Ymarfer Adran Llawdriniaeth (YAL)

Nod y modiwl hwn yw cyflwyno egwyddorion llawfeddygaeth ac ymarfer llawfeddygol. Bydd myfyrwyr yn archwilio theori er mwyn dechrau, cynllunio, gweithredu a gwerthuso gofal llawfeddygol. 

Bydd myfyrwyr yn datblygu’r wybodaeth a’r sgiliau clinigol sy’n ofynnol i ymarfer yn ddiogel fel ymarferydd cylchredeg a llawfeddygol ar gyfer mân driniaethau llawfeddygol a thriniaethau llawfeddygol canolradd o fewn y tîm llawfeddygol ehangach.

Nod y modiwl hwn yw cyflwyno hanfodion ymarfer anesthetig ac ôl-anesthetig. Bydd yn galluogi myfyrwyr i hwyluso sefydlu anesthetig cyffredinol sylfaenol, rhwystrau lleol a niwroechelinol ochr yn ochr ag anesthetydd yn rhan o’r tîm amlddisgyblaethol.  

Bydd myfyrwyr hefyd yn cael eu cyflwyno i asesu cleifion, gan allu dehongli arwyddion a symptomau clinigol yn ystod eu taith amdriniaethol. 

Yn ystod y modiwl hwn, bydd myfyrwyr yn cael eu cyflwyno i ofal anesthetig ac ôl-anesthetig cleifion sy’n cael mân lawdriniaeth i lawdriniaeth ganolradd ac yn dechrau gwerthuso ymarfer yn y meysydd hyn.

Nod y modiwl hwn yw rhoi’r wybodaeth sylfaenol am anatomeg, ffisioleg a gwyddorau cymhwysol i fyfyrwyr sy’n ofynnol i fod yn Ymarferydd Adran Lawdriniaeth cymwys. Bydd myfyrwyr yn gallu adnabod ffurf a swyddogaethau prif systemau organau’r corff yn ogystal ag egwyddorion gwyddonol o fewn ymarfer amdriniaethol, gan gynnwys unedau SI, deddfau nwy a electrolawfeddygaeth.

Nod y modiwl hwn yw rhoi dealltwriaeth i fyfyrwyr o ofal cyfannol, cofleidiol y claf llawfeddygol. Bydd yn rhoi’r wybodaeth ddamcaniaethol ac ymarferol i fyfyrwyr i’w galluogi i gynllunio ar gyfer a thrin cleifion amdriniaethol yn effeithiol mewn modd cyfannol drwy gydol eu taith. Bydd y modiwl yn cyflwyno myfyrwyr i’r ddeddfwriaeth allweddol sy’n gysylltiedig â gofalu am gleifion o fewn y daith amdriniaethol.

Bydd y modiwl hwn yn archwilio’r cysyniad o iechyd a lles o fewn poblogaethau, cymunedau ac unigolion trwy archwilio effaith gwahaniaethau iechyd a chymdeithasol, annhegwch o ran cyfleoedd, amrywiaeth a hawliau dynol ar iechyd a lles a’r effaith ar y claf amdriniaethol a’r ymarferydd. Bydd myfyrwyr yn datblygu sgiliau ymchwil, arwain ac addysg cynnar trwy ddatblygu adnodd hybu iechyd ar gyfer cleifion neu staff sy’n ymdrin â materion yn ymwneud ag iechyd a lles corfforol a meddyliol ar lefel leol, genedlaethol neu fyd-eang.

Nod y modiwl hwn yw paratoi myfyrwyr i ymgymryd ag Ymarfer Adran Lawdriniaeth diogel ac effeithiol a chael dealltwriaeth gychwynnol o rôl yr Ymarferydd Adran Lawdriniaeth fel gweithiwr gofal iechyd proffesiynol. 

Nod y modiwl hwn yw datblygu egwyddorion llawfeddygaeth a gyflwynwyd yn flaenorol. Bydd myfyrwyr yn cymhwyso theori i ystod o arferion llawfeddygol a fydd yn caniatáu iddynt gynllunio a datblygu gofal ar gyfer llawdriniaethau canolradd a mawr, gan gynnwys llawdriniaethau brys.  

Bydd myfyrwyr yn dechrau datblygu sgiliau arwain yn yr amgylchedd amdriniaethol, gan reoli rhestrau theatrau ac ymgysylltu â deddfwriaeth a phrosesau mewn ymarfer amdriniaethol.

Nod y modiwl hwn yw annog myfyrwyr i weithio tuag at ymreolaeth mewn ymarfer anesthetig ac ôl-anesthetig.  

Bydd y modiwl yn caniatáu i fyfyrwyr gymhwyso gwybodaeth o fewn ymarfer anesthetig ac ôl-anesthetig er mwyn cynllunio a hwyluso gofal cleifion sy’n cael ystod o driniaethau canolradd i fawr o dan amrywiaeth o dechnegau anesthetig ac fel rhan o’r tîm amlddisgyblaethol.

Nod y modiwl yw datblygu dealltwriaeth flaenorol myfyrwyr o anatomeg a ffisioleg trwy archwilio datblygiad ffisioleg o enedigaeth i farwolaeth. Bydd myfyrwyr yn dysgu am newidiadau ffisiolegol beichiogrwydd, datblygiad y ffetws i oedolaeth a marwolaeth. 

Bydd y modiwl hwn hefyd yn datblygu dealltwriaeth myfyrwyr o ffarmacoleg, gan eu galluogi i werthuso’r defnydd o gyffuriau yn ystod gofal amdriniaethol.

Nod y modiwl hwn yw galluogi myfyrwyr i gasglu ffynonellau cadarn er mwyn gwerthuso ymarfer amdriniaethol. At hynny, mae’n ceisio llywio arfer gorau trwy ddadansoddi a chymhwyso ymchwil, archwiliadau, a gwerthusiadau gwasanaeth. 

Nod y modiwl hwn yw galluogi myfyrwyr i ddatblygu, gwerthuso a chymhwyso gwybodaeth am y materion proffesiynol, cyfreithiol, a moesegol sy’n berthnasol i Ymarfer Adran Lawdriniaeth.

Nod y modiwl hwn yw galluogi myfyrwyr i ddatblygu eu gwybodaeth, sgiliau, hyfedredd, a hyder ymhellach mewn Ymarfer Adran Lawdriniaeth diogel ac effeithiol.

Mae’r modiwl hwn yn datblygu rôl myfyrwyr ymhellach o lefelau 4 a 5 i ymarferydd ymreolaethol. Ar ôl y modiwl hwn, bydd myfyrwyr yn dangos y gallu i asesu, cynllunio, gweithredu a gwerthuso gofal yn llwyddiannus ar gyfer ystod gymhleth o achosion llawfeddygol dewisol a brys ac ar gyfer ystod amrywiol o grwpiau o gleifion a chydafiacheddau. Bydd myfyrwyr hefyd yn datblygu dealltwriaeth a gwerthfawrogiad o rôl wahanol y Cynorthwy-ydd Cyntaf Llawfeddygol a goblygiadau’r rôl hon i’w hymarfer proffesiynol.

Nod y modiwl hwn yw paratoi myfyrwyr i ddatblygu’r wybodaeth a’r sgiliau a gaffaelwyd ar lefelau 4 a 5 gan gymhwyso ymarfer anesthetig ac ôl-anesthetig yn y lleoliad gofal critigol. Bydd myfyrwyr yn archwilio lleoliadau gofal critigol modern a’u rôl bosibl mewn meysydd fel Adrannau Brys, Unedau Dibyniaeth Uchel, Unedau Gofal Critigol a Thimau Rheoli Poen.

Nod y modiwl hwn yw galluogi myfyrwyr i gefnogi ac arwain cydfyfyrwyr yn ystod eu lleoliad clinigol, gan hwyluso dysgu trwy wneud cysylltiadau rhwng theori ac ymarfer. Bydd myfyrwyr hefyd yn gallu cymhwyso gweithdrefnau asesu cymeradwy a rhoi adborth adeiladol yn seiliedig ar farn broffesiynol.

Nod y modiwl hwn yw datblygu sgiliau arwain a rheoli newid myfyrwyr a hwyluso’r newid o fyfyriwr i ymarferydd cofrestredig, trwy allu cymryd rhan yn y tîm amlddisgyblaethol yn yr amgylchedd amdriniaethol, ynghyd â’r angen cyson i newid a gwella er mwyn bodloni ei anghenion sy’n esblygu.

Nod y modiwl hwn yw datblygu myfyrwyr fel ymarferwyr ymreolaethol. Bydd myfyrwyr yn archwilio’r hyn mae’n ei olygu i fod yn weithiwr proffesiynol cofrestredig, gan eu paratoi ar gyfer gyrfa ym maes gofal iechyd.