Beth yw Clirio?

Beth yw’r broses Clirio?

Mae Clirio yn rhan o broses ymgeisio prifysgol UCAS ac mae’n rhoi cyfle i ymgeiswyr sydd heb gael cynnig gan brifysgol - neu'r rhai sydd am newid eu cynlluniau - wneud cais am gyrsiau sydd ar gael.

Pryd mae’r broses Clirio yn agor?

Mae’r broses Clirio yn agor ar 2 Gorffennaf 2026 ac rydym yn ystyried ceisiadau Clirio hyd at ddechrau'r tymor academaidd, ar yr amod bod lleoedd ar gael o hyd.

Sut mae’r broses Clirio yn gweithio?

Efallai y bydd y broses Clirio’n ymddangos yn gymhleth, ond mewn gwirionedd mae'n ffordd syml, hawdd i'ch helpu i ddod o hyd i le mewn prifysgol.

Os nad ydych wedi gwneud cais i brifysgol eto, os na chawsoch y graddau yr oeddech chi'n gobeithio amdanynt, os ydych wedi rhagori ar eich disgwyliadau ac eisiau archwilio opsiynau newydd, neu os ydych chi wedi newid eich meddwl am ble neu beth rydych chi am ei astudio, gallai’r broses Clirio fod yr opsiwn i chi.

Mae’n hawdd dechrau arni. Y cyfan sydd angen i chi ei wneud yw dod o hyd i gwrs sydd o ddiddordeb i chi a chysylltu â'n Tîm Derbyniadau am sgwrs am addasrwydd. Maen nhw'n barod i'ch cefnogi bob cam o'r ffordd.

Alla i wneud cais?

Mae’r broses Clirio yn gyfle i chi ddod o hyd i le yn y brifysgol os ydych chi mewn unrhyw un o'r senarios canlynol:

Dydych chi ddim wedi gwneud cais i'r brifysgol eto
Dydych chi ddim wedi cael cynigion gan unrhyw un o’r prifysgolion neu golegau a ddewisoch
Fe wnaethoch chi gyflwyno eich cais UCAS ar ôl 30 Mehefin
Wnaethoch chi ddim bodloni gofynion mynediad eich dewisiadau cadarn a/neu yswiriant
Fe wnaethoch chi gael cynigion gan o leiaf un o'ch pum dewis, ond dydych chi ddim am dderbyn unrhyw un o'r cynigion a wnaed i chi

Os ydych chi'n gymwys i wneud cais trwy’r broses Clirio, fe welwch hyn ar eich Hwb UCAS. Os nad ydych wedi gwneud cais am brifysgol o gwbl eleni, gallwch wneud cais trwy UCAS nawr a chymryd rhan yn y broses Clirio’n awtomatig.

Sut i wneud cais

Gallwch wneud cais am gwrs drwy’r broses Clirio rhwng mis Gorffennaf a dechrau mis Hydref bob blwyddyn, ond dim ond lle rydych wedi bodloni'r meini prawf mynediad gyda chymwysterau presennol neu flaenorol a phasio unrhyw gyfweliad angenrheidiol.

Ar ôl i chi ddod o hyd i gwrs yr hoffech wneud cais amdano, ffoniwch ni i drafod eich cais. Cofiwch gael y wybodaeth ganlynol wrth law:

Eich rhif adnabod ymgeisydd UCAS (os yw'n berthnasol)
Rhestr o'ch cymwysterau a'ch graddau
Y cwrs y mae gennych ddiddordeb ynddo

Efallai y bydd angen cyfweliad ffurfiol ar rai cyrsiau. Os felly, byddwn yn rhoi gwybod i chi pryd y gallwch ddisgwyl i'r cyfweliad ddigwydd.

Os ydych chi'n nerfus am ein ffonio ni, peidiwch â bod! Rydyn ni yma i'ch helpu chi trwy bob cam.

Sut i wneud cais trwy Glirio

Mae cyfnod Clirio UCAS yn rhedeg o fis Gorffennaf i fis Hydref. Dyma rai dyddiadau allweddol efallai yr hoffech eu nodi ar gyfer eleni:

2 Gorffennaf Cyfnod Clirio yn agor
4 Awst Cyhoeddi canlyniadau Cymwysterau'r Alban
13 Awst Cyhoeddi canlyniadau’r Cyd-Gyngor Cymwysterau
20 Awst Cyhoeddi canlyniadau TGAU
19 Hydref Cyfnod Clirio yn dod i ben

Gwiriwch eich Hwb UCAS a'ch mewnflwch e-bost yn rheolaidd ar Ddiwrnod Canlyniadau i weld a ydych wedi sicrhau lle yn y brifysgol. Mae'n bwysig mewngofnodi a gwirio hyd yn oed os nad ydych wedi cael y graddau yr oeddech chi'n eu disgwyl, gan y gallech gael cynnig o hyd.

Os nad ydych wedi sicrhau lle, ac rydych chi eisiau astudio o fis Medi eleni o hyd, cysylltwch â phrifysgolion i weld a allwch wneud cais am le drwy Glirio.

Ar Ddiwrnod Canlyniadau, gall dysgwyr fynd i'w hysgol neu goleg i gasglu eu canlyniadau arholiadau – gwnewch yn siŵr eich bod yn gwirio'r amseroedd agor ymlaen llaw fel eich bod chi'n gwybod faint o’r gloch y dylech gyrraedd.

Bydd Hwb UCAS hefyd yn diweddaru ar y diwrnod i ddangos a ydych wedi sicrhau lle mewn prifysgol. Ni fyddwch yn gweld eich canlyniadau ar Hwb UCAS, felly gwnewch yn siŵr eich bod yn eu casglu o'ch ysgol neu goleg fel eich bod chi'n gwybod yn union pa raddau a gawsoch chi.

Os ydych chi wedi sicrhau eich lle, llongyfarchiadau – mae'n bryd dathlu a dechrau paratoi ar gyfer y brifysgol. Bydd gwybodaeth am gofrestru ac ymsefydlu yn dilyn o ganol mis Awst ymlaen i'r cyfeiriad e-bost ar eich cais. Os gwnaethoch gais gan ddefnyddio cyfrif ysgol neu goleg, efallai na fydd gennych fynediad at hyn mwyach, felly dylech ddiweddaru eich cyfeiriad e-bost i un personol drwy gysylltu ag UCAS.

Os yw eich canlyniadau'n wahanol i'r hyn roeddech yn ei ddisgwyl neu os ydych wedi newid eich meddwl am beth neu ble rydych chi am astudio, efallai yr hoffech ystyried gwneud cais am gwrs trwy’r broses Clirio.

Gallwch ddarllen mwy o ganllawiau ar sut i baratoi ar gyfer Diwrnod Canlyniadau yma.

Os na allwn wneud cynnig i chi ar gyfer eich cwrs dewisol, efallai y byddwn yn cynnig dewis arall i chi.

Dysgwch fwy am gynigion amgen.

Dylai ymgeiswyr o'r tu allan i'r DU sydd â diddordeb mewn astudio ym Mhrifysgol De Cymru ym mis Medi 2026 gysylltu ag [email protected] am aelod o'r Tîm Derbyniadau Rhyngwladol i drafod addasrwydd ac a ellir gwneud cais hwyr o hyd.

Os ydych wedi sicrhau lle gyda ni trwy’r broses Clirio, cadwch lygad ar eich negeseuon e-bost – byddwn yn anfon yr holl wybodaeth sydd ei hangen arnoch i wneud cais am lety ar y campws.

Mae llawer o wybodaeth ar gael gennym am lety a’r broses Clirio, felly edrychwch am yr holl fanylion ychwanegol gan gynnwys y camau ar gyfer gwneud cais, telerau ac amodau, a sut i gysylltu â'n Tîm Llety.

Os gwnaethoch gais am brifysgol ac eich bod wedi newid eich cwrs neu brifysgol trwy’r broses Clirio, bydd angen i chi ddiweddaru’ch manylion cyllid myfyriwr cyn gynted â phosibl trwy gysylltu â'ch darparwr cyllid myfyriwr.

Os na wnaethoch gais trwy UCAS cyn 30 Mehefin a'ch cais Clirio yw eich cais cyntaf, bydd angen i chi wneud cais am gyllid myfyriwr cyn gynted â phosibl i roi'r cyfle gorau i chi'ch hun ei dderbyn cyn dechrau'r tymor. Gall ceisiadau gymryd hyd at 6 wythnos i'w prosesu ar adegau prysur.