Peirianneg Awyrofod gan gynnwys Blwyddyn Sylfaen

Sut y byddwch chi'n dysgu

Gallwch astudio’r radd hon ar sail amser llawn ac mae hefyd yn cynnig lleoliad gwaith rhyngosod os byddwch yn penderfynu bod hwn yn llwybr priodol i chi.

Addysgir y rhaglen awyrofod hon drwy ddarlithoedd, a gefnogir gan diwtorialau, sesiynau ymarferol a grwpiau seminar. Lle bynnag y bo modd, bydd eich gwaith yn seiliedig ar brosiectau byw ac astudiaethau achos, gyda chyfraniadau gan weithwyr proffesiynol yn y diwydiant.

Mae amrywiaeth o ddulliau asesu, fel arholiadau llyfr caeedig ffurfiol, gwaith grŵp, prosiectau unigol, asesiadau llafar ac arbrofion labordy, tra bod arholiadau’n cyfrannu tua 30% o’r holl asesiadau ar y cwrs.

Staff Addysgu

Mae gan y staff sy'n cyflwyno'r modiwlau ystod eang o arbenigedd yn eu meysydd pwnc. 

Mae rhai wedi datblygu’r arbenigedd hwn drwy waith ymchwil o ansawdd uchel. Mae’r meysydd ymchwil yn rhyngwladol eu cwmpas ar yr un pryd â bod yn berthnasol yn lleol, gan weithio’n aml gyda chwmnïau rhyngwladol sy’n gweithredu’n lleol. 

Mae eraill wedi datblygu eu harbenigedd drwy yrfaoedd llwyddiannus mewn diwydiant ac maent bellach yn defnyddio'r wybodaeth honno i addysgu a pharatoi'r myfyrwyr ar gyfer eu gyrfaoedd eu hunain.

Mae'r cyfuniad hwn o gefndiroedd a gynrychiolir ymhlith ein staff academaidd yn rhoi ehangder i brofiad y myfyrwyr ac yn eu datblygu yn dechnegol a phroffesiynol. 

Lleoliadau

Rydyn ni'n gwybod nad oes dim yn well na mynd allan i'r byd go iawn, gweld sut mae'r diwydiant peirianneg yn gweithredu a datblygu eich sgiliau mewn amgylcheddau go iawn.

Ar ôl symud ymlaen i'n gradd lawn, byddwn yn eich cefnogi i ddod o hyd i brofiad gwaith ystyrlon a byddwch yn cael y cyfle i gwblhau lleoliad Blwyddyn Ryngosod ar ôl eich ail flwyddyn. Mae ein myfyrwyr wedi mwynhau lleoliadau gyda chwmnïau blaenllaw fel GE Aviation, Airbus a British Airways Maintenance.

Rydyn ni'n trefnu sawl taith maes ac yn gwahodd arbenigwyr diwydiant o wahanol gwmnïau i gyflwyno darlithoedd a chefnogi prosiectau, gan roi cipolwg pellach i chi ar fyd gwaith.

Cyfleusterau

Mae'r Brifysgol wedi buddsoddi £3.3m yn ei chyfleusterau awyrofod, gan gynnwys estyniad deulawr i'r Ganolfan Awyrofod, sy'n cynnig 1,000m2 o ofod gweithdai a labordai i fyfyrwyr peirianneg, dau awyrendy, ac efelychydd hedfan MP521.

Mae'r Ganolfan yn dal awyren Jetstream 31, gweithdai cynnal a chadw tyrbinau nwy, rhybedion, offer llaw, a weldio. Yn ogystal, mae'n cynnwys gweithdai cyfansawdd glân a budr, labordai i gynnal tasgau electronig, afioneg, hydroleg, a niwmateg. Mae twneli gwynt is-sonig yn hwyluso hyfforddiant aerodynamig.

Mae efelychydd Merlin MP521, y gellir ei raglennu ar gyfer unrhyw fath o awyren, yn allweddol ar gyfer profi dyluniadau a pharatoi profion hedfan.