Cymryd rhan mewn Rhwydweithiau a digwyddiadau STEM

Ymchwiliwch a chysylltwch â rhwydweithiau a digwyddiadau lleol fel Menywod Cymru mewn STEM, Women in Cyber ac Wythnos Dechnoleg Cymru i feithrin cysylltiadau, cael cymorth a dysgu gan fenywod mewn swyddi STEM.

Chwilio am Gyfleoedd Mentora a Modelau Rôl

Cysylltwch â gweithwyr proffesiynol benywaidd ym maes technoleg a chwiliwch am gyfleoedd mentora, naill ai drwy fynychu digwyddiadau rhwydweithio neu drwy LinkedIn. 

Datblygu Hyder a Sgiliau

Ymrestrwch mewn bwtcamps sgiliau digidol a rhaglenni hyfforddi sydd ar gael yng Nghymru, fel y rhai a ddarperir gan sefydliadau fel Technocamps a Code First Girls. Chwiliwch am hyfforddiant gyrfa, siarad cyhoeddus a hyfforddiant arweinyddiaeth i roi hwb i hyder a herio unrhyw arwyddion o syndrom y ffugiwr.

Eirioli dros eich Hun

Ewch ar drywydd cyfleoedd arwain a phrosiect, hyd yn oed os ydyn nhw’n teimlo y tu hwnt i’ch cylch cysur. Cofnodwch eich cyflawniadau a’ch llwyddiannau i sicrhau bod cyfraniadau’n cael eu cydnabod a’u gwobrwyo.

Cofleidio Opsiynau Gweithio’n Hyblyg

Siaradwch â chyflogwyr am drefniadau gwaith hyblyg sy’n cefnogi cydbwysedd rhwng bywyd a gwaith, yn enwedig wrth reoli cyfrifoldebau teuluol neu ofalu.

Datblygu DPP a Hyfforddiant Sgiliau Pwrpasol

Dyluniwch raglenni DPP sy'n mynd i'r afael â'r heriau unigryw y mae menywod yn eu hwynebu yn ystod camau cynnar eu gyrfaoedd ym maes technoleg, fel goresgyn syndrom y ffugiwr, meithrin hyder mewn sgiliau technegol, a llywio amgylcheddau gwaith sy'n cael eu dominyddu gan ddynion.

Cynhigiwch gyrsiau byr, bwtcamps, neu ficro-gymwysterau sy'n canolbwyntio ar sgiliau digidol y mae galw amdanynt fel codio, gwyddor data, AI, a seiberddiogelwch, gyda chymorth wedi'i dargedu i fenywod sy'n dechrau gweithio yn y meysydd hyn.

Gweithiwch mewn partneriaeth â sefydliadau fel Her Place, i ddarparu sesiynau DPP sy’n canolbwyntio ar ddatblygu arweinyddiaeth, gwytnwch yn y gweithle, a strategaethau rhwydweithio ar gyfer menywod ym maes technoleg.

Darparu Cyfleoedd Dysgu Hyblyg

Sicrhewch fod rhaglenni DPP a sgiliau digidol wedi’u cynllunio i ddiwallu anghenion amrywiol menywod sy’n cydbwyso cyfrifoldebau gwaith, astudio a gofalu. Gallai hyn gynnwys:

• Dosbarthiadau gyda’r nos neu ar benwythnosau.
• Modelau dysgu ar-lein neu hybrid.
• Modiwlau byr sy’n galluogi menywod i uwchsgilio ar eu cyflymder eu hunain.

Creu Cyfleoedd Mentora a Rhwydweithiau Cefnogaeth gan Gymheiriaid sy’n Canolbwyntio ar Fenywod

Sefydlwch raglenni mentora pwrpasol lle mae myfyrwyr benywaidd a gweithwyr proffesiynol sydd ar ddechrau eu gyrfaoedd yn cael eu paru â menywod profiadol ym maes technoleg ddigidol. Datblygwch rwydweithiau cefnogaeth gan gymheiriaid mewn adrannau prifysgolion a cholegau i greu mannau diogel i fenywod gysylltu, rhannu profiadau, a magu hyder yn eu sgiliau.

Ymgorffori Arferion Addysgu Cynhwysol

Sicrhewch fod cyrsiau technoleg ddigidol yn mynd i'r afael â rhagfarn rhywedd drwy ddefnyddio astudiaethau achos amrywiol, gan sicrhau bod arloesedd dan arweiniad menywod yn cael ei amlygu, a hyrwyddwch amgylcheddau dysgu cydweithredol lle mae pob myfyriwr yn teimlo ei fod yn cael ei werthfawrogi. Darparwch DPP i ddarlithwyr ac arweinwyr cyrsiau ar ddulliau addysgu cynhwysol a strategaethau i herio rhagfarn ddiarwybod.

Cryfhau Partneriaethau Diwydiant

Cydweithiwch â chyflogwyr technoleg yng Nghymru i greu cyrsiau DPP sy’n alinio â’r diwydiant ac sy’n bodloni gofynion sgiliau’r sector technoleg ddigidol. Hwyluswch interniaethau â thâl, lleoliadau gwaith a phartneriaethau mentora sy'n cysylltu myfyrwyr benywaidd a gweithwyr proffesiynol sydd ar ddechrau eu gyrfaoedd gyda chyflogwyr sy’n hyrwyddo amrywiaeth mewn technoleg.

Cynyddu Gwelededd Modelau Rôl

Ewch ati i hyrwyddo cyflawniadau menywod ym maes technoleg ddigidol drwy ddarlithoedd gwadd, digwyddiadau myfyrwyr, ac ymgyrchoedd allgymorth. Anogwch rwydweithiau cyn-fyfyrwyr i ymgysylltu â graddedigion benywaidd a chynnig arweiniad ar ddilyniant gyrfa mewn technoleg ddigidol.

Arferion Recriwtio Cynhwysol:

Mabwysiadwch arferion recriwtio dienw i leihau rhagfarn ddiarwybod, gan sicrhau defnydd o iaith gynhwysol mewn disgrifiadau swydd ac annog menywod i ymgeisio. Darparwch hyfforddiant ar ragfarn ar sail rhyw i reolwyr sy’n penodi a rhowch baneli cyfweld amrywiol ar waith.

Hyrwyddo Menywod mewn Arweinyddiaeth:

Gosodwch dargedau mesuradwy ar gyfer gwella amrywiaeth o ran rhywedd mewn rolau arwain. Sefydlwch raglenni arweinyddiaeth i fenywod sy’n darparu cyfleodd mentora, nawdd a mynediad at hyfforddiant. Hyrwyddwch arweinwyr benywaidd llwyddiannus yn eich sefydliad i ysbrydoli eraill.

Polisïau Hyblyg a Chyfeillgar i Deuluoedd:

Datblygwch bolisïau gweithio hyblyg sy’n gynhwysol i bob gweithiwr, nid dim ond menywod. Darparwch bolisïau absenoldeb gwell i rieni sy’n cefnogi cyfrifoldebau rhannu gofal i leihau’r baich ar fenywod.

Cynlluniau Mentora a Chymorth:

Sefydlwch raglenni mentora sy’n paru menywod gydag uwch arweinwyr at ddiben rhannu arweiniad gyrfa a datblygiad gyrfa. Crëwch grwpiau cymorth neu Grwpiau Adnoddau Gweithwyr penodol i ddarparu cymorth gan gymheiriaid a chyfleoedd rhwydweithio.

Cyfleoedd Rhwydweithio Cynhwysol:

Cydweithiwch â sefydliadau fel Menywod Cymru mewn STEM, Academi Menywod Cymru, a Women in Cyber i gynnal digwyddiadau rhwydweithio cynhwysol sy’n croesawu menywod. Sicrhewch fod digwyddiadau rhwydweithio’n cael eu cynnal mewn amgylcheddau hygyrch a chroesawgar, gyda chynrychiolaeth gytbwys.

Gwella Mynediad at Ofal Plant Fforddiadwy

Cynhaliwch adolygiad cynhwysfawr o fforddiadwyedd a mynediad at ofal plant yng Nghymru, gan nodi bylchau yn y ddarpariaeth, gwahaniaethau rhanbarthol, a rhwystrau i rieni mewn patrymau gwaith anhraddodiadol. Dylai’r canfyddiadau lywio diwygiadau wedi’u targedu i ehangu mynediad, gwella fforddiadwyedd, a chefnogi rhieni’n well mewn sectorau fel technoleg ddigidol.

Hyrwyddo Polisïau Gweithio’n Hyblyg

Anogwch gyflogwyr technoleg i fabwysiadu trefniadau gweithio hyblyg, fel gweithio o bell, modelau hybrid, a rhannu swyddi ar gyfer rolau arweinyddiaeth.

Cyflwyno Rhaglenni Datblygu Arweinyddiaeth

Ariannwch gynlluniau hyfforddi a mentora penodol ym maes arweinyddiaeth a rheolaeth ar gyfer menywod ym maes technoleg ddigidol. Datblygwch raglenni wedi’u targedu sy’n cefnogi menywod sy’n dychwelyd i’r gwaith ar ôl seibiant gyrfa, gan ganolbwyntio ar ddatblygu sgiliau digidol a llwybrau arweinyddiaeth.

Ymgorffori Cydraddoldeb Rhywedd yn Safonau’r Diwydiant

Cyflwynwch fframweithiau amrywiaeth a chynhwysiant ar draws y sector sy’n gosod targedau ar gyfer cynrychiolaeth menywod mewn rolau arweinyddiaeth. Mynnwch fod cwmnïau technoleg sy’n bidio am gontractau sector cyhoeddus yng Nghymru yn dangos polisïau cadarn ar amrywiaeth a chynhwysiant rhywedd.

Hyrwyddo Arferion Recriwtio Cynhwysol

Datblygwch becynnau cymorth ar gyfer cyflogwyr yng Nghymru i gefnogi arferion cyflogi cynhwysol, gan gynnwys CVs dienw, paneli cyfweld sy’n gytbwys o ran rhywedd, a hyfforddiant rhagfarn ddiarwybod. Anogwch sefydliadau i gyhoeddi bandiau cyflog tryloyw i fynd i’r afael ag anghydraddoldebau cyflog a allai lesteirio cynnydd menywod.