Addysg (Arloesi mewn Dysgu ac Addysgu)

O leiaf ddau fodiwl o'r rhestr ganlynol (30 credyd):

Arloesi wrth Gynllunio'r Cwricwlwm

Mae'r modiwl hwn wedi cael ei lunio ar gyfer ymarferwyr addysgol sy'n dymuno archwilio ffyrdd arloesol o hyrwyddo rhagoriaeth wrth gynllunio'r cwricwlwm. Nid yn unig y bydd myfyrwyr yn ystyried beth yw ystyr ‘cynllunio'r cwricwlwm’ mewn amrywiaeth o gyd-destunau, ond byddant hefyd yn ystyried diben hynny, a phwy yw'r gynulleidfa a'r rhanddeiliaid.

Meithrin Cymhwysedd Digidol

Gellir astudio'r modiwl hwn fel rhan ddewisol o unrhyw lwybr MA Addysg. Yn ogystal â chanolbwyntio ar ddefnyddio technoleg ar gyfer dysgu mewn cyd-destunau ffurfiol ac anffurfiol, bydd yn mynd i'r afael â'r heriau sy'n gysylltiedig ag arwain hunanadolygiadau sefydliadol a datblygu gweithgareddau dysgu ac addysgu gyda chymorth technoleg. 

Datblygu Dysgu mewn Sefydliadau

Nod y modiwl hwn yw cefnogi ac ymestyn datblygiad proffesiynol arweinwyr canol presennol a darpar arweinwyr canol yn ogystal ag ymarferwyr yn yr ystafell ddosbarth. Bydd yn dadansoddi arferion yn yr ystafell ddosbarth yn y presennol a'r gorffennol ac, wrth wneud hynny, yn archwilio ac yn gwerthuso damcaniaethau dysgu a'r hyn sy'n gyfystyr ag addysgu effeithiol. Bydd hefyd yn ystyried pa mor ymarferol yw asesu, a'r problemau sy'n gysylltiedig â sicrhau arferion cyson drwy ysgol gyfan.

Safbwyntiau Rhyngwladol ar Blentyndod Cynnar

Ynghyd â'r holl ddatblygiadau addysgegol, polisïau a gwaith ymchwil ym maes y blynyddoedd cynnar, dyluniwyd y modiwl hwn er mwyn i fyfyrwyr ddatblygu eu gwybodaeth a'u dealltwriaeth ym maes addysg a gofal plentyndod cynnar.

Un neu ddau fodiwl o'r rhestr ganlynol, fel y bo angen i sicrhau 180 credyd:

AAA/ ADY: Cyd-destun a Chysyniadau:

Bydd y modiwl hwn yn rhoi cyfle i fyfyrwyr archwilio amrywiaeth eang o safbwyntiau ar AAA/ADY a chynhwysiant ar gyfer plant, pobl ifanc ac oedolion. Mae'r modiwl hwn yn addas ar gyfer pobl sy'n gweithio yn y sector addysg, y sector iechyd, y sector gofal cymdeithasol a'r sector gwirfoddol.

Dyslecsia: Theori ac Asesu:

Hwn yw'r cyntaf o ddau fodiwl sydd wedi'u hachredu gan Gymdeithas Dyslecsia Prydain (BDA). Mae'r modiwl hwn yn ymdrin â'r ffactorau sy'n achosi anawsterau dysgu penodol (dyslecsia), y ffordd y dônt i'r amlwg a'u goblygiadau, gan gynnwys eu cymhlethdod, eu hamrywiaeth a'r potensial iddynt gyd-ddigwydd.

Dyslecsia: Cysylltu Theori, Asesu ac Ymarfer:

Hwn yw'r ail fodiwl dewisol sydd i gyd wedi'u hachredu gan y BDA sy'n adeiladu ar wybodaeth ac ymarfer ym maes asesu a astudiwyd yn y modiwl blaenorol. Caiff egwyddorion dulliau dysgu ac addysgu amlsynnwyr eu cyflwyno i'r myfyrwyr, a byddant yn ystyried yr angen am raglen ymyriadau strwythuredig, gronnus a systematig.

Arwain a Rheoli AAA/ ADY:

Nod y modiwl yw rhoi cyfle i ymarferwyr addysgol fyfyrio mewn modd systematig ar eu gwerthoedd a'u hymarfer proffesiynol er mwyn gwella profiadau a deilliannau plant a phobl ifanc ac oedolion sydd ag AAA/ADY. Mae cynnwys megis cynllunio sy'n canolbwyntio ar yr unigolyn ac arferion gweithio cydweithredol ymhlith nodweddion y modiwl hwn. 

Awtistiaeth: Cyd-destun a Chysyniadau:

Nod y modiwl hwn yw gwerthuso damcaniaethau presennol ynghylch awtistiaeth ac archwilio eu goblygiadau i unigolion awtistig, eu teuluoedd, ac ymarferwyr. Bydd yn ceisio dyfnhau gwybodaeth a dealltwriaeth myfyrwyr mewn perthynas â gwahaniaethau canfyddiadol synhwyraidd awtistiaeth ac yn ystyried ym mha ffyrdd y gall y rhain arwain at ffordd wahanol o fod yn rhan o'r byd.

Iechyd Meddwl Plant a'r Glasoed: Cyd-destun a Chysyniadau:

Mae'r modiwl hwn yn rhoi rhagarweiniad i fyfyrwyr ar gyd-destun Gwasanaethau Iechyd Meddwl Plant a'r Glasoed (CAMHS) yn y Deyrnas Unedig, y ffordd y cânt eu trefnu, a chysyniadau allweddol ym maes Iechyd Meddwl Plant a'r Glasoed megis risg a gwydnwch. Bydd y sesiynau dilynol yn edrych yn fanylach ar anawsterau iechyd meddwl penodol.

Datblygu Pobl mewn Sefydliadau:

Nod y cwrs yw cefnogi ac ymestyn datblygiad proffesiynol arweinwyr canol presennol a darpar arweinwyr canol yn ogystal â chefnogi ac ymestyn datblygiad ymarferwyr mewn meysydd cysylltiedig. Bydd yn defnyddio syniadau cyfredol ym maes arweinyddiaeth a rheoli a'r ffordd y cânt eu cymhwyso er mwyn gwella sefydliadau cyfan. 

Rheoli a Chefnogi Iechyd Meddwl Plant a'r Glasoed ac Anawsterau Cymdeithasol, Emosiynol ac Ymddygiadol:

Mae'r modiwl hwn yn canolbwyntio ar y theori sy'n sail i ymarfer yn y maes gwaith hwn. Bydd y modiwl yn dechrau drwy edrych ar faterion cysyniadol sy'n ymwneud ag Iechyd Meddwl Plant a'r Glasoed ac Anawsterau Cymdeithasol, Emosiynol ac Ymddygiadol, ac yna'n symud ymlaen i archwilio sut mae theori'n effeithio ar ymyriadau mewn gwahanol fodelau (therapiwtig, ymddygiadol a bio-seico-gymdeithasol).

Rheoli a Chefnogi Awtistiaeth:

Mae'r modiwl hwn wedi'i ddylunio ar gyfer ymarferwyr proffesiynol neu ddarpar ymarferwyr proffesiynol sydd am feithrin eu gwybodaeth a'u dealltwriaeth mewn perthynas â'r dystiolaeth bresennol o arferion gorau ar gyfer rheoli a chefnogi awtistiaeth.

Gweithio gyda Grwpiau Agored i Niwed:

Bydd y modiwl hwn yn dechrau drwy archwilio modelau cyfoes o blentyndod a'r glasoed a chyflwyno cysyniadau bod yn agored i niwed, risg a gwydnwch. Bydd y sesiynau hyn ar Blentyndod yn yr 21ain Ganrif, Plant yn y Byd Digidol a Diogelu yn gosod yr olygfa ar gyfer astudiaethau achos mwy penodol ar grwpiau agored i niwed.