Busnes a Rheoli (Rheoli Adnoddau Dynol)

BA (Anrh)

Yn amodol ar ddilysiad.

Sut i wneud cais Gwneud gais drwy UCAS Trefnu Diwrnod Agored Sgwrsio gyda ni

Mynd i’r afael â’r byd busnes, gan ddysgu gan ddarlithwyr profiadol ar ein gradd aml-achrededig.

Côd UCAS

NG13

Dyddiad Cychwyn

Medi 2027

Lleoliad

Caerdydd

Côd y Campws

Pwyntiau UCAS

Trosolwg o'r Cwrs

Mae pobl yn ganolog i bob sefydliad. Bydd y llwybr Rheoli Adnoddau Dynol yn eich helpu i ddeall sut mae sefydliadau'n denu, datblygu, cefnogi a chadw eu pobl, a sut mae gweithwyr proffesiynol AD yn ymateb i weithleoedd a pherthnasoedd cyflogaeth sy'n newid.

Byddwch yn datblygu gwybodaeth ymarferol am fyd busnes a'r hyder i lwyddo yn y gweithle proffesiynol heddiw. Gan weithio ochr yn ochr â sefydliadau yn y byd go iawn, byddwch yn meithrin sgiliau rheoli craidd wrth archwilio busnes trwy safbwyntiau moesegol, byd-eang a digidol.

Pam astudio'r cwrs hwn?

Dan arweiniad gweithwyr proffesiynol

Cewch eich addysgu gan staff sydd â phrofiad mewn amrywiaeth o rolau busnes.

Wedi'i lywio gan y diwydiant

Wedi'i gynllunio ar y cyd â phartneriaid diwydiant lleol a rhyngwladol i adlewyrchu anghenion gwirioneddol y gweithle.

Llwybrau astudio hyblyg

Ar ddiwedd eich blwyddyn gyntaf, byddwch naill ai’n dewis parhau i ddatblygu eich gwybodaeth am ddadansoddeg data, neu’n troi i ganolbwyntio ar entrepreneuriaeth, y diwydiannau creadigol, rheoli adnoddau dynol, logisteg a chadwyni cyflenwi, neu reolaeth.

Cyfleoedd profiad gwaith

Cewch fagu profiad yn y byd go iawn trwy leoliadau dewisol a'r cyfle am flwyddyn ryngosod yn y DU neu dramor.

Sgiliau sy’n eich paratoi ar gyfer gyrfa

Cewch ennill sgiliau arweinyddiaeth, gwaith tîm, gwneud penderfyniadau ac AI i lywio'n hyderus drwy fyd busnes ôl-AI.

Beth fyddwch chi'n ei astudio

Mae Blwyddyn Un yn ymwneud â chael eich traed oddi tanoch a chanfod eich llais.

Byddwch yn meithrin hyder, yn archwilio sut mae busnesau’n gweithio’n ymarferol, ac yn datblygu sgiliau, chwilfrydedd a meddylfryd arweinydd y dyfodol.

Magwch eich hyder fel myfyriwr prifysgol ac arweinydd y dyfodol. Datblygwch sgiliau academaidd, gwaith tîm a chyfathrebu wrth archwilio arweinyddiaeth foesegol, cynaliadwyedd a realiti busnes modern.

Archwiliwch sut mae gweithleoedd yn gweithio mewn gwirionedd. Archwiliwch foeseg, tegwch a lles wrth ddysgu sut mae penderfyniadau rheoli pobl yn llunio sefydliadau, cymunedau a dyfodol gwaith.

Ewch ar y daith dechrau busnes o syniad i dwf. Gweithiwch gydag eraill i ddatrys her a osodir gan PDC a phartner diwydiant ac adeiladwch feddylfryd, hyder a sgiliau entrepreneur.

Dysgwch sut i ddenu sylw i’ch syniadau. Meddyliwch o safbwynt marchnata mewn senarios go iawn wrth feithrin sgiliau cynllunio, creadigrwydd a brand personol cryf i gefnogi eich gyrfa yn y dyfodol.

Cewch ddatblygu eich sgiliau, eich gwybodaeth a’ch hyder ar draws busnes a rheolaeth a chyllid, yn ogystal â dechrau arbenigo mewn rheoli adnoddau dynol.

Archwiliwch sut mae caffael, logisteg a gweithrediadau yn gyrru busnes modern. Cymhwyswch lythrennedd carbon a meddwl cynaliadwyedd i optimeiddio cadwyni cyflenwi wrth gydbwyso effeithlonrwydd, gwerth a chyfrifoldeb byd-eang.

Datblygwch hyder ariannol i ddehongli, rheoli a dylanwadu ar ganlyniadau busnes. Dadansoddwch senarios byd go iawn, gwneud penderfyniadau strategol, a deall sut mae cyllid yn gyrru effaith sefydliadol a chymdeithasol.

Yn y modiwl hwn, byddwch yn archwilio sut mae sefydliadau'n nodi anghenion eu gweithlu ac yn denu, dewis, datblygu a chadw pobl. Gan weithio gyda heriau sefydliadol go iawn, byddwch yn dysgu gwneud a chyfiawnhau penderfyniadau adnoddau cyfrifol.

Mae'r modiwl hwn yn archwilio sut mae sefydliadau'n cefnogi, asesu a chydnabod cyfraniad gweithwyr. Byddwch yn archwilio disgwyliadau perfformiad, adborth, datblygiad, gwobrwyo a chydnabyddiaeth wrth ddysgu defnyddio gwybodaeth yn y gweithle i gefnogi penderfyniadau gwybodus.

Treuliwch flwyddyn gyfan yn y DU neu dramor yn ennill profiad yn y gweithle neu'n rhyngwladol. Adeiladwch bersbectif byd-eang, datblygwch rwydweithiau proffesiynol, a myfyriwch ar eich twf fel arweinydd y dyfodol.

Byddwch yn parhau i ddatblygu eich arbenigedd mewn rheoli adnoddau dynol yn y drydedd flwyddyn.

Ewch i'r afael â phroblemau busnes yn y byd go iawn, gan roi technolegau sy'n dod i'r amlwg ar waith, archwilio strategaethau moesegol a chynaliadwy, a datblygu’r hyder i lansio eich gyrfa.

Ewch i'r afael â heriau cymdeithasol ac amgylcheddol cymhleth. Cymhwyswch wybodaeth fusnes i atebion moesegol a chynaliadwy, ymgysylltu â rhanddeiliaid, ac archwilio sut y gall penderfyniadau effeithio'n gadarnhaol ar bobl, y blaned ac elw.

Yn y modiwl hwn, byddwch yn archwilio'r hawliau, y cyfrifoldebau a'r perthnasoedd sy'n llunio cyflogaeth. Byddwch yn cymhwyso egwyddorion cyfreithiol perthnasol i sefyllfaoedd gweithle sy'n cynnwys llais gweithwyr, cydraddoldeb, gwrthdaro, cynrychiolaeth ar y cyd ac ailstrwythuro sefydliadol.

Mae'r modiwl hwn yn canolbwyntio ar sut mae datblygiadau fel ailstrwythuro, technoleg newydd a threfniadau gwaith newidiol yn effeithio ar weithwyr. Byddwch yn ystyried sgiliau'r gweithlu, cyfathrebu, cyfranogiad, gwrthwynebiad a lles cyn datblygu ymateb Rheoli Adnoddau Dynol gwybodus.

Camwch i esgidiau ymgynghorydd busnes. Dadansoddwch friffiau cleientiaid, datryswch broblemau cymhleth, cyflwynwch argymhellion, a chyfunwch theori ag ymarfer i feithrin sgiliau ymgynghori ac arweinyddiaeth – gyda'r cyfle i arbenigo a chanolbwyntio'n benodol ar roi eich gwybodaeth am Reoliadau Adnoddau Dynol ar waith.

Rydym yn adolygu ein cyrsiau'n rheolaidd i gadw i fyny â sgiliau newidiol ac anghenion cyflogwyr. Os bydd adolygiad yn arwain at newidiadau sylweddol, byddwn yn cysylltu â chi i esbonio beth sy'n newid ar gyfer y flwyddyn nesaf.

Addysgu ac Asesu

Mae'r addysgu wedi'i lywio gan y diwydiant ac yn cael ei arwain gan fyfyrwyr, gan eich helpu i feithrin hyder, annibyniaeth a phroffesiynoldeb.

Byddwch yn dysgu trwy sesiynau rhyngweithiol lle byddwch yn cydweithio, yn rhannu syniadau ac yn rhoi'r hyn rydych chi wedi'i ddysgu ar waith mewn sefyllfaoedd go iawn. Byddwch yn mynd i'r afael â briffiau byw, yn rhwydweithio â gweithwyr proffesiynol yn y diwydiant ac yn datblygu'r sgiliau i wneud gwahaniaeth ym myd busnes.

Mae dilyniant clir i’r llwybr. Yn eich blwyddyn gyntaf ar y cyd, byddwch yn archwilio pam mae sefydliadau'n rheoli pobl mewn ffyrdd penodol. Yn eich ail flwyddyn, byddwch yn archwilio sut mae arferion allweddol AD yn gweithredu. Yn eich blwyddyn olaf, byddwch yn gwerthuso sefyllfaoedd cymhleth yn y gweithle ac yn penderfynu beth ddylai sefydliadau ei wneud.

Mae asesiadau'n ymarferol ac yn bwrpasol, gan eich helpu i ddysgu trwy wneud. Byddwch yn gweithio ar dasgau o’r byd go iawn fel cyflwyno syniadau i reolwyr, datblygu adroddiadau busnes, creu gwefannau a chreu cynlluniau busnes, gan eich helpu i ddatblygu hyder, meddwl beirniadol a sgiliau digidol.

Mae'r cwrs wedi'i ddylunio ar gyfer gweithle ôl-AI Cynhyrchiol, felly byddwch yn dysgu defnyddio offer AI yn gyfrifol ac yn effeithiol, gan eich paratoi i lwyddo mewn amgylchedd busnes sy'n newid yn gyflym.

Cewch gyfleoedd i gael profiad yn y byd go iawn drwy flwyddyn ryngosod ddewisol (yn y DU neu'n rhyngwladol) neu leoliad pum wythnos yn eich ail flwyddyn. Mae'r opsiynau hyn yn eich helpu i gymhwyso'r hyn rydych chi wedi'i ddysgu mewn lleoliad proffesiynol, meithrin hyder, a’ch gwneud yn fwy cyflogadwy, a bydd opsiynau ar gyfer lleoliadau gwaith sy'n gysylltiedig yn uniongyrchol â gyrfaoedd mewn rheoli adnoddau dynol.

Mae astudio Busnes a Rheolaeth yn golygu dysgu y tu hwnt i'r ystafell ddosbarth. Cewch gyfleoedd i ddod i gyswllt â phartneriaid yn y diwydiant, gan gynnwys ymweliadau â gweithleoedd proffesiynol ac addysgu achlysurol mewn gweithleoedd go iawn yng Nghymru. Ochr yn ochr â hyn, cewch eich cefnogi gan staff arbenigol a chewch ddefnyddio gliniaduron, cyfleusterau TG ar y campws ac adnoddau llyfrgell i gefnogi eich astudiaethau.

Arweinwyr y Cwrs

Liam Newton
Daw Liam o gefndir marchnata, ar ôl gweithio yn y diwydiant marchnata yn Awstralia cyn symud i'r byd academaidd ac addysgu mewn sawl gwlad ledled Ewrop. Mae'n frwd dros sicrhau bod pob myfyriwr yn cyflawni ei nodau unigol trwy'r cwrs - boed hynny i ddod yn arweinydd busnes, gweithio mewn cwmni rhyngwladol, datblygu busnes ymgynghori, neu ddechrau menter newydd.

Kevin Brown
Mae Kevin yn academydd Rheoli Adnoddau Dynol profiadol gyda blynyddoedd lawer o brofiad yn arwain a datblygu rhaglenni a gydnabyddir yn broffesiynol, gan gynnwys cyrsiau wedi'u halinio â'r Sefydliad Siartredig Personél a Datblygu (CIPD) ac wedi'u hachredu ganddo. Fel Arweinydd Cwrs ar gyfer y Llwybr Rheoli Adnoddau Dynol, mae wedi ymrwymo i sicrhau bod myfyrwyr yn datblygu'r wybodaeth, meddwl beirniadol a galluoedd proffesiynol sydd eu hangen i ymateb i ofynion newidiol y proffesiwn pobl.

Rhagolygon Gyrfa

Ar draws y llwybr, byddwch yn symud ymlaen o gwestiynu pam mae pobl yn cael eu rheoli mewn ffyrdd penodol, i ddeall sut mae arferion AD yn gweithio, ac yn y pen draw i benderfynu beth ddylid ei wneud pan fydd sefydliadau'n wynebu heriau cymhleth sy'n gysylltiedig â phobl.

Eich Gyrfa yn y Dyfodol

Gall y llwybr eich paratoi ar gyfer cyfleoedd graddedig ym meysydd adnoddau dynol, recriwtio, datblygu talent, cysylltiadau â gweithwyr a rolau ehangach ym maes rheoli pobl. Bydd hefyd yn darparu sylfaen gref ar gyfer astudiaethau ôl-raddedig, gan gynnwys symud ymlaen i MSc Rheoli Adnoddau Dynol yn PDC.

Mae llwybrau gyrfa posibl yn cynnwys:

Rheolwr Adnoddau Dynol
Rheolwr Hyfforddi a Datblygu
Ymgynghorydd Recriwtio
Rheolwr Cyffredinol
Arbenigwr Amrywiaeth a Chynhwysiant

"Gweithiais yn yr adran Adnoddau Dynol ar brosiectau go iawn, gan gynnwys ymarfer meincnodi cyflogau mawr a chymariaethau buddion â sefydliadau tebyg."

Joel Jones, Myfyriwr Busnes a Rheolaeth

Dysgu mwy

Disgwyliadau cyflog

Gall gradd Busnes a Rheoliagor cyfleoedd ar draws Busnes a Rheoli. Mae gyrfaoedd Busnes a Rheoli yn cynnig potensial enillion cryf:

Cyflog canolrifol
DU: £54.4k y flwyddyn
Cymru: £44.6k y flwyddyn

Cyfanswm y swyddi yn 2025
DU: 5.45,m
Cymru: 173,409

Ffynhonnell: Lightcast Labour Market Data 2026

Partneriaid Diwydiant

Mae cysylltiadau cryf â'r diwydiant wrth wraidd y cwrs, gyda phartneriaid gan gynnwys Barclays, HOOP Recruitment ac NSPCC yn llunio’r dysgu trwy friffiau byw, gweithdai ac ymweliadau â’r gweithle. Mae'r cysylltiadau hyn yn cynnig dealltwriaeth go iawn o ymarfer proffesiynol, yn magu hyder ac yn tyfu eich rhwydwaith.

Cynigion cyd-destunol

Mae’n bosibl y byddwn yn gwneud cynnig is i chi yn seiliedig ar amrywiaeth o ffactorau, gan gynnwys eich cefndir (ble rydych chi'n byw a'r ysgol neu'r coleg y buoch yn ei mynychu, er enghraifft), eich profiadau a'ch amgylchiadau unigol (fel rhywun sy'n gadael gofal, er enghraifft). Cyfeirir at hyn fel cynnig cyd-destunol, ac rydym yn derbyn data gan UCAS i'n cefnogi wrth wneud y penderfyniadau hyn.

Mae PDC yn ymfalchïo yn ei phrofiad myfyrwyr ac rydym yn cefnogi ein myfyrwyr i gyflawni eu nodau a dod yn raddedigion llwyddiannus. Mae'r dull hwn yn ein helpu i gefnogi myfyrwyr sydd â'r potensial i lwyddo ac a allai fod wedi wynebu rhwystrau sy'n ei gwneud hi'n anoddach cael mynediad i brifysgol.

Sut i wneud cais Datganiad Derbyniadau Cyd-destunol Gofynnwch gwestiwn i ni

96 Pwyntiau UCAS neu'n uwch

Gofynion cymhwyster nodweddiadol

Lefel A:
CCC

Bagloriaeth Cymru:
Bagloriaeth Sgiliau Uwch Cymru Gradd C a CC Safon Uwch

BTEC:
Diploma Estynedig BTEC Teilyngdod Teilyngdod

Mynediad i AU:
Pasio y Diploma Mynediad i AU a chael o leiaf 96 pwynt tariff UCAS.

Safon T:
Pasio (C ac uwch)

Gofynion ychwanegol:
Mae'r Brifysgol fel rheol yn gofyn am o leiaf 5 TGAU gan gynnwys Mathemateg / Rhifedd a Saesneg ar Radd C neu Radd 4 neu'n uwch, neu'r hyn sy'n cyfateb iddynt, ond rhoddir ystyriaeth i amgylchiadau unigol

Ffioedd a Chyllid

Ffioedd a Chyllid Ysgoloriaethau a Bwrsariaethau Cymorth Costau Byw

Astudio yn y Brifysgol yw un o'r buddsoddiadau mwyaf sylweddol y byddwch yn ei wneud erioed. Tra byddwch yn astudio, bydd gennych ddau brif rwymedigaeth ariannol – ffioedd dysgu a chostau byw. Mae llawer o gymorth ariannol ar gael gan Brifysgol De Cymru a ffynonellau cyllid allanol, a all ddarparu benthyciadau (sy’n rhaid eu talu’n ôl) a grantiau, ysgoloriaethau a bwrsarïau (nad oes rhaid eu talu'n ôl).

*Mae ffioedd llawn amser fesul blwyddyn. Mae ffioedd rhan-amser fesul 20 credyd. Ar ôl cofrestru, disgwylir i'r ffi barhau ar yr un gyfradd trwy gydol eich astudiaethau ar y cwrs hwn, ac eithrio fel y disgrifir isod.

Byddwch yn ymwybodol y gallwn gynyddu'r ffi uchaf ar gyfer myfyrwyr cartref ar gyrsiau israddedig llawn amser dim ond pan fydd Llywodraeth Cymru yn cynyddu'r lefel chwyddiant ffioedd a ganiateir. Gellir diwygio ffioedd ar gyfer pob myfyriwr (gan gynnwys myfyrwyr rhan-amser, ôl-raddedig a rhyngwladol) yn unol â'n Polisi Rheoli Ffioedd a Dyled perthnasol. Byddwn yn sicrhau bod myfyrwyr yn cael gwybodaeth glir, ddealladwy, ddiamwys ac amserol am ein cyrsiau a'n costau mewn digon o bryd, cyn y flwyddyn academaidd nesaf.

Fel myfyriwr PDC, bydd gennych fynediad at lawer o adnoddau am ddim i gefnogi'ch astudiaethau a'ch dysgu, megis gwerslyfrau, cyhoeddiadau, cyfnodolion ar-lein, gliniaduron, a digon o adnoddau mynediad o bell. Yn y rhan fwyaf o achosion mae'r adnoddau hyn yn fwy na digon i'ch cefnogi i gwblhau eich cwrs. Efallai y bydd costau ychwanegol, yn orfodol ac yn ddewisol, ar gyfer teithio, aelodaeth, diwrnodau profiad, deunydd ysgrifennu, argraffu neu offer ac ati.

Treuliau lleoliad: Interniaeth
Cynigir cyfle i fyfyrwyr gwblhau interniaeth yn ystod eu hail flwyddyn astudio. Gall myfyrwyr sy'n ymgymryd ag interniaeth fynd i gostau sy'n gysylltiedig â theithio a'r dillad disgwyliedig yn y gweithle a bydd hyn yn amrywio yn ôl y lleoliad.
Cost: I fyny at £300

Gliniadur
Mae gan y Brifysgol gyfrifiaduron ar gael ar y campws a gliniaduron i'w benthyca. Fodd bynnag, argymhellir yn gryf bod gennych eich gliniadur personol eich hun, a fydd yn gallu rhedeg Microsoft Office 365. Fel myfyriwr, byddwch yn gallu lawrlwytho copi am ddim o unrhyw feddalwedd sy'n berthnasol i'r cwrs.
Cost: I fyny at £250

Arall: Eisteddiadau Arholiadau Dramor
Pe bai myfyrwyr yn dewis sefyll arholiadau dramor (yn eu mamwlad er enghraifft) bydd ffi weinyddol o £ 50 a chost o £ 20 fesul arholiad. Mae myfyrwyr hefyd yn gyfrifol am unrhyw daliadau ychwanegol a godir gan leoliad arholiadau tramor.
Cost: £50 - £500

Ffioedd a Chyllid Ysgoloriaethau a Bwrsariaethau Cymorth Costau Byw

Y brifysgol orau yng Nghymru a'r 24ain allan o 123 o brifysgolion yn y DU.

Canllaw Prifysgolion y Guardian 2027

Three USW students walking outside of Cardiff Campus - Atrium

10 pwnc wedi'u rhestru yn y 10 uchaf yng Nghanllaw Prifysgolion y Guardian 2027, gan gynnwys dau yn y safle cyntaf.

Three students studying in a pod in the library at Cardiff campus

Ar y brig yng Nghymru ar gyfer busnesau newydd am y 6ed flwyddyn yn olynol, a’r 7fed yn y DU (HEBCIS).

Sut i Wneud Cais

Dylid gwneud pob cais am gyrsiau israddedig amser llawn neu raddau sylfaen drwy UCAS. Cymerwch y cam nesaf: Gwnewch gais drwy UCAS.

Gallwch wneud cais i ni yn uniongyrchol am bob cwrs israddedig rhan-amser, os ydych yn chwilio am fynediad uwch neu os ydych yn fyfyriwr rhyngwladol. I wneud cais yn uniongyrchol, dewiswch y ffurflen gais isod ar gyfer eich dyddiad cychwyn dewisol a'ch dull astudio (amser llawn neu ran-amser).

Busnes a Rheoli (Rheoli Adnoddau Dynol)
- Llawn Amser, 3 blynedd
- Medi
- Caerdydd
Apply direct

Os oes gennych gymhwyster neu brofiad perthnasol eisoes sy'n gysylltiedig â'r cwrs rydych yn gwneud cais amdano, efallai y byddwch yn gymwys i ddechrau ar gam diweddarach o'r cwrs. Er enghraifft, gall myfyrwyr o golegau partner 'ychwanegu ato' eu cymwysterau i radd trwy ymuno â ni ym Mlwyddyn Dau neu Flwyddyn Tri cwrs. Gelwir y broses hon yn 'fynediad uwch', gallwch wneud cais yn uniongyrchol i'r Brifysgol am 'fynediad uwch' gan ddefnyddio'r ffurflenni cais a ddarperir uchod.

Gall ymgeiswyr a dderbynnir drwy fynediad uwch astudio cyfuniad gwahanol o fodiwlau i'r rhai a hysbysebir, gan y byddant yn ymuno â chwrs sydd eisoes ar y gweill. Fe wnawn ni gysylltu â chi a’ch cynghori chi am y modiwlau hyn unwaith y bydd eich cais wedi'i brosesu a chynnig wedi'i wneud.

Gall ymgeiswyr rhyngwladol wneud cais yn uniongyrchol i ni. Os oes gan y Brifysgol dîm mewn gwlad yn eich rhanbarth, bydd eich cais yn cael ei neilltuo iddynt am gymorth.

Straeon Myfyrwyr

Fel rhan o'r cwrs AD, cyflwynwyd Hassan i ryngweithiadau diwydiant hollbwysig trwy ddarlithoedd gwadd a a seminarau byw. Cynigiodd y profiadau hyn wybodaeth ymarferol, gan ategu ei wybodaeth ddamcaniaethol drwy hynny, a'i wneud yn ymgeisydd cyflawn ar gyfer cyflogaeth yn y dyfodol.

Hassan Raza Myfyriwr Rheoli Adnoddau Dynol

Gweld proffil myfyriwr

Straeon Myfyrwyr

"Dewisais PDC ar ôl profi amgylchedd prifysgol gwahanol lle'r oedd darlithoedd yn teimlo'n unochrog ac yn ddatgysylltiedig. Yn PDC, roedd y pwyslais ar brofiad ymarferol a dosbarthiadau llai, mwy personol yn apelio ataf yn fawr."

Joel Jones Myfyriwr Busnes a Rheolaeth

Gweld proffil myfyriwr

Straeon Myfyrwyr

"Cadwch feddwl agored a bod yn fodlon i archwilio ardaloedd gwahanol o fewn y maes, nid oes un llwybr i lwyddiant. Byddwch yn barod i gamu allan o'ch man cyfforddus.”

Sumaya Khan Myfyriwr Busnes a Rheolaeth

Gweld proffil myfyriwr

Alicia Smith

"Roedd astudio yn PDC yn benderfyniad hawdd i fi – ro’n i eisiau bod yn agos at adref pan o’n i yn y brifysgol, ac mae gan PDC un o'r ysgolion busnes gorau yng Nghymru. Hefyd, ers pum mlynedd erbyn hyn, mae'r brifysgol wedi’i henwi bob blwyddyn fel yr un orau yng Nghymru o ran busnesau newydd gan raddedigion, felly roeddwn i'n gwybod y byddai'n lle gwych i hogi fy sgiliau entrepreneuraidd."

Alicia Smith Graddedig Busnes a Rheoli

Gweld proffil myfyriwr

Shane Richard Jordan

"Roeddwn i'n gwybod fy mod i eisiau dechrau fy musnes fy hun. Dyna pryd y penderfynais fynd i'r brifysgol ac ennill gradd busnes. Fe wnes i lunio cynllun busnes a datblygodd pethau o'r fan honno."

Shane Richard Jordan Graddedig Busnes a Rheoli

Gweld proffil myfyriwr

Straeon Myfyrwyr

Dewisodd Chidinma PDC am ei gradd Ôl-raddedig adnabyddus mewn Caffael, gan fwriadu adeiladu ar ei phrofiad mewn cwmni FMCG o Nigeria. Cynigiodd PDC gymysgedd perffaith o ymarfer a theori. “Roeddwn i angen prifysgol gyda hanes o ragoriaeth academaidd a thiciodd Prifysgol De Cymru’r blwch hwnnw.”

Chidinma Fofah Graddedig Busnes a Rheolaeth

Gweld proffil myfyriwr

Straeon ac uchafbwyntiau cysylltiedig

Erthygl Newyddion

Barod i wneud cais?

Dal i archwilio eich opsiynau?

Bywyd Myfyrwyr Ein lleoliadau Llety

Trosolwg o'r Cwrs