Cyfrifiadura, Seiberddiogelwch, Mathemateg a Gwybodeg

EFFAITH

Trwy ganolbwyntio ar gymwysiadau ymarferol yn y byd go iawn, rydyn ni’n datblygu datrysiadau datblygedig i fynd i'r afael â materion critigol, fel gwella diogelwch y cyhoedd, gwella canlyniadau gofal iechyd, a thrawsnewid diwydiannau drwy ddadansoddi data a mewnwelediadau sy'n cael eu gyrru gan AI. 

CYDWEITHREDIADAU A PHARTNERIAETHAU

Rydyn ni’n ffurfio partneriaethau ag ystod eang o ddiwydiannau i gynnig datrysiadau arloesol sy'n mynd i'r afael ag anghenion busnes, yn meithrin twf economaidd, ac yn cefnogi datblygiad sectorau allweddol. Trwy gydweithio â sefydliadau ar draws gofal iechyd, seiberddiogelwch, technolegau digidol a gweithgynhyrchu, rydyn ni’n sicrhau bod ein hymchwil yn cael effaith ddiriaethol. 

Mae'r partneriaethau hyn nid yn unig yn gwella ein galluoedd ymchwil ond hefyd yn cynnig cyfleoedd gwerthfawr ar gyfer cyfnewid gwybodaeth, trosglwyddo technoleg, a chyd-ddatblygu cynhyrchion a gwasanaethau arloesol sy'n gyrru datblygiadau mewn diwydiant.

• Bwrdd Iechyd Prifysgol Aneurin Bevan 
• Bwrdd Iechyd Prifysgol Caerdydd a'r Fro 
• Bwrdd Iechyd Prifysgol Cwm Taf Morgannwg 
• Cyber Wales 
• DVLA 
• Bwrdd Iechyd Addysgu Powys 
• Heddlu De Cymru 
• Chwaraeon Cymru 
• RCCU (Uned Seiberdroseddu Rhanbarthol) Tarian  
• Thales Ltd 
• Llywodraeth Cymru 
• Sefydliad Gwybodaeth Ddigidol Cymru (WIDI) 
• Goggleminds 

CYFLEUSTERAU

Academi Seiberddiogelwch Genedlaethol

Wedi'i lleoli ar Gampws Casnewydd, mae'r Academi Seiberddiogelwch Genedlaethol yn estyn dros ddau lawr sy'n canolbwyntio’n benodol ar addysg seiberddiogelwch ac ymchwil gymhwysol. Mae'r gofod wedi'i gynllunio i gefnogi prosiectau cydweithredol rhwng academia, diwydiant a llywodraeth.

Canolfan Gweithrediadau Diogel (SOC)

Mae'r Ganolfan Gweithrediadau Diogel yn cynnig amgylchedd rheoledig ar gyfer ymchwil ar weithrediadau diogelwch, gan adlewyrchu'r seilwaith a'r arferion a ddefnyddir mewn diwydiant. Mae'n galluogi astudiaethau ar ganfod bygythiadau, rheoli digwyddiadau a gwytnwch systemau.

Labordy Ymchwilio Digidol

Mae'r labordy hwn yn cynnig yr adnoddau sydd eu hangen ar gyfer ymchwil fforensig ddigidol, gan gynnwys offer a systemau tebyg i'r rhai a ddefnyddir gan ymarferwyr gorfodi'r gyfraith ac ymchwilwyr corfforaethol. Mae'n cefnogi astudiaethau adfer data, dadansoddi tystiolaeth, a thechnegau ymchwil seiberdroseddu. 

Tŷ Lleoliad Trosedd

Mae'r Tŷ Lleoliad Trosedd yn hwyluso ymchwil ar ddulliau fforensig mewn amgylcheddau trosedd wedi’u hefelychu. Mae senarios yn amrywio o fyrgleriaethau domestig i achosion cymhleth fel dynladdiadau a llosgi bwriadol, gan gynnig cyfleoedd i astudio prosesau casglu a dadansoddi tystiolaeth mewn amodau realistig. 

Ystafell Efelychu Hydra

Mae ystafell Hydra yn cefnogi ymchwil ar ymateb i ddigwyddiadau a gwneud penderfyniadau yn ystod ymosodiadau seiber. Mae'n galluogi efelychiadau rheoledig i ddadansoddi ymddygiad, gwerthuso strategaethau ymateb, a datblygu protocolau ar gyfer gwella gwytnwch sefydliadol.

Lab Rheoli Diwydiannol

Mae'r Lab Rheoli Diwydiannol yn galluogi profion cynhwysfawr o strategaethau seiber-lywodraethu a hacio mewn amgylcheddau ffatri wedi’u hefelychu. Mae'r cyfleuster ymarferol hwn yn cefnogi gwaith diwydiannol ymarferol trwy ail-greu senarios gweithredol o’r byd go iawn, gan ganiatáu i ymchwilwyr ac ymarferwyr fireinio mesurau diogelwch, nodi gwendidau, a gwella gwytnwch systemau. Trwy efelychiadau wedi'u targedu a gwerthusiadau trylwyr, mae'r lab yn annog arloesedd wrth amddiffyn gweithrediadau diwydiannol rhag bygythiadau seiber sy'n dod i'r amlwg. 

Addysgu sy'n seiliedig ar ymchwil

Yn PDC, mae addysgu a arweinir gan ymchwil yn integreiddio'r datblygiadau diweddaraf o'n hymchwil ein hunain i raddau cyfrifiadura, gan sicrhau bod myfyrwyr yn dod i gysylltiad uniongyrchol â gwaith arloesol mewn deallusrwydd artiffisial (AI), datblygu meddalwedd, a seiberddiogelwch. Mae'r dull hwn yn cysylltu myfyrwyr â'r ymchwil orau sy'n cael ei chynnal gan ein hymchwilwyr, gan roi gwybodaeth arloesol a chymwysiadau ymarferol iddynt sy'n uniongyrchol berthnasol i'w gyrfaoedd yn y dyfodol. 

Yn yr MSc Deallusrwydd Artiffisial, mae myfyrwyr yn astudio modiwlau ar ddysgu peirianyddol a dysgu dwfn, wedi'u llywio gan ein hymchwil ar ganfod twyll deallus, diagnosis canser, a chrynhoi a chynhyrchu testun. Yn y BSc Seiberddiogelwch Cymhwysol, mae myfyrwyr yn dysgu am ddiogelwch rhwydwaith ac asesiadau bregusrwydd RhP, wedi’u cysylltu â'n hymchwil barhaus mewn systemau adnabod gwasanaethau cwmwl a darganfod tresmasu. Mae labordai ymarferol sy'n defnyddio setiau data a heriau diogelwch o’r byd go iawn yn caniatáu i fyfyrwyr gymhwyso'r ymchwil hon i sefyllfaoedd ymarferol. 

Trwy gysylltu myfyrwyr â'n hymchwil, maen nhw’n ennill sgiliau cyfredol sy’n berthnasol i'r diwydiant sy'n eu paratoi ar gyfer gyrfaoedd mewn technoleg. Mae hyn yn sicrhau bod ein graddedigion yn meddu ar y wybodaeth i fynd i'r afael â heriau’r byd go iawn mewn AI, seiberddiogelwch, a mwy. 

Myfyrwyr ymchwil

Mae Ramadhan Rajab yn fyfyriwr PhD mewn Seiberddiogelwch/AI. 

"Mae fy PhD yn ymwneud â datblygu fframwaith diogelwch ar gyfer y Rhyngrwyd Pethau Meddygol (RhPM). Mae RhPM yn cyfeirio at y defnydd o gyfrifiadura symudol, synwyryddion meddygol, a chyfrifiadura cwmwl i fonitro arwyddion hanfodol cleifion mewn amser real a'r defnydd o dechnolegau cyfathrebu i drosglwyddo data i fframwaith cyfrifiadura cwmwl. Gall meddygon gael gafael ar y data i fonitro, diagnosio a thrin cleifion yn effeithiol. 

"Mae diogelwch RhP yn hanfodol er mwyn amddiffyn y swm enfawr o ddata y mae’n ei drin rhag ymosodiadau seiber. Y nod yn y pen draw yw ein bod ni, trwy amddiffyn y system, yn amddiffyn bywydau cleifion."

Cwblhaodd Dr Mitchell Eboigbe, a aned yn Nigeria, PhD mewn Geowybodeg.

"Mae fy PhD wedi gwella fy sgiliau a'm cyflogadwyedd yn sylweddol. Mae wedi rhoi arbenigedd dadansoddol manwl i mi mewn ffotogrametreg ddigidol a chyfrifiadura. Gallaf nawr ddatblygu technegau arloesol ar gyfer casglu a dadansoddi data, sy'n cael eu gwerthfawrogi'n fawr yn y diwydiant ac sy’n hanfodol ar gyfer ymchwil.

"Dewisais astudio yn PDC oherwydd enw da’r tîm GIS a chyfrifiadura. Mae PDC wedi cyflawni sgôr ymchwil cryf yn y DU ac mae boddhad myfyrwyr yn gyson uchel. Mae gan y brifysgol amgylchedd croesawgar a chefnogol a wnaeth i mi deimlo'n gartrefol. I ddechrau, des i yma i ddilyn gradd Meistr mewn GIS a phenderfynu aros ar gyfer fy PhD. 

"Mae’r Cymry wedi bod yn gynnes a chroesawgar, ac mae ’na gymuned brifysgol gref y mae fy nheulu a minnau yn ei gwerthfawrogi'n fawr." 

Nick Andrews PhD Gwyddor Data

Mae PhD Gwyddor Data Nick Andrew yn canolbwyntio ar rithweledigaethau mewn Modelau Iaith Mawr (MIMau), lle mae gwybodaeth anghywir neu ffug yn cael ei chynhyrchu, gan arwain at heriau mewn cymwysiadau fel gofal iechyd meddwl. Nod yr ymchwil yw creu metrig newydd i ragweld ac adnabod rhithweledigaethau mewn MIMau, gan ddefnyddio cymysgedd o ddadansoddiadau meintiol ac ansoddol. Gall y gwaith hwn helpu i wella cywirdeb MIMau at ddefnydd ymarferol.