Gwyddorau Biolegol

Darganfyddwch sut mae organebau'n rhyngweithio â'i gilydd a'u hamgylchedd, o boblogaethau a chymunedau i ecosystemau cyfan. Ewch ati i ennill profiad ymarferol mewn arolygu ecolegol, adnabod rhywogaethau a dadansoddi data amgylcheddol trwy waith labordy a maes.

Cewch sylfaen mewn geneteg, bioleg celloedd a microbioleg, gan gwmpasu DNA, strwythur celloedd, celloedd arbenigol a bacteria. Mae sesiynau labordy ymarferol yn rhoi profiad i chi o weithio gyda DNA, microsgopau, organynnau a bacteria wrth feithrin sgiliau labordy hanfodol.

Dysgwch sut mae'r corff dynol wedi'i drefnu, o gelloedd a meinweoedd i organau a systemau organau, a sut mae strwythur yn gysylltiedig â swyddogaeth. Byddwch yn ystyried datblygiad dynol drwy gydol oes a'r berthynas rhwng anatomeg, ffisioleg, iechyd a chlefyd trwy ddysgu rhyngweithiol. 

Datgelwch y prosesau esblygiadol sydd wedi llunio amrywiaeth bywyd ar y Ddaear. Ymchwiliwch i fioamrywiaeth, perthnasoedd esblygiadol a rhyngweithiadau rhywogaethau, gan dynnu ar dystiolaeth o ecoleg, geneteg, paleontoleg a ffylogeneteg i ddeall patrymau yn y byd naturiol.

Archwiliwch sut mae ffurf a swyddogaeth anifeiliaid wedi esblygu mewn ymateb i wahanol amgylcheddau. Trwy ddadansoddiadau ac ymarferion morffoleg cymharol, ymchwiliwch i addasiadau anatomegol a ffisiolegol ar draws prif grwpiau byw a diflanedig o anifeiliaid, o resbiradaeth ddyfrol i symudiad daearol.

Dewch i ddeall sut mae prosesau biolegol yn cefnogi iechyd y blaned ac archwiliwch y pwysau sy'n bygwth systemau naturiol. Rhowch wybodaeth fiolegol ac ecolegol ar waith mewn materion cynaliadwyedd y byd go iawn, gan ymchwilio i ddulliau fel bioadfer, adfer ecolegol a rheolaeth amgylcheddol gynaliadwy.

Ewch â'ch dysgu i amgylcheddau morol a choedwigoedd trofannol trwy gwrs maes preswyl. Enillwch brofiad ymarferol mewn arolygu ecolegol, adnabod rhywogaethau, asesu cynefinoedd a dadansoddi data wrth archwilio riffiau cwrel, dolydd morwellt, mangrofau a choedwigoedd trofannol.

Os hoffech ddilyn Llwybr dau, Gwyddorau Biolegol (Ecoleg a chynaliadwyedd), yna dewiswch y modiwl hwn neu Ymgynghoriaeth Ecolegol ar gyfer eich ail flwyddyn, ac Ecoleg Forol a Dŵr Croyw yn eich trydedd flwyddyn. 

Camwch i fyd ymgynghoriaeth ecolegol a dysgwch sut mae asesiadau amgylcheddol yn sail i gynllunio a datblygu cynaliadwy. Enillwch brofiad ymarferol mewn arolygu ecolegol, GIS, dadansoddi data amgylcheddol ac adrodd proffesiynol, gan ddefnyddio deddfwriaeth a chanllawiau diwydiant mewn senarios ymgynghoriaeth realistig.

Os hoffech ddilyn Llwybr dau, Gwyddorau Biolegol (Ecoleg a chynaliadwyedd), yna dewiswch y modiwl hwn neu Gadwraeth Drofannol Gymhwysol ar gyfer eich ail flwyddyn, ac Ecoleg Forol a Dŵr Croyw yn eich trydedd flwyddyn. 

Ymchwiliwch i brosesau biolegol ar lefel genetig a moleciwlaidd, gan archwilio sut maen nhw'n dylanwadu ar iechyd pobl, anifeiliaid a’r amgylchedd. Enillwch brofiad ymarferol mewn technegau bioleg foleciwlaidd a dadansoddiad cyfrifiadurol o ddata dilyniant biolegol, gan gymhwyso'ch gwybodaeth i astudiaethau achos yn y byd go iawn.

Os hoffech ddilyn Llwybr un, Gwyddorau Biolegol (Biowyddor foleciwlaidd a chynaliadwyedd), yna dewiswch y modiwl hwn ar gyfer eich ail flwyddyn, a Biofeddygaeth foleciwlaidd ac iechyd y cyhoedd yn eich trydedd flwyddyn. 

Archwiliwch egwyddorion a’r defnydd o AI, gan ddatblygu sgiliau ymarferol trwy waith ymarferol a datrys problemau rhyngddisgyblaethol. Dysgwch sut i gymhwyso AI yn gyfrifol i heriau gwyddonol, amgylcheddol a thechnolegol y byd go iawn.

Adeiladwch y sgiliau masnachol a menter sydd eu hangen i weithredu eich gwybodaeth STEM yn y gweithle. Dysgwch am gynllunio busnes, cyllidebu a gwybodaeth ariannol wrth gydweithio i ddatblygu a chyflwyno syniad, gan gryfhau eich dulliau cyfathrebu proffesiynol, ymwybyddiaeth fasnachol a hyder.

Trowch ddata o'r byd go iawn yn fewnwelediadau ystyrlon, gan ddatblygu'r sgiliau i gasglu, dadansoddi a dehongli gwybodaeth gan ddefnyddio offer ystadegol a chyfrifiadurol. Dysgwch ddelweddu data a chyfleu eich canfyddiadau'n glir, gan weithredu technegau dadansoddol gyda phroblemau gwyddonol, technolegol ac sy'n canolbwyntio ar gynaliadwyedd.

Dewch i ddeall sut mae rheoli iechyd a diogelwch effeithiol yn amddiffyn pobl ac yn cefnogi gweithleoedd cyfrifol ar draws STEM. Archwiliwch ddeddfwriaeth, rheoli risg, ymchwilio i ddamweiniau a diwylliant diogelwch, gan gymhwyso'ch gwybodaeth i senarios byd go iawn wrth ddatblygu sgiliau ymarferol a phroffesiynol.

Enillwch sgiliau rheoli prosiectau ymarferol, o ddiffinio a chynllunio prosiectau i reoli risg, ansawdd, adnoddau a rhanddeiliaid. Datblygwch eich gallu i gyfathrebu, cydweithio ac arwain yn effeithiol, gan weithredu dulliau strwythuredig gyda phrosiectau mewn STEM ac amgylcheddau proffesiynol eraill.

Rhowch eich gwybodaeth ar waith gyda lleoliad blwyddyn o hyd yn y diwydiant, gan ennill profiad gwerthfawr mewn amgylchedd gwaith proffesiynol. Datblygwch eich sgiliau cyfathrebu, gwaith tîm a datrys problemau wrth weithredu eich dysgu academaidd mewn sefyllfaoedd gweithle go iawn, gyda chefnogaeth goruchwyliaeth academaidd drwy gydol eich lleoliad.

Archwiliwch y ffactorau biolegol, cymdeithasol ac amgylcheddol sy'n llunio iechyd dynol ac anghydraddoldebau iechyd. Ymchwiliwch i faterion cyfoes fel clefydau heintus, ymwrthedd i wrthficrobiaid a chlefydau anhrosglwyddadwy, gan archwilio sut y gall datblygiadau mewn diagnosteg, therapïau ac iechyd y cyhoedd wella canlyniadau iechyd.

Os hoffech ddilyn Llwybr un, Gwyddorau Biolegol (Biowyddor foleciwlaidd a chynaliadwyedd), yna dewiswch y modiwl hwn ar gyfer eich trydedd flwyddyn, a Biowyddorau Moleciwlaidd yn eich ail flwyddyn. 

Darganfyddwch sut y gall biotechnoleg helpu i greu dyfodol mwy cynaliadwy, o atafaelu carbon a thanwydd gwyrdd i ddiogelwch dŵr ac adfer pridd, a systemau bwyd. Defnyddiwch fioleg foleciwlaidd, ecoleg a rheoli adnoddau i archwilio atebion arloesol i heriau amgylcheddol byd-eang a chefnogi dull adfywiol.

Plymiwch i ecoleg amgylcheddau morol a dŵr croyw, gan archwilio bioamrywiaeth ddyfrol, prosesau ecolegol a'r addasiadau sy'n caniatáu i organebau oroesi mewn amodau heriol. Ymchwiliwch i effeithiau gweithgarwch dynol ac archwiliwch ddulliau o reoli ecosystemau dyfrol trwy weithgareddau ymarferol ac efelychiadau cyfrifiadurol.

Os hoffech ddilyn Llwybr dau, Gwyddorau Biolegol (Ecoleg a chynaliadwyedd), yna dewiswch y modiwl hwn ar gyfer eich trydedd flwyddyn, a Chadwraeth Drofannol Gymhwysol neu Ymgynghoriaeth Ecolegol ar gyfer eich ail flwyddyn, ac Ecoleg Forol a Dŵr Croyw yn eich trydedd flwyddyn. 

Cymerwch berchnogaeth o'ch prosiect ymchwil eich hun, gan ymchwilio i broblem agored neu heb ei datrys sy'n gysylltiedig â phwnc eich gradd. Defnyddiwch y wybodaeth a'r dulliau ymchwil rydych chi wedi'u datblygu drwy gydol eich astudiaethau i gynllunio a chynnal ymchwiliad gwreiddiol, dadansoddi canfyddiadau a chyfleu eich gwaith yn effeithiol.