwyddwr Her UKRI ar gyfer Cynulleidfa’r Dyfodol 

Mae Academi Dysgu Dwys Trawsnewid Digidol yn helpu arweinwyr ym maes iechyd a gofal cymdeithasol i ddarparu gwasanaeth mwy effeithiol ac effeithlon i gleifion. 

Wedi’i hariannu’n rhannol gan Lywodraeth Cymru, mae’r Academi’n helpu ymarferwyr iechyd a gofal cymdeithasol i ddarparu prosiectau trawsnewidiol ym maes atebion digidol, archwilio technolegau newydd, a meithrin diwylliant o chwilfrydedd. Mae ystod o gyrsiau hyblyg wedi’u datblygu gyda Bwrdd Partneriaeth Rhanbarthol Powys, gan gynnwys cyfleoedd ôl-raddedig a doethuriaeth ym maes Arwain Trawsnewid Digidol. 

Y nod yw grymuso gweithluoedd drwy ddarparu’r arbenigedd, y sgiliau a’r hyder i yrru’r broses o ailgynllunio systemau iechyd a gofal er gwell. Bydd hyn yn gwella canlyniadau a phrofiadau cleifion, gan roi hwb i effeithlonrwydd a chynaliadwyedd gwasanaethau.  

Bydd cydweithio ar draws cyrsiau yn annog arloesedd a chydweithrediad. Bydd hyn yn galluogi’r broses o gyd-ddatblygu sgiliau a phartneriaethau gwerthfawr i gefnogi iechyd a gofal cymdeithasol trawsnewidiol.

“Dylai anelu am newid trawsnewidiol fod yn sail i’n holl ymdrechion wrth ddatblygu ein gwasanaethau, ac mae arweinyddiaeth gref yn hanfodol er mwyn i ni wella profiadau i gleifion, clinigwyr, a’r cyhoedd yn ehangach. Bydd y rhaglen hon yn cefnogi ein harweinwyr i yrru trawsnewidiad digidol ac i fod yn sbardun ar gyfer arloesedd.” - Yr Athro Bob Hudson, Cyd-gyfarwyddwr yr Academi Dysgu Dwys, PDC  

“Mae gweithio’n ddigidol yn allweddol i ddarparu gwasanaethau yn y dyfodol, a bydd y gwaith cyffrous yma’n paratoi ein timau i arwain ar hyn.” - Y Cynghorydd Myfanwy Alexander, Cadeirydd, Bwrdd Partneriaeth Rhanbarthol Powys   

“Yr academïau pwrpasol yma yw’r cyntaf yn y byd, ac rydyn ni’n hynod falch fod Cymru yn arloesi mewn maes hyfforddi mor bwysig. Mae Arwain Trawsnewid Digidol yn mynd i fod yn faes twf sylweddol ym maes iechyd a gofal cymdeithasol, felly mae’n hanfodol bod arweinwyr y dyfodol yn datblygu’r sgiliau a’r wybodaeth hanfodol hon.” - Cari-Anne Quinn, Prif Swyddog Gweithredol, Hwb Gwyddorau Bywyd Cymru 

Mae partneriaeth unigryw rhwng Ysgol Ffilm a Theledu Cymru PDC a Chynghrair Sgrin Cymru yn darparu profiad gwerthfawr i’r genhedlaeth nesaf o wneuthurwyr ffilmiau. 

Mae graddedigion a myfyrwyr PDC wedi gweithio ar lawer o gynyrchiadau teledu blaenllaw yn Wolf Studios Caerdydd, gan gynnwys y cynhyrchiad uchel ei glod gan y BBC a HBO, His Dark Materials. 

Cafodd dros 40 o fyfyrwyr brofiadau cysgodi a chafodd 30 o fyfyrwyr eu cyflogi mewn swyddi gyda thâl ar y cynhyrchiad hwn. Mae 1,000 o fyfyrwyr eraill o Brifysgol De Cymru wedi cael budd o’r berthynas hon drwy deithiau o amgylch y stiwdios i gael gweld tu ôl i’r llenni a chwrdd â thimau cynhyrchu.  

“Rydyn ni wrth ein bodd, diolch i’n partneriaeth agos â Chynghrair Sgrin Cymru, ein bod yn gallu creu cymaint o gyfleoedd i’n myfyrwyr a’n graddedigion weithio ar brosiectau sgrin sy’n ennyn bri rhyngwladol. Mae gallu cefnogi cymaint o bobl ifanc dalentog, nawr ac yn y dyfodol, yn anrhydedd ac yn fraint.” - Tom Ware, Cyfarwyddwr Cynhyrchu a Pherfformio, PDC  

“Pan ddechreuais fy nghwrs gyntaf yr un nod a roddais i fy hunan oedd gweithio ar rywbeth rwy’n ei garu a chael fy enw yn y credydau. Tic, dw i wedi gwneud hynny!” - MJ Hygate, Myfyriwr Graddedig Animeiddio Cyfrifiadurol PDC, Animeiddiwr Rhag-Ddarlunio, His Dark Materials  

“Mae cael y berthynas hon â Phrifysgol De Cymru yn galluogi graddedigion a myfyrwyr i gael profiad ymarferol mewn amser real yma yn y stiwdio. Mae wedi creu llif o dalent newydd sy’n gallu cefnogi’r diwydiant cyfan, ac mae’n gam enfawr ymlaen i bob un ohonon ni.” - Allison Dowzell, Rheolwr Gyfarwyddwr, Cynghrair Sgrin Cymru 

Mae Consortiwm media.cymru, sy’n cynnwys PDC, yn brosiect gwerth £50 miliwn i ddatblygu clwstwr sy’n arwain y byd ar gyfer arloesi yn y cyfryngau ym Mhrifddinas-Ranbarth Caerdydd. 

Mae 24 o sefydliadau partner yn gweithio ym meysydd addysg, darlledu, technoleg, cynhyrchu cyfryngau ac arweinyddiaeth leol i ysgogi twf economaidd cynhwysol, cynaliadwy a £236 miliwn ychwanegol mewn Gwerth Ychwanegol Gros erbyn 2026. 

Gan ymateb i’r datblygiadau a wnaed ym maes cynhyrchu o bell a rhithiol yn ystod pandemig Covid-19, bydd media.cymru yn buddsoddi yn seilwaith digidol y Rhanbarth. Mae’n canolbwyntio ar dechnolegau sy’n dod i’r amlwg, gan gynyddu gallu busnesau bach i arloesi a mynd i’r afael ag anghenion sgiliau. 

Bydd cyfres o feysydd her a arweinir gan y diwydiant, gan gynnwys cynaliadwyedd, cynhyrchu dwyieithog, amrywiaeth a chynhwysiant, twristiaeth, a thechnoleg yn sicrhau bydd sector cyfryngau’r Rhanbarth yn fan profi ar gyfer cynnwys, dulliau gweithredu a fformatau newydd. 

Bydd ymchwilwyr o Brifysgol De Cymru a Phrifysgol Caerdydd yn rhannu eu harbenigedd i gefnogi ecosystem arloesi, gyda’r nod o fynd â 100 o gwmnïau o’r syniad cychwynnol i gynhyrchion a gwasanaethau cyfryngau newydd sy’n barod i’r farchnad. 

Mae PDC hefyd yn arwain strategaeth sgiliau gydgysylltiedig a arweinir gan ymchwil, gan gysylltu darparwyr hyfforddiant ag anghenion a seilwaith y diwydiant. Mae ffocws ar ddenu, datblygu a chadw talent i gefnogi fformatau a thechnolegau newydd. 

Roedd PDC yn rhan o Clwstwr – rhaglen bum mlynedd a greodd gynnyrch, gwasanaethau a phrofiadau newydd ar gyfer y sgrin. Roedd yn cynnwys prifysgolion, Llywodraeth Cymru, darlledwyr Cymru a busnesau’r diwydiant sgrin. Nod Clwstwr oedd rhoi arloesedd wrth wraidd cynyrchiadau’r cyfryngau yn y de, gan symud sector sgrîn ffyniannus Caerdydd o safle o gryfder i safle arweiniol. 

Gyda ffocws ar ddiwydiannau sgrin – cynhyrchu ffilm a theledu, a’u cadwyni cyflenwi – cydweithiodd academyddion o Brifysgol De Cymru, Prifysgol Caerdydd, a Phrifysgol Metropolitan Caerdydd i ddarparu ymchwil a helpodd y maes sydd eisoes yn ffynnu yn y de i gyrraedd ei lawn botensial. 

Roedd darlledwyr, busnesau a gweithwyr llawrydd yn gallu gwneud cais am gyllid i ddatblygu cynhyrchion, gwasanaethau a phrofiadau arloesol.  

Cynlluniwyd y mentrau ymchwil a datblygu hyn i ymateb i dechnolegau newidiol, patrymau defnydd sy’n newid a manteision cyfuno creadigrwydd a chydweithio. 

Creodd Clwstwr hefyd lwyfan i gwmnïau annibynnol, busnesau bach a chanolig eu maint, microfusnesau a gweithwyr llawrydd gystadlu â chwmnïau cyfryngau byd-eang, hynod integredig.