Wedi Cael Cynnig Lleoliad neu Brofiad Gwaith

Cofrestru a Pharatoi

Os ydych chi wedi trefnu profiad gwaith, lleoliad, neu rôl wirfoddoli fel rhan o’ch cwrs, ymgynghorwch â’ch staff academaidd i sicrhau ei fod yn cyd-fynd â’ch nodau gyrfa. Byddant hefyd yn rhoi cyngor ar unrhyw weithdrefnau gofynnol, megis gwaith papur neu gymeradwyaeth ymlaen llaw, ac yn rhoi manylion am oruchwyliaeth.

Fel myfyriwr yn y brifysgol, byddwch yn parhau i dderbyn cymorth trwy gydol eich lleoliad. Cadwch lygad ar eich e-bost prifysgol am ddiweddariadau a negeseuon pwysig.

Lleoliad Rhyngosod - Gwnewch yn siwr eich bod wedi cofrestru ar eich blwyddyn ryngosod cyn i’r tymor ddechrau.

Lleoliad Rhyngosod a Lleoliadau Byr – Byddwch yn derbyn llawlyfr eich modiwl a manylion asesu gan eich cyswllt academaidd.

Ar gyfer lleoliadau yn Ffrainc neu Sbaen, gwnewch yn siwr eich bod yn cwblhau’r Cytundebau Interniaeth angenrheidiol. Ceir manylion ar ein tudalen Cyfleoedd Byd-eang.

Unwaith y byddwch yn dechrau eich profiad gwaith, lleoliad neu rôl wirfoddoli, cofiwch er eich bod yn gyflogedig gan y sefydliad cynnal, rydych dal yn fyfyriwr PDC. Mae gennych gyfrifoldeb i ymddwyn yn broffesiynol tuag at y brifysgol a’ch gwesteiwr lleoliad bob amser.

Ymddygiad

• Prydlondeb -  Cadwch at eich oriau gwaith cytunedig. Peidiwch â bod yn hwyr!
• Defnydd Ffôn – Cadwch y defnydd o ffôn at doriad neu amser cinio yn unig.
• Cod Gwisg – Gwisgwch yn briodol ar gyfer eich diwydiant neu rôl.
• Proffesiynoldeb – Cyfarch cydweithwyr a chwsmeriaid gyda pharch.
• Iaith y Corff – Dangoswch ymgysylltiad trwy gyswllt llygad da.
• Hyder – Ymddiried yn eich galluoedd a’ch sgiliau eich hun.

Cadw at Bolisïau

Dilynwch bolisïau’r sefydliad ar gyfrinachedd, eiddo deallusol, iechyd a diogelwch, a chyfryngau cymdeithasol.

Cyfrinachedd ac Eiddo Deallusol (IP)

Peidiwch â datgelu unrhyw wybodaeth gyfrinachol neu bersonol a dderbyniwyd yn ystod eich profiad gwaith, lleoliad, neu rôl wirfoddoli i drydydd partïon, yn ystod ac ar ôl eich lleoliad.

Yn gyffredinol, chi fel myfyriwr sy’n berchen ar yr hawliau i eiddo deallusol rydych yn eu creu yn amodol ar yr amodau a nodir ym mholisi Eiddo Deallusol Myfyrwyr PDC, ond efallai y bydd gan y cyflogwyr drwydded i’w ddefnyddio ar gyfer eu busnes. Mewn rhai achosion, gall y cyflogwr fod yn berchen ar yr IP, a byddwch yn cael gwybod am hyn cyn derbyn y lleoliad. Mae PDC yn cadw’r hawl i ddefnyddio’ch Eiddo Deallusol at ddibenion addysgol. Ar gyfer lleoliadau cyflogedig, efallai y byddwch yn ddarostyngedig i bolisi IP y cyflogwr oni bai y cytunir fel arall. 

Gwneud Cysylltiadau a Rhwydweithio

Gwnewch y mwyaf o bob cyfle yn ystod eich profiad gwaith, lleoliad neu rôl wirfoddoli i feithrin cysylltiadau â’r diwydiant a rhwydweithio â darpar gyflogwyr. Cysylltwch â nhw ar LinkedIn, ac os ydych yn postio am eich profiad ar gyfryngau cymdeithasol, cofiwch dagio #uswplacement.

Cofnodi

Cofnodwch eich profiadau a’ch sgiliau wrth fynd ymlaen. Nodwch eich cryfderau, gwendidau, a meysydd i’w datblygu. Cydiwch ar enghreifftiau o waith, ond gofynnwch am ganiatâd os ydych yn bwriadu eu defnyddio ar gyfer asesiadau.

Os bydd unrhyw faterion yn codi yn ystod eich profiad gwaith, lleoliad, neu rôl wirfoddoli, trafodwch nhw gyda’ch rheolwr llinell neu oruchwyliwr yn gyntaf. Os ydych chi’n anghyfforddus yn gwneud hynny, cysylltwch â’ch academydd am gyngor a chymorth.

Myfyrio

Ar ddiwedd eich profiad gwaith, lleoliad, neu rôl wirfoddoli, adolygwch eich nodiadau i amlygu cyflawniadau allweddol, eiliadau dysgu, a sgiliau a enillwyd. Diweddarwch eich CV a phroffil LinkedIn gyda’r wybodaeth hon.

Gwnewch yn siwr eich bod yn cwblhau unrhyw ffurflenni adborth neu ddogfennau asesu gofynnol cyn gadael.

Diolch a Geirdaon

Ar ôl eich profiad gwaith, lleoliad, neu rôl wirfoddoli, mae’n syniad da ysgrifennu nodyn diolch i’ch gwesteiwr a thrafod cael geirda. Mae cyflogwyr y dyfodol yn gwerthfawrogi geirdaon gwaith gan eu bod yn rhoi cipolwg ar eich cymeriad a’ch steil o weithio.