Gwyddor Fforensig gan gynnwys Blwyddyn Sylfaen

Cyflwyniad i Ymchwilio Fforensig

Mae hyn yn cynnwys cyflwyniad i feddwl yn feirniadol a’r broses wyddonol. Beth yw ymholiad? Beth yw ymchwiliad? Offer a llifoedd prosesu sylfaenol i ddatrys ymholiad neu ymchwiliad. Casglu gwybodaeth. Dadansoddi gwybodaeth. Ffurfio casgliadau rhesymegol yn seiliedig ar ffeithiau a data gwyddonol.

Llythrennedd Data Gwyddonol

Nod y modiwl yw datblygu a chefnogi defnydd myfyrwyr o lythrennedd rhifiadol a thrin data mewn cyd-destun gwyddonol eang. Mae’n cynnwys cyflwyniad i wyddoniaeth feintiol, unedau a mesur; egwyddorion rhifyddeg sylfaenol, BODMAS a rhifau negyddol; degolion a’r defnydd o ffigurau arwyddocaol, ffracsiynau, mynegeion a nodiant gwyddonol; defnyddio algebra a symleiddio/aildrefnu hafaliadau; y defnydd o Excel, offeryn gwyddonwyr ar gyfer trin data: ei ddefnydd i gofnodi, trin, dadansoddi a chyflwyno data.

Sgiliau Allweddol a Datblygiad Proffesiynol

Bydd myfyrwyr yn cael eu cyflwyno i fywyd a disgwyliadau academaidd. Gan ddechrau drwy nodi eu cryfderau a’u gwendidau eu hunain fel dysgwr gweithredol, bydd myfyrwyr yn gwerthuso ac ystyried eu hymagwedd at ddysgu ac yn defnyddio sgiliau newydd i wella eu profiad. Bydd cysyniadau a sgiliau sy’n ymwneud â dod o hyd i wybodaeth, cydnabod gwaith eraill, a thrin gwybodaeth yn cael eu hintegreiddio i ddarparu sgiliau buddiol i fyfyrwyr ar gyfer eu hastudiaethau academaidd a gydol oes.

Bioleg Sylfaen

Mae myfyrwyr yn cael eu cyflwyno i’r cysyniadau biolegol hanfodol megis strwythur a threfniadaeth celloedd. Defnyddio ensymau, asidau niwclëig a throsglwyddo gwybodaeth enetig Sut mae’r cod genetig a’r celloedd yn gweithredu i gefnogi cymwysiadau atgenhedlu a geneteg.

Cemeg Organig ac Anorganig Sylfaen

Amcan y modiwl hwn yw cyflwyno myfyrwyr i’r cysyniadau cemegol sylfaenol sydd eu hangen i gefnogi modiwlau’r dyfodol. Mae’n ymwneud â chemeg organig ac anorganig, adweithiau cemegol ansoddol a meintiol ac mae’n cael ei ddysgu i annog myfyrwyr i fabwysiadau ymagwedd ymholgar ac ymchwiliol.

Cemeg Ffisegol Sylfaen

Mae’r modiwlau hyn yn ymdrin â meysydd fel y strwythur atomig a sefydlogrwydd y niwclews. Mae’n cyflwyno myfyrwyr i olau a sbectrosgopeg a’r ffactorau sy’n effeithio ar gyfradd adweithiau. Mae’n cyflwyno myfyrwyr i ecwilibria cemegol hefyd.

Cyflwyniad i Ddadansoddiad Fforensig

Mae’r modiwl hwn yn cyflwyno myfyrwyr i agweddau sylfaenol technegau prosesu tystiolaeth drwy gyfuniad o ymarferion hyfforddi yn y labordy a dysgu seiliedig ar theori.  Bydd myfyrwyr yn datblygu gwerthfawrogiad o dechnegau labordy amrywiol a ddefnyddir ar ronynnau hybrin a deunyddiau tystiolaeth fiolegol, gan gynnwys chwilio, adfer, creu nodiadau achos cyfoes proffesiynol i gyfrannu at ffeil achos y labordy, microsgopeg sylfaenol a phrofion cemegol am bresenoldeb deunyddiau biolegol.

Cyflwyniad i Ymchwiliad i Leoliad Trosedd

Mae ymarfer gwyddoniaeth fforensig yn gofyn am ddealltwriaeth o gasgliad eang o bynciau fforensig ac mae’n cynnwys llawer o dechnegau ymchwilio. Bydd y modiwl hwn yn darparu gwybodaeth, dealltwriaeth ymarferol a gallu technegol i chi yn ymwneud ag ymchwilio i drosedd. Yma, byddwch yn astudio cyflwyniad i ymchwilio i leoliad trosedd; dogfennaeth; casglu a chadw tystiolaeth ffisegol; dehongli tystiolaeth lleoliad trosedd ac ail-greu lleoliad trosedd.

Sgiliau ar gyfer Gwyddoniaeth Fforensig

Bydd y modiwl yn eich dysgu sut i ddefnyddio’r data a gasglwyd o arbrofion labordy. Bydd y modiwl hefyd yn datblygu arferion a sgiliau academaidd megis ymchwil effeithiol ac ysgrifennu adroddiadau gwyddonol.

Geneteg ac Esblygiad

Mae myfyrwyr yn gweithio i ddysgu egwyddorion allweddol geneteg a theori esblygiad i gael dealltwriaeth o strwythur a threfniadaeth DNA, sut mae atgynhyrchu DNA yn gweithio a sut rydyn ni’n symud o enyn i brotein. Bydd y modiwl hwn yn rhoi profiadau labordy i fyfyrwyr hefyd sy’n berthnasol i weithio gyda DNA mewn labordy.

Moleciwlau Organig Sylfaenol a Dadansoddiad ar gyfer y Gwyddorau Fforensig

Bwriad y modiwl hwn yw cyflwyno myfyrwyr i gysyniadau cemeg organig, biolegol a dadansoddol amrywiol sy’n angenrheidiol ar gyfer gwyddoniaeth fforensig. Mae myfyrwyr yn gallu meithrin eu sgiliau labordy i gefnogi datblygiad sgiliau dadansoddol eraill.

Cysyniadau Cemegol

Mae myfyrwyr yn gallu meithrin gwybodaeth am gysyniadau sylfaenol cemeg ffisegol ac anorganig i helpu gyda modiwlau’r dyfodol, ond yn datblygu sgiliau allweddol megis datrys problemau a meddwl yn feirniadol hefyd. Bydd myfyrwyr yn gallu ymchwilio i dechnegau dadansoddol a chyfryngol i ddeall eu sail gemegol. Bydd sesiynau labordy yn datblygu’r sgiliau labordy angenrheidiol.

Dadansoddi a Dehongli Tystiolaeth

Ymestyn galluoedd ymarferol a gwybodaeth y myfyriwr yn ymwneud â dadansoddi tystiolaeth olion mân gronynnol a biolegol gyda ffocws arbennig ar ddefnyddio cyfarpar safonol i’r sector, prosesau rheoli ansawdd a dogfennaeth safonol i’r sector. Cyflwyno myfyrwyr i ddehongli a chyflwyno data gwyddonol wedi’i gynhyrchu gan dechnegau dadansoddol. 

Ymchwilio Lleoliad Cyffredin

Yn y modiwl hwn, byddwch yn cael profiad ymarferol o ddelweddu digidol, ffotograffiaeth lleoliad trosedd a fideo wrth gofnodi lleoliadau troseddau amrywiol. Bydd hyn yn cynnwys astudio agweddau ar theori ffotograffiaeth, a chyfarpar: ffilmiau a chyflymder ffilm, fformatau camera, hyd ffocal, agorfa a dyfnder ffocws, technegau goleuo a fflach. Yn ogystal, byddwch yn cael hyfforddiant ymarferol yn sgiliau craidd ar gyfer ymchwilydd lleoliad trosedd mewn efelychiad o gyfres o leoliadau troseddau cyffredin, gan gynnwys archwilio cerbydau.

Archwiliad Fforensig o Weddillion Dynol

Cyflwyno myfyrwyr i’r agweddau strategol ac unigryw sy’n gysylltiedig â dadansoddi gweddillion dynol. Darparu disgrifiad manwl o’r dulliau gwyddonol a thechnolegol a ddefnyddir wrth ymchwilio i ddioddefwyr troseddau neu drychinebau naturiol.

Geneteg Foleciwlaidd Ddynol

Mae myfyrwyr yn pwyso ar y wybodaeth am eneteg a ddysgwyd yn y flwyddyn gyntaf i ddeall geneteg foleciwlaidd a sail enetig anhwylderau etifeddol. Mae myfyrwyr yn dod i ddeall defnydd ymarferol technegau bioleg foleciwlaidd a sut mae’r rhain yn cael eu defnyddio i astudio geneteg.

Technegau Modern mewn Dadansoddi ac Adnabod

Drwy’r modiwl hwn, mae myfyrwyr yn dysgu’r theori a’r ymarfer am y technegau dadansoddol sydd ar waith mewn gwyddoniaeth fforensig. Mae hyn yn cwmpasu pynciau fel sbectrosgopeg, sy’n hanfodol wrth adnabod sylweddau, a sut i ddefnyddio amrywiaeth o dechnegau i ddeall adeiledd cemegol cyfansoddion.

Llwybr Dadansoddol – Cymwysiadau Dadansoddi Fforensig

Mae’r modiwl hwn yn ymdrin â sut y gallwn ddefnyddio technegau dadansoddol yn y lleoliad fforensig. Mae’n edrych ar sut mae cemegydd fforensig yn gallu defnyddio technegau dadansoddol i ganfod tystiolaeth megis cyffuriau anghyfreithlon. Mae’n ymdrin hefyd â sut y gellir defnyddio gweddillion tân, ac ymchwilio i gyfansoddion pridd, mewn gwaith fforensig.

Llwybr Biolegol – Bioleg Fforensig a Microbioleg

Bydd myfyrwyr yn dysgu am fioleg celloedd, microbioleg a biocemeg. Mae hynny wedyn yn rhoi cyfle i’r dysgwr ddatblygu dirnadaeth o gymhlethdod bywyd cellog. Mae’r modiwl yn archwilio gwerth a sail ddamcaniaethol tystiolaeth fiolegol mewn gwaith fforensig hefyd, yn ogystal ag edrych ar sut mae microbau’n gallu cyfrannu at glefydau dynol a all arwain at farwolaeth.

Prosiect Ymchwil a Sgiliau Cyflogadwyedd

Bydd hyn yn cynnwys cloriannu achosion a thystiolaeth yn wyddonol a gwerthusiad ystadegol o dystiolaeth fforensig a moeseg a safonau proffesiynol. Bydd achosion yn cynnwys patholeg fforensig, dynladdiad, hunanladdiad a marwolaeth ddamweiniol ymhlith eraill. Yn ogystal, byddwch yn cael eich cyflwyno i brosesau llys barn a rôl y tyst arbenigol, bargyfreithwyr, croesholi a’r brif dystiolaeth. Fel rhan o’r modiwl hwn, byddwch yn cynnal adolygiad llenyddiaeth a fydd yn cynnwys gwerthusiad beirniadol o wybodaeth a data sylfaenol ar bwnc dethol ym maes gwyddoniaeth fforensig.

Gwaith Achos Fforensig a’r Tyst Arbenigol

Caniatáu datblygu a defnyddio gwaith tîm, meddwl beirniadol a sgiliau fforensig drwy arbrofi gyda chynllunio a phrosesu efelychiad o achos fforensig, gan roi sylw arbennig i dystiolaeth DNA, paent a gwydr, sicrwydd ansawdd a dehongli data dadansoddol gan ddefnyddio dulliau ystadegol. Galluogi’r myfyriwr i atgyfnerthu a datblygu ei ddealltwriaeth o’r rheoliadau sy’n berthnasol i ymarferwyr fforensig wrth ddadansoddi, dehongli a chyflwyno tystiolaeth, a datblygu gwybodaeth a sgiliau i allu darparu tystiolaeth tyst.

Archwilio Lleoliad Sylweddol

Nod y modiwl hwn yw eich galluogi i ddatblygu gwybodaeth fanwl am y broses fforensig o ymchwilio i droseddau, a meithrin dirnadaeth feirniadol o amrywiaeth o droseddau arbenigol a difrifol sy’n cael eu disgrifio fel ymchwiliad i ddigwyddiad sylweddol. Byddwch yn pwyso ar ddysgu cysylltiadol drwy brofiad o efelychu senarios lleoliad sylweddol ac astudiaethau achos perthnasol a chysylltiedig.

Gwenwyneg Fforensig Gymhwysol

Mae’r modiwl hwn yn cyflwyno myfyrwyr i astudio gwenwyneg ac yn meithrin dealltwriaeth o effeithiau sylweddau gwenwynig ar y corff. Mae’n cyflwyno myfyrwyr i egwyddorion amsugno, dosbarthu, metaboledd ac ysgarthu yn ogystal â defnyddio dosbarthiadau labordy ymarferol i ddeall y gwaith o ymchwilio i sylweddau gwenwynegol.

Dadansoddi a Dehongli DNA Fforensig Technegol

Bydd myfyrwyr yn gallu defnyddio’r holl theori a ddysgwyd ar y cwrs a’i roi ar waith yn y maes fforensig. Mae’n archwilio defnydd geneteg foleciwlaidd mewn lleoliadau fforensig drwy archwilio meysydd fel proffilio DNA a sut mae’n deillio o olion mewn lleoliad trosedd.

Llwybr Dadansoddol – Technegau Dadansoddol Uwch

Mae’r llwybr hwn wedi’i ddatblygu i ddarparu’r sgiliau uwch y bydd myfyrwyr eu hangen yn y gweithle. Gan adeiladu ar astudiaethau blynyddoedd blaenorol, mae’r modiwl yn datblygu prosesau megis technegau echdynnu sy’n hanfodol ar gyfer gwaith fforensig ond sydd hefyd yn edrych ar bwysigrwydd cromatograffaeth gadarn ar gyfer dadansoddi meintiol Mae’n edrych ar ddefnydd technegau dadansoddol megis LC-MS / MS a q-NMR hefyd.

Llwybr Biolegol – Gwaith Fforensig Amgylcheddol a Bywyd Gwyllt

Drwy’r modiwl hwn, mae myfyrwyr yn gallu datblygu dealltwriaeth o ddefnydd gwaith fforensig ym meysydd yr amgylchedd a throseddau bywyd gwyllt. Mae’n cwmpasu pynciau a meysydd fel y gyfraith a deddfwriaeth sy’n ymwneud â throseddau bywyd gwyllt a’r ficrosgopeg a’r dadansoddi DNA a allai fod yn angenrheidiol. Mae’n ymchwilio i’r cyfarpar y gellir ei ddefnyddio wrth ymchwilio i droseddau amgylcheddol a sut mae offer arbenigol fel GIS yn cael ei ddefnyddio ynghyd â dadansoddi pridd yn wyddonol.