Cyflymydd Trosedd, Diogelwch A Chyfiawnder

Mae PDC yn cefnogi hyfforddiant swyddogion heddlu mewn sawl heddlu yng Nghymru a Lloegr.   

Ar ôl i’r Fframwaith Cymwysterau Addysg Plismona (PEQF) gael ei gyflwyno i broffesiynoli hyfforddiant swyddogion heddlu, PDC oedd y brifysgol gyntaf yn y Deyrnas Unedig i’w hyfforddiant ar gyfer cwnstabliaid heddlu graddedig gael ei ddilysu ac i fod â charfan o raddedigion drwy gydweithrediad gyda Heddlu Dyfed-Powys.   

Mae PDC hefyd yn rhedeg y Rhaglen Mynediad i Ddeiliaid Gradd (DHEP) a phrentisiaeth gradd broffesiynol dair blynedd (PDCA) gyda Heddlu Dyfnaint a Chernyw, Heddlu Dorset, Cwnstabliaeth Swydd Gaerloyw a Heddlu Wiltshire, gyda dros 1200 o swyddogion heddlu ledled Cymru a Lloegr. 

"Rwy'n falch o’r ffaith mai PDC yw'r unig brifysgol yn y DU ar hyn o bryd sydd wedi ffurfio partneriaeth â nifer o heddluoedd i ddarparu'r cymwysterau hynod bwysig hyn, ledled Cymru a Lloegr.

"Mae'r ddarpariaeth hon yn sefydlu PDC fel un o ddarparwyr prentisiaethau mwyaf a mwyaf blaenllaw’r wlad, gan roi'r Brifysgol o fewn chwartel uchaf Sefydliadau Addysg Uwch." - Yr Athro Peter Vaughan, Cyfarwyddwr Prosiectau Strategol mewn Plismona a Diogelwch, PDC

"Wrth i blismona dyfu'n fwy cymhleth ac wrth i'r galwadau ar ein gwasanaethau gynyddu, mae arnon ni angen pobl sydd â'r sgiliau a'r profiadau iawn i gwrdd â’r gofynion heriol hyn. Mae creu gweithlu amrywiol a chynhwysol yn hanfodol i gyflawni ein gweledigaeth plismona ar gyfer y dyfodol. Mae plismona'n yrfa werth chweil ac mae hwn yn gyfle gwych i ddilyn rôl amrywiol, tra'n cael eich hyfforddi a'ch cefnogi ar yr un pryd i ennill cymhwyster cydnabyddedig." - Julie Fielding, Prif Gwnstabl Cynorthwyol, Heddlu Dorset

Rhwydwaith rhagoriaeth dan arweiniad ymchwil yw EUCTER, sy’n cynnwys 14 o bartneriaid. Ei nod yw datblygu fformatau dysgu cyfunol blaengar sydd â pherthnasedd polisi cryf ym maes Gwrthderfysgaeth yr Undeb Ewropeaidd. Mae’r prosiect yn dod â thri maes addysgu ac ymchwil rhyng-gysylltiedig ynghyd: Cyfiawnder a materion cartref yr UE, gwrthderfysgaeth yr UE, a chysylltiadau allanol yr UE.

Mae amcanion EUCTER yn cynnwys archwilio a dadansoddi datblygiad ac arfer cydweithrediad gwrthderfysgaeth a diplomyddiaeth mewn gweithredoedd mewnol ac allanol yr UE. Ei nod yw cyfrannu at ddealltwriaeth newydd o rôl sefydliadau Ewropeaidd (Senedd Ewrop, y Comisiwn, y Cyngor) yng ngweithredoedd mewnol ac allanol yr UE drwy drefnu gweithdai a darparu cymorthdaliadau i ysgolheigion rhyngwladol ifanc. Mae hefyd yn gwneud hyn drwy drefnu modiwlau addysgu a digwyddiadau, a thrwy gyfrannu at gyhoeddiadau rhyngwladol, ac maent wedi creu map rhithwir o gydweithrediad gwrthderfysgaeth. 

"Mae hyn newid tirwedd ymchwil ar wrthderfysgaeth yr UE yn llwyr, ac yng Nghymru’n benodol. Rydym yn byw mewn byd sy'n newid, lle mae'r syniad o ddiogelwch yn newid drwy'r amser. Mae cyllid yn ein galluogi i ddatblygu ein gweithgareddau addysgu ac ymchwil rhyngddisgyblaethol a'n partneriaethau rhyngwladol ym meysydd diogelwch a phlismona ymhellach. Rydym hefyd yn cynllunio cyfres o ddigwyddiadau ymgysylltu â'r cyhoedd, fel y gallwn ledaenu'r wybodaeth a gynhyrchwn mor eang â phosibl." - Yr Athro Christian Kaunert, Cyfarwyddwr Canolfan Ragoriaeth Jean Monnet, a'r Ganolfan Ryngwladol ar gyfer Plismona a Diogelwch yn PDC

"Os ydym am edrych ar faterion diogelwch, mae angen i ni ystyried y darlun ehangach a sut mae'n llywio penderfyniadau llunwyr polisi a sefydliadau ledled y byd. Dyma'r unig ganolfan yn Ewrop a fydd yn mabwysiadu'r dull eang hwn ac mae'n briodol ei fod wedi'i leoli yma yn ne Cymru, lle mae gennym y cyfuniad angenrheidiol o brofiad mewn ystod eang o ddisgyblaethau a rhagoriaeth mewn ymchwil ac addysgu a fydd yn rhoi'r sylfaen i ni gyflawni'r gwaith hwn." - Yr Athro Sarah Leonard, Cyd-gyfarwyddwr Canolfan Ragoriaeth Jean Monnet ac Athro Diogelwch Rhyngwladol yn UWE Bryste

Mae PDC yn rhoi dyfodol arbenigedd seiber wrth wraidd popeth mae’n ei wneud.  

Mae’r Brifysgol yn cael ei chydnabod gan y Ganolfan Seiberddiogelwch Genedlaethol (NCSC) fel Canolfan Ragoriaeth Academaidd mewn Addysg Seiberddiogelwch. Mae PDC hefyd wedi cael ei galw’n Seiber Brifysgol y Flwyddyn bedair blynedd yn olynol.  

Gan weithio mewn partneriaeth â Llywodraeth Cymru a’r arweinydd byd-eang ym maes technoleg, Thales, mae PDC yn arwain y llinyn Addysg yn y Ganolfan Ecsbloetio Ddigidol Genedlaethol (NDEC) yng Nglynebwy – y cyfleuster ymchwil a datblygu cyntaf o’i fath yng Nghymru.  

Mae gan PDC berthynas wych â’r NSCS, ac fe gynhaliodd y Gystadleuaeth Merched CyberFirst gyntaf ar ei champws yng Nghasnewydd, a chydweithio’n agos gydag ysgolion i ddatblygu eu gweithgareddau seiberddiogelwch. Mae PDC hefyd yn darparu prosiect Ysbrydoliaeth Sgiliau Seiber i bobl ifanc 11-14 oed. Mae’r gweithgareddau hyn, ochr yn ochr ag ystod PDC o gyrsiau seiber a phrentisiaethau gradd, yn golygu ei bod yn cyfrannu’n sylweddol at y gwaith o gau’r bwlch sgiliau seiber.  

"Fel arweinydd cydnabyddedig yn y sector, mae PDC wedi ymrwymo at ddarparu cyfleoedd i'r genhedlaeth nesaf o weithwyr proffesiynol seiberddiogelwch, a all sicrhau y gall y diwydiant ddelio â'r heriau sy'n esblygu ac y bydd yn parhau i'w hwynebu." - Yr Athro Paul Harrison, Dirprwy Is-Ganghellor, PDC

"Mae gwaith yr NCSC gyda diwydiant yn chwarae rhan hanfodol wrth hyrwyddo gyrfaoedd seiberddiogelwch a helpu pobl ifanc i gael y profiad, y sgiliau a'r amlygiad sydd eu hangen arnynt i ragori yn y maes.

"Mae NDEC wedi bod yn bartner allweddol wrth hyrwyddo llwybrau gyrfa ac astudio seiberddiogelwch i fyfyrwyr yn ysgolion a cholegau Cymru, ac mae wedi cefnogi ein rhaglen Ysgolion CyberFirst ers ei lansio yn NDEC ym mis Chwefror 2020.

"Mae gallu'r Ganolfan i estyn allan i sector addysg Cymru wedi gwneud NDEC yn rhanddeiliad dibynadwy ac edrychwn ymlaen at ein cydweithrediad parhaus." - Chris Ensor, Dirprwy Gyfarwyddwr Twf Seiber, NCSC

Mae PDC a’r arbenigwyr menter realiti rhithwir o Gaerdydd, Immersity, wedi cytuno ar bartneriaeth a fydd yn golygu bod y dechnoleg yn cael ei defnyddio ar gyfer hyfforddiant addysg.  

Bydd system realiti rhithwir Immersity yn cael ei defnyddio gan fyfyrwyr sy’n gweithio tuag at gymwysterau fforensig a chynnal a chadw awyrennau i ddechrau. Wrth i’r dechnoleg gael ei hehangu ar draws y sefydliad, bydd myfyrwyr ar ystod ehangach o gyrsiau yn gallu defnyddio’r system.  

Mae PDC eisoes yn defnyddio systemau efelychu i gefnogi dysgu, yn enwedig yr Ystafelloedd Hydra. Mae hwn yn amgylchedd trochol ar gyfer senarios efelychiadol a ddefnyddir ar amrywiaeth o gyrsiau, gan gynnwys Gwyddorau’r Heddlu, Nyrsio, Gwaith Cymdeithasol, Iechyd y Cyhoedd, Busnes a Marchnata.

Mae gan PDC bartneriaeth ag Immersity, y gall eu harbenigedd technegol penodol greu cynnwys i’w ddefnyddio yn y byd rhithwir, y gellir ei syncio gydag arbenigedd academaidd a gwella’r profiad dysgu ac addysgu.  

"Bydd y dechnoleg drochi yn cefnogi ac yn gwella dysgu yn hytrach na disodli profiadau bywyd go iawn. Wedi i ni arddangos llwyddiant y prosiectau peilot hyn, byddwn yn ceisio ehangu'r berthynas a dechrau prosiectau mewn meysydd pwnc eraill." - Nathalie Czechowski, Prif Swyddog Gwybodaeth, PDC

"Pan darodd Covid-19, nid oedd bellach yn ymarferol cael grwpiau o fyfyrwyr mewn lle mor gaeëdig. Gwnaethom ail-greu amgylchedd tebyg ar ein platfform Realiti Rhithwir, a nawr bydd myfyrwyr yn cael cyfle i dderbyn yr hyfforddiant hwn unrhyw bryd, unrhyw le. Nawr ein bod wedi creu'r platfform RRh hwn, gallwn adeiladu unrhyw amgylchedd ynddo yn gyflym i barhau i dyfu, yn enwedig ym meysydd addysg a hyfforddiant. Does dim terfyn ar y ffyrdd y gellir defnyddio'r dechnoleg hon." - Hugh Sullivan, Prif Swyddog Gweithredol, Immersity

Mae’r ganolfan hon yn cynnal ymchwil gydweithredol gyda llywodraeth leol a chenedlaethol ac ar eu cyfer. Maent yn ymgysylltu ag ystod eang o arbenigwyr polisi ac ymarfer, ac maent wedi ennill cyllid ymchwil o ffynonellau cenedlaethol blaenllaw.

Mae gan yr ymchwilwyr arbenigeddau mewn dynladdiad a thrais, plismona, a chyfiawnder ieuenctid a pholisi ieuenctid.

Mae hefyd arbenigwyr yn y system garchardai a materion cysylltiedig fel profiannaeth, adsefydlu ac ailsefydlu troseddwyr, a phlant a theuluoedd troseddwyr. Mae’r Ganolfan hefyd yn ymchwilio i feysydd camddefnyddio sylweddau, troseddeg werdd, fyd-eang a thrawswladol, atal troseddau, cam-drin anifeiliaid, cyfiawnder anffurfiol, ac opsiynau amgen i erlyn a charcharu. Maent hefyd yn gweithio gyda’r Ganolfan Ryngwladol ar gyfer Plismona a Diogelwch, a’r Ganolfan Ymchwil Polisi Cymdeithasol. 

Darganfod mwy am y Ganolfan Troseddeg

Mae’r ganolfan hon yn cynnal ymchwil sy’n hysbysu llywodraethau’r Deyrnas Unedig a’r Undeb Ewropeaidd. Mae’n arbenigo mewn materion diogelwch allweddol fel terfysgaeth, trais gwleidyddol, seiberdroseddu, a throseddau cyfundrefnol trawswladol a rhyfela. Mae’r Ganolfan yn rhan o rwydweithiau ymchwil cenedlaethol a rhyngwladol, ac mae’n uchel ei pharch ymhlith sefydliadau ac asiantaethau Ewropeaidd, yn enwedig Europol.  

Mae gwaith y Ganolfan wedi’i rannu’n ddwy thema eang:  

• Ymchwil Terfysgaeth a Diogelwch sy’n cynnwys diogelwch rhyngwladol cyffuriau, masnachu mewn pobl, a geowleidyddiaeth.  
• Ymchwil Plismona sy’n canolbwyntio ar ganlyniadau ymchwil effeithiol i wella, nid yn unig gweithgareddau’r heddlu, ond darpariaeth gwasanaethau plismona ar gyfer y gymuned. 

Dysgwch fwy am y Ganolfan Ryngwladol Plismona a Diogelwch

Mae’r Grŵp Ymchwil Seiberddiogelwch yn ymwneud â diogelwch data, meddalwedd, cydrannau, cysylltiadau, systemau, pobl, sefydliadau a chymdeithas. Maen nhw’n rhoi pwyslais ar gysyniadau trawsbynciol fel dadansoddi fforensig, cyfrinachedd, uniondeb, argaeledd, risg, meddwl gwrthwynebol, a meddwl systemau.  

Mae eu hymchwil yn cael ei llywio gan berthnasau cryf gyda’r diwydiant, asiantaethau’r llywodraeth a’r byd academaidd wrth gyflawni ymchwil seiberddiogelwch gymwysiedig â ffocws gweithredol.

Mae gan y Grŵp Ymchwil Seiberddiogelwch ddiddordeb arbennig yn y rhyngchwarae rhwng ymwybyddiaeth sefyllfaol, rhwydweithiau cyfrifiadurol, fforenseg gyfrifiadurol a datblygiad mannau gwan.

Dysgwch fwy am y Grŵp Ymchwil Seiberddiogelwch

Mae’r ganolfan hon yn arwain ym maes dadansoddi polisi cymdeithasol a chyhoeddus. Mae’n cynnig meddwl ffres, tystiolaeth newydd, ac atebion arloesol i lunwyr polisi a gweithwyr proffesiynol. Mae hyn yn eu helpu gyda’r heriau maent yn eu hwynebu wrth sicrhau newid a gwelliant yn nhrefniadaeth a darpariaeth gwasanaethau cyhoeddus.

Mae cryfderau mewn ystod o feysydd polisi cymdeithasol a chyhoeddus, gan gynnwys llesiant; ymwneud a chyfranogiad dinasyddion; llywodraethu a chraffu; asesiadau canlyniadau a chydraddoldeb.

Mae’r Ganolfan wedi bod yn llwyddiannus wrth sicrhau grantiau allanol, gan gynnwys llywodraeth leol a rhanddeiliaid allanol eraill. Maen nhw’n cydweithio’n agos gyda’r maes cyfiawnder troseddol, plismona, terfysgaeth a diogelwch. 

Dysgwch fwy gan y Ganolfan Ymchwil Polisi Cymdeithasol

Mae ymchwil gwyddor fforensig yn cael ei gyrru gan ein cefndiroedd fel ymarferwyr – un ai yn gweithio gyda heddlu’r Deyrnas Unedig, darparwyr gwasanaethau fforensig, neu drwy’r byd academaidd. Mae yna ddiddordeb mewn prosiectau gwyddoniaeth gymhwysol sydd â chymwysiadau ymarferol mewn sefyllfaoedd gwaith achos fforensig.  Mae llawer o’r ymchwil yn seiliedig ar brosiectau ymchwil Meistr a Meistr drwy Ymchwil, yn aml mewn cydweithrediad â phartneriaid o’r diwydiant.

Mae ymchwil gyfredol yn canolbwyntio ar sawl maes o ddatblygu a defnyddio technegau ar gyfer dadansoddi tystiolaeth olion mân, tocsicoleg, a hylifau biolegol a DNA. Mae’r ymchwil amlddisgyblaethol yn cynnwys cydweithrediad eang gyda’r diwydiant, y byd academaidd a’r llywodraeth.