Francesca Saleh

Astudio Gwyddorau Meddygol yn PDC

Roeddwn i wrth fy modd gyda fy amser yn PDC! Roedd y cwrs yn anhygoel, ac roedd gen i fywyd myfyriwr gwych. Mae’r wybodaeth dwi wedi’i dysgu o’r cwrs wedi fy mharatoi gymaint ar gyfer fy astudiaeth yn yr Ysgol Feddygol, roedd y darlithwyr i gyd yn frwdfrydig ac yn addysgu deunydd y cwrs yn dda, ac roedd arweinydd y cwrs yn hynod o angerddol ac yn benderfynol o’n cefnogi a’n paratoi i roi’r cyfle gorau posib i ni gyda’n ceisiadau a’n cyfweliadau.  

Mae Gwyddorau Meddygol yn gwrs 3 blynedd o hyd, ac roedd hyn yn golygu fod gen i amser hir iawn i ddeall, dysgu a seilio fy anatomeg, ffisioleg a dechreuadau pathoffisioleg ar gyfer pan ddechreuais astudio Meddygaeth. Mae hyn wedi caniatáu i mi ganolbwyntio mwy o fy amser a’m hymdrechion ar sgiliau a galluoedd eraill sy’n ofynnol i fod yn feddyg, fel ymarfer cymryd hanes, archwiliadau corfforol a sgiliau clinigol, a gwella fy fformiwleiddiad o ddiagnosisau gwahaniaethol, opsiynau triniaeth a chynlluniau rheoli. 

Yn ystod fy mlwyddyn gyntaf yn astudio’r radd Gwyddorau Meddygol yn PDC, cefais leoliad wythnos o hyd gyda nyrsys ac yn fy ail flwyddyn, cefais leoliad wythnos o hyd gyda meddygon iau, y ddau yn Ysbyty Brenhinol Morganwg. Roedd y lleoliadau hyn yn caniatáu i mi gael dealltwriaeth o rolau nyrsys a meddygon ar ward ysbyty a sut maent yn gweithio gyda’i gilydd fel tîm i sicrhau’r gofal cleifion gorau. 

Fe wnaeth hefyd ganiatáu i mi ddeall pwysigrwydd timau amlddisgyblaethol a sut maent yn darparu gofal unigol gorau posib i gleifion. Roedd cael lleoliadau yn golygu fy mod yn gallu dechrau cymhwyso’r wybodaeth a ddysgais o ddarlithoedd mewn lleoliad meddygol yn ogystal ag adeiladu ar yr wybodaeth hon yn glinigol. Roeddwn hefyd yn ddigon ffodus i arsylwi llawdriniaeth i ailosod pen-glin cyflawn. Roedd y tîm llawfeddygol yn hapus iawn i fy nghael yn y theatr ac roedd y llawfeddyg arweiniol yn egluro’r llawdriniaeth wrth iddo ei gwneud, gan ddangos nodweddion anatomegol y pen-glin i mi, ac roedd yn hapus i ateb unrhyw gwestiynau oedd gen i drwy gydol y llawdriniaeth. 

Gwneud ffrindiau am oes a gwneud y mwyaf o gyfleusterau PDC

Manteisiais i’n llawn ar fy mywyd myfyriwr yn PDC. Roedd yr UM yn le gwych i fynd am gymaint o bethau, er enghraifft, i wylio’r Chwe Gwlad (dwi ddim hyd yn oed yn gefnogwr rygbi ond roeddwn i wrth fy modd â’r awyrgylch), cynhaliodd cymdeithasau lawer o ddigwyddiadau yn y neuadd a oedd yn wych i gwrdd â phobl newydd, lle i dreulio amser gyda ffrindiau fel seibiant o astudio, ac wrth gwrs y clwb lle gwnes i lwyth o ffrindiau dwi dal i gadw mewn cysylltiad â nhw nawr. 

Fel rhan o fy mlwyddyn olaf yn PDC, manteisiais ar y cyfle i ddod yn un o lywyddion y Gymdeithas Paratoad Meddygol ac roedd y cwrs yn gefnogol iawn wrth fy helpu i gydbwyso fy llwyth gwaith â rhedeg y gymdeithas. 

Mae campws Glyntaf yn darparu llawer o leoedd astudio da, mae ganddo lyfrgell helaeth gyda llyfrau a llenyddiaeth sy’n berthnasol i’r Gwyddorau Meddygol felly does dim angen i chi brynu eich gwerslyfrau eich hun i ddweud y gwir (oni bai eich bod chi eisiau eich copïau eich hun) ac mae ganddo ystafelloedd y gellir eu bwcio fel y gallwch eu defnyddio ar gyfer sesiynau astudio neu addysgu gyda ffrindiau (a wneir yn bennaf trwy’r Gymdeithas Paratoad Meddygol). Mae gan y campws hefyd labordai â chyfarpar da iawn lle datblygon ni set enfawr o sgiliau, felly os oes gennych ddiddordeb mewn mynd i mewn i ymchwil bydd hyn yn rhoi mantais wych i chi!