Datblygiad Plentyndod gan gynnwys Blwyddyn Sylfaen

Sut y byddwch yn dysgu

Bydd myfyrwyr ar ein cwrs Datblygiad Plentyndod yn elwa o fod yn rhan o grŵp agos a chymuned ddysgu, ac yn rhan hefyd o deulu Seicoleg ehangach Prifysgol De Cymru. Byddwch yn cael eich addysgu drwy amrywiaeth o ddulliau gan gynnwys darlithoedd a seminarau traddodiadol yn ogystal â gweithdai rhyngweithiol a gwaith grŵp. Mae ein dosbarthiadau llai yn creu amgylchedd dysgu cefnogol sy'n rhoi cyfleoedd i gael cymorth ac adborth ystyrlon gan ddarlithwyr drwy gydol eich astudiaethau.

Dyluniwyd ein modiwlau Blwyddyn Sylfaen i'w cyflwyno dros ddau ddiwrnod yr wythnos, gan roi'r amser a'r hyblygrwydd i chi ddysgu ar gyflymder cyfforddus a datblygu sgiliau allweddol fel rheoli amser ac astudio annibynnol drwy gydol y cwrs. 

Mae asesiadau'n amrywio o arholiadau ac aseiniadau ysgrifenedig i gyflwyniadau llafar sydd wedi’u cynllunio i wella eich hyder mewn asesiadau ar ffurf rhai prifysgol a'ch paratoi am weddill eich amser yn astudio ar ôl cwblhau'r cwrs.

Staff addysgu

Mae ein staff addysgu Datblygiad Plentyndod yn cymryd rhan weithredol mewn ymchwil gyfredol ac yn dod o amrywiaeth o feysydd arbenigol, gan roi mynediad i chi at amrywiaeth eang o arbenigedd. Maent yn ymroddedig i greu amgylchedd cefnogol, sy'n canolbwyntio ar y myfyriwr i gefnogi eich taith ddysgu.

Neilltuir Hyfforddwr Academaidd Personol i bob myfyriwr yn y flwyddyn sylfaen a'r flwyddyn gyntaf, fel y gall myfyrwyr elwa ar gymorth ac arweiniad trwy gydol eu hastudiaethau. Gall myfyrwyr hefyd ddewis cael eu mentora gan gyfoedion ym mlynyddoedd uwch y radd. Gall y mentoriaid hyn ddarparu cymorth gyda’r broses bontio i fywyd prifysgol, delio ag asesiadau, rheoli amser yn ogystal ag ateb amrywiaeth o gwestiynau eraill sydd gennych ar hyd y ffordd.

Lleoliadau a phrofiad gwaith

Elfen allweddol o'r cwrs Datblygiad Plentyndod yw'r cyfle i gael cyfnod byr o brofiad ymarferol yn gweithio gyda phlant a phobl ifanc mewn amrywiaeth o leoliadau lle mae ar gael, gan gynnwys ysgolion, elusennau lles plant a theuluoedd, a chyfiawnder ieuenctid. Gallwch hefyd wneud cais am brofiad clinigol yn ein Clinig Ymyrraeth Gynnar ar y campws a chewch gyfle i ymgymryd â chyrsiau byr a lleoliadau gwaith, yn ogystal â chwblhau cymwysterau ychwanegol fel Diogelu Plant (Lefel 1). 

Rydym am eich helpu i wella eich sgiliau er mwyn agor cymaint o ddrysau â phosibl ar gyfer eich gyrfa yn y dyfodol. Gallwch hefyd ddod o hyd i amrywiaeth o opsiynau ar gyfer hyn drwy ein cynllun Seicoleg a Mwy, gan gynnwys gwirfoddoli, interniaethau a chyrsiau byr.

Cyfleusterau

Mae ein labordy seicoleg pwrpasol wedi'i lenwi ag offer safonol y diwydiant i'w defnyddio drwy gydol eich astudiaethau, gan gynnwys offer olrhain llygaid, peiriannau Electroenceffalograffeg (EEG), a systemau BIOPAC, yn ogystal ag ystafelloedd cyfweld ac arsylwi. Byddwch hefyd yn gallu archebu lle i astudio mewn tawelwch a chael mynediad i'r gofod dysgu cymdeithasol pwrpasol gyda chyfrifiaduron a gwerslyfrau seicoleg.    

PDC oedd y sefydliad cyntaf yn y DU i gynnig ystod eang o wasanaethau seicolegol i'r cyhoedd yn ei Glinig Dadansoddi Ymddygiad ar y safle, sy'n arbenigo mewn trin yr heriau ymddygiadol sy'n gysylltiedig ag ystod eang o anhwylderau, gan gynnwys awtistiaeth, anableddau dysgu, ADHD, ac anhwylder ymddygiad.